Klei Aê Diê Blŭ: Êphêsô 6:10-20
Êlan kliăng: “Hŏng Yang Mngăt Jăk wah lač jêñ jêñ leh anăn kwưh. Răng kơ klei anăn nanao hŏng klei gĭr, êjai wah lač brei kơ jih jang phung doh jăk.” (Êphêsô 6:18)
Klei êmuh ksiêm mĭn: Ya klei brei phung đăo kơ Krist ngă, čiăng mâo klei dưi hĭn hlăm klei bi blah myang? Ya ngă brei wah lač brei kơ jih jang phung doh jăk? Si ngă brei drei wah lač brei kơ hdơ̆ng pô?
Hlăm Êphêsô 6:10-18, Khua ƀĭng kna Y-Pôl brei Phung Sang Aê Diê thâo, phung đăo kơ Krist hlăk dôk hlăm kdrăn bi blah myang hŏng phung yang jhat kyuanăn brei mprăp “jih jang mnơ̆ng bi blah Aê Diê brei”. Ñu yua rup sa čô kahan Rôm čiăng hưn mdah jih jang klei ktang myang pioh kơ phung đăo kơ Krist hlăm kdrăn blah bi kdơ̆ng hŏng phung yang jhat ƀai anei. Phung kahan Krist brei knang kơ klei ktang leh anăn mnơ̆ng bi blah Aê Diê brei, čiăng dưi dôk kjăp hlăm klei đăo tơl mâo klei dưi hĭn ti knhal tuč. Êjai “mnơ̆ng bi blah” đru mgang drei leh anăn kăp yua ksŭng bi blah hŏng phung roh, snăn “klei ktang” čiăng kơ drei mă yua mnơ̆ng bi blah hŏng klei tŭ dưn.
Klei ktang Khua Yang brei kơ drei hŏng Yang Mngăt Jăk wah lač (êlan 18). Tơdah yua boh blŭ “wah lač brei kơ jih jang”, “Răng kơ klei anăn nanao hŏng klei gĭr”, “jih jang phung doh jăk”, ñu čiăng kơ grăp čô phung đăo kơ Krist brei wah lač jêñ jêñ, kơ djăp mta bruă leh anăn kơ jih jang mnuih. Ya ngă brei wah lač brei kơ “jih jang phung doh jăk”? Hlăm kdrăn blah hlăm kđeh wăt hlăm klei hdĭp myang, sa čô kahan amâo dưi ôh bi blah hjăn păn ñu pô, ƀiădah bi blah nanao mbĭt hŏng êpul, bi đru mbĭt čiăng mâo klei dưi hĭn. Klei Aê Diê Blŭ mtô, drei jing asei mlei Yang Krist, grăp čô jing sa kdrêč mâo bruă klam bi dlăng ba hdơ̆ng pô hlăm asei mlei Khua Yang (I Kôrantô 12:12-27). Kyuanăn wah lač brei kơ hdơ̆ng pô jing bruă yuôm amâo dưi kƀah ôh. Khua Yang Yêsu pô yơh ăt wah lač brei leh kơ Khua ƀĭng kna Y-Pêtrôs čiăng kơ ñu dưi dôk kjăp hlăm klei đăo, dưi găn klei lông dlăng leh anăn rŭ mdơ̆ng mnuih mkăn (Y-Luk 22:31-32). Yang Mngăt Jăk leh anăn Khua Yang Yêsu ară anei dôk wah lač brei kơ jih jang drei (Rôm 8:26, 34). Kyuanăn, Khua ƀĭng kna Y-Pôl iêô mthưr drei wah lač brei amâo djŏ knŏng hlăm kdriêl Phung Sang Aê Diê ti ƀuôn sang ôh, ƀiădah wăt kơ “jih jang phung doh jăk”. Ñu pô ăt čiăng kơ phung ayŏng adei hlăm phung đăo wah lač brei kơ ñu msĕ mơh (êlan 19). Ñu lač hŏng klei kwưh kơ phung anak ƀuôn sang Aê Diê ti ƀuôn Têsalônik snei: “Ơ phung ayŏng adei, wah lač kơ hmei đa” (I Têsalônik 5:25). Brei gĭr, dôk răng wah lač brei kơ jih jang phung doh jăk jing mta bruă yuôm brei ngă (êlan 18).
Hruê anei, phung đăo kơ Krist ăt dôk hlăm kdrăn bi blah myang msĕ mơh, phung anak ƀuôn sang Aê Diê brei uêñ mĭn kơ jih jang mnuih čiăng kăp wah lač brei kơ hdơ̆ng pô jêñ jêñ. Brei drei wah lač kơ grăp čô hŏng klei klă nik, tui si boh klei digơ̆ găn mdê mdê, hŏng jih ai tiê hmăng hmưi kơ ayŏng adei drei mâo klei Khua Yang hơêč hmưi, bi mtlaih, răng mgang, bi hlao… hŏng klei wah lač brei kơ ayŏng adei hlăm klei đăo, drei bi đru hdơ̆ng drei hlăm jih kdrăn bi blah myang, bi êdah klei thâo bi khăp, klei sa ai čiăng hrăm mbĭt bi blah leh anăn mâo klei dưi hĭn.
Si ngă drei uêñ mĭn wah lač brei kơ hdơ̆ng pô mơ̆?
Wah lač: Ơ Ama kâo khăp! Akâo Khua Yang brei kâo leh anăn jih jang ayŏng amai adei kâo hdơr wah lač brei kơ hdơ̆ng hmei nanao, čiăng kơ grăp čô hmei mâo Khua Yang atăt gai, brei klei ktang, răng mgang, leh anăn hrăm mbĭt mâo klei dưi hĭn hlăm kdrăn bi blah myang anei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
