Klei Aê Diê Blŭ: II Klei Yăl Dliê 30:10-12
Êlan kliăng: “Ƀiădah si mnuih dưi iêô wah lač kơ Pô diñu amâo đăo ôh? Leh anăn si diñu dưi đăo kơ Pô diñu ka tuôm hmư̆ ôh? Leh anăn si diñu dưi hmư̆ tơdah amâo mâo pô mtô ôh?” (Rôm 10:14).
Klei êmuh ksiêm mĭn: Si arăng ngă kơ phung nao ba hră Mtao Hêsêkia mtă? Ya ngă phung Yuđa gưt kơ klei mtao mtă hriê kơ ƀuôn Yêrusalem? Ya drei khăng ngă tơdah tuôm hŏng klei arăng bi kdơ̆ng kyua hưn Anăn Khua Yang?
Tơdah phung ba hră nao mơ̆ng ƀuôn anei kơ ƀuôn mkăn ba hră Mtao Hêsêkia iêô jak phung Israel ti ƀuôn ala mtao tĭng dưr hriê kơ ƀuôn Yêrusalem hdơr mpŭ kơ Knăm Klei Găn leh anăn “lŏ wĭt kơ Yêhôwa” (II Klei Yăl Dliê 30:6) snăn digơ̆ tŭ klei phung Israel “tlao djă djik djak leh anăn mưč”. Wăt snăn dưn mơh, digơ̆ amâo kdŭn ôh, ƀiădah ăt lŏ nao kơ ƀuôn mkăn, leh anăn mâo mơh đa đa phung Israel ti čar dưr bi luă gŭ diñu pô hriê kơ ƀuôn Yêrusalem. Păt čiăng jih phung Israel ti čar dưr amâo čiăng hriê ôh kơ ƀuôn Yêrusalem hdơr mpŭ kơ Knăm Klei Găn kyua klei diñu mgao. Mơ̆ng sui leh phung Israel ti čar dưr amâo lŏ dôk sĭt suôr hŏng Aê Diê ôh leh anăn dua boh ƀuôn ala mtao anei khăng mâo klei bi ngă, amâo mâo klei bi mguôp ôh. Bi ară anei tơdah hriê kơ ƀuôn Yêrusalem hdơr mpŭ kơ Knăm Klei Găn diñu lač klei ngă anăn jing klei bi luă gŭ diñu pô kyuadah diñu amâo tŭ ôh kơ diñu klah đuĕ leh – leh anăn čiăng mâo klei Aê Diê pap brei.
Msĕ mơh “kngan Aê Diê yơr kơ phung Yuđa” čar dhŭng čiăng kơ digơ̆ sa ai gưt kơ klei mtao mtă hriê hdơr mpŭ kơ Knăm Klei Găn ti ƀuôn Yêrusalem. Digơ̆ thâo klă anei jing klei mtă tui si klei Aê Diê blŭ. Wăt tơdah phung nao ba hră amâo uêñ kơ klei dleh êmăn ôh leh anăn tŭ klei arăng tlao mưč dưn čiăng iêo jak jih jang mnuih lŏ wĭt kơ Yêhôwa, ƀiădah drei ƀuh klă klei đa đa phung Israel gưt kơ klei iêo jak leh anăn klei phung Yuđa sa ai gưt kơ klei Aê Diê mtă jing kbiă mơ̆ng klei Aê Diê bi kčŭt sơăi, Ñu yơh bi kčŭt leh ai tiê digơ̆, amâo djŏ bruă ngă mơ̆ng pô mkăn ôh. Khua ƀĭng kna Y‑Pôl lač: “Kâo pla leh, Y‑Apôlôs krih êa leh, ƀiădah Aê Diê brei čăt hriê kơ prŏng” (I Kôrantô 3:6). Đăm drei hưn tưn drei ngă leh bruă anei, bruă dih kơ Aê Diê ôh.
Tơdah Aê Diê tiŏ nao phung khua pô hưn êlâo Y‑Êsai, Y‑Yêrêmi mtô klei Ñu blŭ kơ phung ƀuôn sang Ñu čiăng kơ digơ̆ kmhal kơ klei soh, snăn Ñu hưn êlâo mơh kơ phung ƀuôn sang amâo srăng dôk hmư̆ ôh (Y‑Êsai 6:8-9; Y‑Yêrêmi 7:27). Wăt snăn dưn mơh, Khua Yang ăt čiăng digơ̆ nao hưn. Hruê anei, tơdah gưt klei mtă prŏng Khua Yang Yêsu čiăng nao hưn Klei Mrâo Mrang Jăk, drei ăt srăng tŭ klei arăng djă djik djak, mnuih hlăm gŏ sang drei srăng hngah kơ drei, tăp năng tŭ klei arăng ngă jhat mơh. Wăt tơdah tuôm hŏng klei dleh dlan dưn tơdah hưn Anăn Khua Yang, ƀiădah brei drei ăt gưt asăp kơ Ñu kyuadah boh tŭ dưn jing dŏ Khua Yang dê leh anăn ăt srăng mâo mnuih Khua Yang srăng bi kčŭt ai tiê brei lŏ wĭt kơ Ñu. Khua ƀĭng kna Y‑Pôl msĕ mơh lač snei: “Kyuadah ‘Hlei pô iêô kwưh kơ anăn Khua Yang srăng tlaih.’ Ƀiădah si mnuih dưi iêô wah lač kơ Pô diñu amâo đăo ôh? Leh anăn si diñu dưi đăo kơ Pô diñu ka tuôm hmư̆ ôh? Leh anăn si diñu dưi hmư̆ tơdah amâo mâo pô mtô ôh?” (Rôm 10:13-14). Hrô kơ klei kdŭn wĭt tơdah tŭ klei arăng tlao mưč leh anăn djă djik djak, akâo Khua Yang đru drei ăt knang kơ Ñu leh anăn wah lač brei kơ phung drei hưn Anăn Khua Yang.
Si ngă drei huĭ leh anăn kdŭn wĭt mơ̆ tơdah tŭ klei arăng djă djik djak leh anăn tlao mưč kyua hưn Klei Mrâo Mrang Jăk?
Wah lač: Ơ Khua Yang, lač jăk kơ Ih bi mtlaih kâo leh. Đru kâo jhŏng leh anăn sĭt suôr ngă tui si klei Ih mtă prŏng wăt tơdah srăng tŭ klei arăng tlao mưč leh anăn djă djik djak dưn mơh čiăng hưn Klei Mrâo Mrang Jăk iêo jak lu mnuih lŏ wĭt kơ Ih mă tŭ klei bi mtlaih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
