Hơriso 1:1-3
“Bơngai noh nhen thoi tơm ‘long chăt cheng đak glung, Đei plei kiơ̆ kơ bơyan, Hla sư ưh kơ đei laiyơ jô kro, Rim tơdrong jang sư pơm jing ngăl.” (Hơriso 1:3)
Nơ̆r jet tơchĕng pơwao:
– Chăl arih bơngai đei pŭn hiôk pơtih hăm tơdrong kiơ?
– Bơngai lui kăl kơ băt thoi yơ gah tơdrong đei yua păng wơ̆ pran lăm Kră Yang?
– Bơ̆n đei tơdrong pơtrŭt kiơ đơ̆ng ‘bai pơhrăm năr ‘nâu?
Hơriso 1:3 roi tơdrong arih tơm ‘long chăt cheng đak glung. ‘Long ‘noh ling lang arih jê̆ đak tu tơdrong arih, đei tơdrong arih pran, mă lăm jơhngơ̆m tŏ phang mălei hla sư ưh kơ đei layơ jô kro. Sư oei dơ̆ng kơjăp răp gô khei ‘năr đei plei ‘ngam ‘lơ̆ng. Tơdrong ‘nâu đei pơtih hăm tơdrong arih gah bơhngol lu bơngai hli yom kơ Kră Yang. Lu sư “Tơchĕng tơdrong juăt ei măng năr” đei wei rong ling lang đơ̆ng Nơ̆r tơdrong arih. Bơhngol ling lang arih păng wơ̆ ‘lŏ mă đơ̆ng đei tơdrong pơma tat đe pơm kơnê̆. Tơdrong gleh truh, tơdrong jĭ jăn dah mă ưh kơ jing lăm tơdrong jang arih sa rim năr, bơngai ‘lơ̆ng tơpăt ling lang gơnang kơ Kră Yang. Arih lăm tơdrong hơmĕng păng chang gô năr trŏ lăp wă kơ đei yua kơ Kră Yang. Phŏ đei năr bơngai lui tơ’bơ̆p tơdrong arih hrĕng kro gah bơhngol mălei nơ̆r Kră Yang nơ̆r arih pơlung păng wei rong tơgŭm bơ̆n hlôi đơ̆ng thŭng yơ̆p tơdrong lôch. Athei lui mă tơpă, Kră Yang ăn kơ bơ̆n tơdrong kĕ jei lăm Kră Yang Yêsu. Thoi noh, bơ̆n athei ling lang oei lăm Sư. ‘mêm kơ nơ̆r Sư păng chu yom Sư.
Tơdrong wơ̆ pran đei tơpă ăn kơ bơngai đei pŭn hiôk lăm trong 3 ưh kơ trŏ kơ tơdrong wơ̆ pran gah mŭk tơmam kiơ̆ kơ bơngai ala teh au ôh, mălei noh jơ̆ tơdrong mơdrŏng lăm Kră Yang. Đei bu lăng ‘bôh tơdrong wơ̆ pran păng kĕ jei Kră Yang Yêsu kơplah Sư rơih iŏk trong năm tơ Gôl gô tha ưh? Mălei ‘noh bơih pơrăm lê̆ tơdrong jang yang satan păng lu bơngai gah sư. “Yua kơ thoi noh bơih na ‘Bok Kei-Dei pôk atŏk Sư pơm tih dang ei, Sư tih hloh kơ đĭ đăng. Mă đĭ đăng lu oei tơ kơpal plĕnh ti, mă oei tơ teh âu, mă lu oei tơ ala teh sŭng, đĭ đăng gô sơtơ̆p kŭl tăng kơkuh kơ Sư. Đĭ đăng bơngai gô kơnăl kơ Sư Kră Yang, na kon bơngai ưang kơ ‘Bă Sư ‘Bok Kei-Dei .” (Philip 2:9-11). Kră Yang Yêsu kĕ jei jơnei tih păng Sư gơh ăn tơdrong arih păng arih hiôk chơt kơ lu bơngai mă lui sơng iŏk Sư. (Yôhan 10:10).
Băt tơdrong ‘Bok Kei-Dei wă đơ̆ng nơ̆r Sư păng chu yom tơdrong Kră Yang tơdă hơmet jơ̆ pơih khŏa ba truh tơ wơ̆ pran, Kră Yang gô ăn kơ bơ̆n đei jơhngơ̆m pran kĕ hlôi đơ̆ng dôm tơdrong pơlong lăm chăl arih, đei plei trŏ kơ jơ năr. Bơ̆n đei tơdrong pơtrŭt arih đei yua kơ Kra Yang, chang gô tơdrong apah gĭt kăl noh jơ̆ đei Kră Yang tơmơ̆t lăm lu khul bơngai ‘lơ̆ng tơpăt, dơ̆ng kơjăp păng chơt hiôk lăm năr sek tơlang. Tơdrong arih gah bơhngol hiôk chơt bơngai đei pŭn hiôk ưh kơ trŏ pơtŏ hăm mŭk tơmam mălei pơtŏ hăm jơhngơ̆m gĭt yom nơ̆r Kră Yang păng yak năm lăm tơdrong chu yom ‘Bok Kei-Dei.
Ơ Kră Yang, inh bơnê kơ Ih oei hơdai păng chông anhăk inh hlôi đơ̆ng dôm tơdrong kơplah hrĕng kro gah bơhngol. Apinh Kră Yang tơgŭm nh oei adrin kiơ̆ tơdrong arih đei yua păng wơ̆ pran kiơ̆ kơ Ih lăng. Krao khan yua anăn Kră Yang Yêsu Krist, Amen.
Bơ̆n kăl kơ tơplih tơdrong kiơ wă kơ gơh đei tơdrong arih đei yua păng wơ̆ pran?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 11
Kênh Youtube BHKTHN:
https://www.youtube.com/c/bhkthn
