Klei Aê Diê Blŭ: Galati 6:1-5
Êlan kliăng: “Ơ phung ayŏng adei, diih phung mâo klei hdĭp myang, tơdah diih ƀuh sa čô lĕ hlăm klei soh, hŏng klei êdu êun mkra brei ñu wĭt ngă klei djŏ. Răng bĕ kơ diih pô msĕ mơh, huĭdah mâo klei mplư truh kơ diih” (Galati 6:1)
Klei êmuh ksiêm mĭn: Khua ƀĭng kna Y‑Pôl mtô ya knuih brei mâo hŏng pô mkăn leh anăn hŏng pô? Ya ngă ñu lač “đru bi gui klei ktrŏ hdơ̆ng diih” (êlan 2), leh anăn lŏ lač “Kyuadah grăp čô srăng gui klei ktrŏ ñu pô” (êlan 5)? Tơdah ƀuh pô mkăn dôk knap mñai hŏng klei ktrŏ amâodah ya klei soh, si knuih drei mâo?
Khua ƀĭng kna Y‑Pôl lač leh jih jang klei bhiăn dưi klah čŭn hlăm sa klei bhiăn jing khăp kơ pô mkăn msĕ si kơ pô (Galati 5:14). Tơdah čih yap knuih Boh Mơ̆ng Yang Mngăt Jăk, ñu ăt dưm “klei khăp” jing knuih tal êlâo. Hlăm trăn Klei Aê Diê Blŭ drei hriăm hruê anei, Khua ƀĭng kna Y‑Pôl nao êlam hlăm dua hdră bi êdah klei khăp anăn: Knuih hŏng phung ngă soh leh anăn hŏng phung dôk gui sa klei ktrŏ. Hŏng klei yua boh blŭ asăp mtrŭn, Khua ƀĭng kna Y‑Pôl mtă kơ phung đăo ti Galati “hŏng klei êdu êun” mkra wĭt phung tăm ngă soh, leh anăn đru bi gui klei ktrŏ (êlan 1-2). Ñu lač thiăm hŏng phung Galati dôk rŭng răng kơ bruă hlue ngă klei bhiăn: Anăn jing “ngă bi ênŭm klei bhiăn”.
Phung mâo klei bi knăl bi mĭn hlue si êlan “soh-djŏ, jŭ -kô̆” khăng dôk hlăm boh klei dlăng mơ̆ng sang phat kđi čiăng mkra wĭt klei soh phung mkăn. Msĕ si phung Pharisi hriăm klei bhiăn, phung msĕ snăn ăt khăng “čăp mnơ̆ng ktrŏ, dleh kơ arăng klam leh anăn dưm ti mra arăng” (Y‑Mathiơ 23:4) diñu amâo khăp gui klei trŏ kơ pô mkăn ôh. Bi phung mâo klei hdĭp myang jing pô ăt thâo “soh-djŏ”, ăt thâo ayŏng adei pô brei mâo mkra wĭt, ƀiădah diñu mkra wĭt hŏng ai tiê êdu êun, hŏng klei mĭn amâo dưm ôh pô jing prŏng (êlan 3), amâo bi mĭn ôh klei ktang pô leh anăn ăt kăn bi msĕ mơh pô hŏng pô mkăn leh anăn bi mni kơ pô (êlan 4). Pô anăn thâo săng pô ăt srăng ngă soh msĕ si ayŏng adei pô mơh kyua anăn bi đru mkra wĭt hlăm knuih luă gŭ (êlan 1). Boh blŭ “mkra” tinei jing boh blŭ lač kơ bruă ngă mơ̆ng pô bliah, ba klei bi mrâo, mkra msir. Mkra amâo djŏ jing klei bi kmhal ôh ƀiădah bi hlao, ngă bi jăk hĭn.
Êngao anăn, tơdah ƀuh pô mkăn dôk klam sa klei ktrŏ, mnuih mâo klei hdĭp myang srăng hrăm mbĭt mra klam bi đru (êlan 2). Phung mâo klei hdĭp myang amâo bi msĕ ôh hŏng pô mkăn čiăng bi mni kơ pô ƀiădah bi msĕ hŏng klei pô dưi ngă tơdah gĭr leh hŏng jih ai tiê, čiăng dlăng pô ngă jăk leh msĕ si năng bi mâo leh ka (êlan 4). Knhal tuč, phung mâo klei hdĭp myang thâo săng kơ ñu pô amâo djŏ jing pô bi mtlaih ôh. Phung mâo klei hdĭp myang srăng luă gŭ leh anăn jih ai tiê đru kơ phung mkăn tơdah dưi ngă, ƀiădah ăt thâo săng pô amâo dưi hdĭp hrô kơ pô mkăn ôh, mâo đa đa klei ktrŏ ƀiădah “grăp čô srăng gui klei ktrŏ ñu pô” (êlan 5). Phung mâo klei hdĭp myang srăng amâo ƀuah ñu pô ôh, amâo ƀuh pô hơăi mang ôh tơdah gĭr leh jih ai tiê ƀiădah amâo dưi đru pô ngă soh bi mlih amâodah đru pô gui klei ktrŏ hdjul hĭn.
Drei khăng luă gŭ amâodah ngă mgao tơdah mkra wĭt phung mkăn?
Wah lač: Ơ Yang Mngăt Jăk, akâo kơ Ih đru kâo thâo ƀuh klei djŏ kơ pô leh anăn srăng đru, bi gui klei ktrŏ hŏng pô mkăn hlăm ai tiê luă gŭ, bi khăp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
