II Xwmtxheej Vajntxwv 30:10-12
Nqe cim:
“Tiamsis yog lawv tsis tau ntseeg, lawv yuav ua li cas thov nws? Thiab lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txojmoo zoo rau lawv, lawv yuav ua li cas hnov?” (Loos 10:14)
Lus nug rau sawvdaws xav:
– Cov neeg uas xa Vajntxwv Hexekiyas tsab ntawv raug ua zoo li cas?
– Vim qhov twg cov Yudas ua raws li vajntxwv hais mus rau nram nroog Yeluxalees?
– Peb pheej ua dabtsi thaum raug tawmtsam mus qhia tus Tswv zaj?
Thaum cov neeg xa Vajntxwv Hexekiyas tsab ntawv fij dag zog mus lub nroog no rau lub nroog tod, caw cov Yixalayees uas nyob sab qaumteb kom mus rau nram lub nroog Yeluxalees ua Kevcai Hla Dhau thiab “los cuag tus Tswv” (II Xwmtxheej Vajntxwv 30:6), ces lawv raug cov Yixalayees “thuam thiab saib tsis taus”. Txawm raug li ntawd los lawv tsis tso tseg, lawv yeej mus lub nroog no rau lub nroog tod, thiab kuj muaj ib txhia pejxeem nyob sab qaumteb kam txo hwjchim thiab mus nram lub nroog Yeluxalees. Feem coob cov Yixalayees nyob sab qaumteb tsis kam txo hwjchim mus nram lub nroog Yeluxalees ua Kevcai Hla Dhau. Twb ntev los lawm lub tebchaws Yixalayees tsis ncaj ncees rau tus Tswv thiab ob lub tebchaws no muaj kev sib tawmtsam, koom tsis tau ua ke. Nimno yog mus nram lub nroog Yeluxalees ua Kevcai Hla Dhau ces lawv suav hais tias poob qis lawm, rau qhov lawv tsis kam lees tias lawv mus yuav kev thiab cheemtsum tau tus Tswv zam txim.
Vajtswv “ua kom” cov neeg Yudas nyob yav qabteb muaj lub siab mloog vajntxwv tej lus samhwm mus hauv nroog Yeluxalees ua Kevcai Hla Dhau. Lawv paub meej hais tias cov lus samhwm no yog tus Tswv hais. Txawm yog muaj neeg tiv qees txomnyem thiab kev thuam mus xa ntawv tshaj xo ua rau ib txhia neeg Yixalayees thiab cov Yudas tig rov los cuag tus Tswv los yog Vajtswv ua xwb, Nws ua kom lawv hloov siab rov los xwb tsis yog cov neeg xa ntawv ua tau. Timthawj Paulus hais tias: “Kuv yog tus cog, Apaulaus yog tus ywg dej, tiamsis tus uas ua kom loj hlob yog Vajtswv.” (I Kauleethaus 3:6). Peb tsis txhob khav tias kuv ua tau yam haujlwm no yam haujlwm tod rau tus Tswv.
Thaum tus Tswv txib tus cevlus Yaxayas, Yelemis mus qhia Nws Txojlus kom cov pejxeem lees txim ces Nws kuj qhia paub ua ntej tias lawv yuav tsis kam mloog (Yaxayas 6:8-9; Yelemis 7:27). Txawm yog li ntawd los, Nws yeej xav kom lawv qhia. Nimno, thaum ua raws li Tswv Yexus tej lus samhwm mus qhia Txojmoo Zoo, peb yuav raug saib tsis taus, raug tsevneeg tso tseg, raug tsimtxom. Txawm yog ntsib kev nyuaj thaum mus qhia tus Tswv zaj, los peb yuav tsum mloog Nws lus, vim qhov uas ua tau yog tus Tswv thiab yeej yuav muaj cov neeg uas tus Tswv hloov tig los cuag Nws. Timthawj Paulus kuj qhia hais tias leejtwg thov tus Tswv pab ces yuav tau kev cawm dim, tiamsis yog lawv tsis hnov qhia txog Nws lawv yuav tsis paub ntseeg thiab tsis paub thov pab? Thiab yog tsis muaj leejtwg mus qhia ces lawv yuav tsis paub txog Nws? (Loos 10:13-15). Tsis txhob tso tseg thaum raug thuam, rau cov neeg uas peb mus qhia.
Thov Vajtswv,
Tus Tswv, ua tsaug uas Koj cawm nyuam yaus. Thov Koj pub kom nyuam yaus ua tau siab tawv thiab ncaj ncees mus qhia Txojmoo Zoo, txawm yog raug thuam, ua saib tsis taus los tsuav yog coj tau neeg los ntseeg Koj thiab tau kev cawmdim xwb. Nyuam yaus tuav Tswv Yexus lub npe thov, Amees.
Peb puas txhawj ntshai lossis nres thaum mus qhia Txojmoo Zoo raug thuam thiab raug ua saib tsis taus?
Nyeem Vajluskub hauv peb lub xyoo: I Vajntxwv 10
Kênh Youtube BHKTHN:
