Klei Aê Diê Blŭ: Klei Mmuñ Hđăp 1:1-3
Êlan kliăng: “Ñu jing msĕ si sa ƀĕ ana kyâo pla giăm êa hnoh, mboh tơdah truh yan gơ̆; wăt hla ñu amâo thâo krô ôh, leh anăn jih klei ñu ngă srăng jing.” (Klei Mmuñ Hđăp 1:3)
Klei êmuh ksiêm mĭn: Klei hdĭp pô mâo klei hơêč hmưi dưi bi msĕ hŏng ya klei? Si klei brei phung đăo kơ Krist thâo săng kơ klei tŭ dưn leh anăn mdrŏng sah hlăm Khua Yang? Ya klei mđĭ ai drei hlăm klei hriăm hruê anei?
Klei Mmuñ Hđăp 1:3 lač kơ rup jăk siam mơ̆ng ana kyâo pla giăm êa hnoh. Ana anăn mâo êa rông ba kyua jing phŭn hdĭp, mâo ai ktang snăk, wăt tơdah hlăm yan adiê amâo găl jăk ƀiădah hla ñu amâo thu krô ôh. Ñu ăt dôk kjăp dôk guôn wưng mboh tŭ dưn. Rup anei dưi bi hmô hŏng klei hdĭp mngăt phung huĭ mpŭ kơ Aê Diê. Diñu “dôk mĭn kơ klei bhiăn anăn hruê mlam”, dưi rông ba nanao kyua Klei Aê Diê Blŭ, mngăt ai tiê jăk mơak nanao leh anăn hriê kơ prŏng, wăt tơdah klei dleh dlan kyua arăng ngă jhat, dleh dlan, klei ruă duam amâodah amâo tŭ jing hlăm bruă knuă…
Phung kpă ênô knang nanao kơ Aê Diê, hdĭp hlăm klei čang hmăng leh anăn dôk duôn klei găl čiăng tŭ dưn kơ Ñu. Wăt tơdah mâo mmông phung đăo tuôm hŏng klei thu krô hlăm mngăt ƀiădah Klei Aê Diê Blŭ mđĭ ai leh anăn rông ba drei găn tlung klei djiê. Brei đăo kjăp, Aê Diê brei leh kơ drei klei dưi hlăm Khua Yang Yêsu Krist, kyua anăn drei lŏ dơ̆ng dôk hlăm Ñu, khăp kơ Klei Aê Diê Blŭ leh anăn gưt kơ Ñu.
Klei mdrŏng sah dưi rơ̆ng kơ mnuih mâo klei hơêč hmưi hlăm êlan 3 amâo djŏ jing klei mdrŏng sah kơ mnơ̆ng dhơ̆ng hlue si hnơ̆ng čuăn lăn ala ôh ƀiădah jing klei mdrŏng sah hlăm Khua Yang. Mâo mơ̆ klei pô ƀuh klei mdrŏng sah leh anăn klei Khua Yang Yêsu Krist dưi tơdah Ñu ruah êbat ti êlan Gôlgôtha? Ƀiădah anăn jing klei bi mdlưh ai Satan leh anăn phung jing dŏ ñu. “Kyuanăn Aê Diê mpŭ kơ Ñu ti dlông snăk, leh anăn brei kơ Ñu anăn ti dlông hĭn kơ jih jang anăn, čiăng kơ ti anăp anăn Yêsu jih jang phung hlăm adiê, ti lăn ala, leh anăn ti gŭ lăn ala srăng čuôn kơŭt, leh anăn jih jang êlah srăng hưn kơ Yêsu Krist jing Khua Yang, čiăng bi guh kơang Aê Diê Ama” (Y-Philip 2:9-11). Khua Yang Yêsu dưi leh hŏng klei guh kơang leh anăn Ñu mâo klei dưi brei klei hdĭp leh anăn klei hdĭp jăk mơak kơ hlei pô đăo kơ Ñu (Y-Yôhan 10:10).
Thâo klei Aê Diê čiăng hlăm Klei Aê Diê Blŭ leh anăn kơ hdră mơ̆ng Aê Diê jing kliăng truh kơ klei mdrŏng sah. Aê Diê srăng brei kơ drei ai ktang găn jih klei dleh dlan hlăm klei hdĭp, mboh tŭ dưn jăk siam djŏ wưng. Drei mâo klei mđĭ ai hdĭp kơ Aê Diê, dôk guôn klei pah mni yuôm bhăn jing mâo Aê Diê jum hlăm êpul kpă ênô, dôk kjăp ktang leh anăn hơ̆k mơak hlăm hruê phat kđi. Klei hdĭp mngăt jăk mơak phung mâo klei hơêč hmưi amâo djŏ mkă hŏng prăk mah ôh ƀiădah mkă mơ̆ng ai tiê mpŭ kơ Klei Aê Diê Blŭ leh anăn êbat hlăm klei gưt kơ Aê Diê.
Ya klei brei drei bi mlih čiăng dưi thâo kral sa klei hdĭp tŭ dưn leh anăn mdrŏng sah?
Wah lač: Ơ Aê Diê, kâo bi mni kơ Ih dôk mbĭt leh anăn atăt gai kâo găn jih hlăk êjai êdu awăt hlăm mngăt. Akâo kơ Ih đru kâo tui tiŏ sa klei hdĭp tŭ dưn leh anăn mdrŏng sah hlue si ală Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
