Pajlug 25:6-7; Loos 12:3-8
Nqe cim:
“Vim Vajtswv pub nws txojkev hlub rau kuv, kuv thiaj ntuas nej txhua tus hais tias, nej tsis txhob xav dhau tej uas nej ua tsis tau. Tiamsis nej yuav tsum muab nej txojkev ntseeg ntsuas saib, Vajtswv pub nej muaj peevxwm npaum li cas.” (Loos 12:3)
Lus nug rau sawvdaws xav:
– Vim li cas koj tsis txhob maj mus sawv ntawm cov uas ua hlob lub chaw?
– Kev txo hwjchim coj tau yam dabtsi zoo rau koj?
– Peb muab kev txo hwjchim los siv licas hauv kev ua Vajtswv haujlwm?
Vajntxwv Xalumoos tau qhia ib lo lus qhuab ntuas meej heev tias: Koj tsis txhob maj mus sawv ntawm cov uas ua hlob lub chaw; cia vajntxwv yog tus uas tsa koj los txais lub meejmom ntawd. Yog koj muab koj tus kheej tsa siab, khavtheeb tabmeeg vajntxwv xub ntiag, ces koj yuav raug muab txo qis dua lwm tus uas muaj meejmom. Lo lus “tsis txhob mus sawv ntawm cov uas ua hlob lub chaw” (Pajlug 25:6 HMOWSV) muaj lub ntsiab hais tias koj yuav tsum zaum kom yog koj qhov chaw, tsis txhob cia kev ntshaw ntxias koj mus txeeb lwm tus uas muaj meejmom siab dua koj qhov chaw. Yog koj muab koj tus kheej tso rau qhov chaw ntawd, lossis xav hais tias koj tsimnyog txais qhov chaw loj ntawd, ces koj yuav muaj kev txhawjxeeb txog kev raug txo qib, yog yam uas yeej yuav muaj ib hnub tshwm sim rau koj. Thaum koj raug lwm tus txo qis, los rau qhov chaw qis dua, ces koj yuav raug luag saib tsis taus rau qhov koj twb khavtheeb lawm. Tes haujlwm “ntiab koj sawv” muaj lub ntsiab hais tias ua kom koj poob ntsej muag thiab ua rau koj raug txo qis.
Kev txo hwjchim yuav pab kom koj tswj tau koj tus kheej thiab nqa tau lub meejmom los rau koj. Yog vajntxwv tsa koj mus ua tus loj, koj mam li nkag tau rau hauv cov uas ua hlob lub chaw nrog kev ntseeg siab tias koj tsimnyog tau txais qhov kev qhuas ntawm vajntxwv. Vim li ntawd, qhov zoo tshaj yog koj xaiv kev txo hwjchim zoo dua li kev raug poob ntsej muag. Kev txo hwjchim tsis yog tsuas siv rau hauv kev ua neej txhua hnub xwb, tiamsis tseem yuav tsum kawm xyaum thiab coj los siv hauv sab ntsujplig thiab. Vaj Ntsujplig Dawbhuv pub rau Vajtswv cov menyuam muaj ntau yam koob hmoov los koom ua ke ua haujlwm hauv Nws lub Tsev. Los ntawm tej koob hmoov uas tus Tswv pub, peb txhua tus yuav tsum txo hwjchim thiab muab siab ua kom tiav txoj haujlwm uas Vajtswv muab cob rau peb. Timthawj Paulus qhia tias: “Vim Vajtswv pub nws txojkev hlub rau kuv, kuv thiaj ntuas nej txhua tus hais tias, nej tsis txhob xav dhau tej uas nej ua tsis tau. Tiamsis nej yuav tsum muab nej txojkev ntseeg ntsuas saib, Vajtswv pub nej muaj peevxwm npaum li cas” (Loos 12:3).
Ntau zaus peb xav kom sawvdaws hwm peb, ces peb maj khav txog peb tej kev ua tau, tej peevxwm, zoo ib yam li peb muab peb tus kheej tso rau qhov chaw muaj meejmom siab ntag. Qhov no yog ib txojkev ua neej uas tsis muaj tswvyim, vim Vajtswv Txojlus hais tias: “Kev khavtheeb yuav ua rau koj poob ntsejmuag, tiamsis yog koj txo hwjchim luag yuav hwm koj” (Pajlug 29:23). Thov tus Tswv pab kom peb txhua tus paub zeem paub peb qhov chaw, tej peevxwm thiab tej koob hmoov tus Tswv pub, ua lub neej txo hwjchim kom muaj txiaj ntsig zoo rau peb tsev neeg, Pawg Ntseeg thiab ua kom Vajtswv lub Npe tau koob meej nyob hauv zej zos.
Thov Vajtswv,
Tus Tswv, nyuam yaus ua Koj tsaug rau qhov Koj tau txo hwjchim los ua neeg kom cawm tau nyuam yaus dim. Thov pab nyuam yaus ua neej txo hwjchim, mob siab nrhiav Koj lub siab nyiam hauv txhua tes haujlwm. Thov pab nyuam yaus sawv yog qhov chaw uas Koj tau tsa nyuam yaus thiab ua kom tiav txoj haujlwm uas Koj muab rau nyuam yaus ua. Nyuam yaus tuav Yexus Khetos lub npe thov, Amees.
Peb puas txaus siab hlo txo hwjchim saib lwm tus zoo li tseemceeb dua peb?
Nyeem Vajluskub hauv peb lub xyoos: Yelemis 14
Kênh Youtube BHKTHN:
