II Thexalaunikes 3:11-13
Nqe cim:
“Peb tuav peb tus Tswv Yexus Khetos lub npe samhwm rau cov neeg tub nkeeg ntawd kom lawv yuav tsum ua haujlwm yug lawv, lawv tsis txhob tos luag noj xwb.” (II Thexalaunikes 3:12)
Lus nug rau sawvdaws xav:
– Ua neeg tub nkeeg yuav coj mus tau dabtsi?
– Timthawj Paulus tuav Tswv Yexus lub npe ntuas kom cov neeg tub nkeeg yuav tsum ua li cas?
– Peb kawm tau yam dabtsi los ntawm Timthawj Paulus cov lus ntuas tas siab no?
Timthawj Paulus qhia hais tias nws hnov nyob hauv Pawg Ntseeg Thexalaunikes “muaj qee leej tub nkeeg, nyob dawb xwb, tsis ua ib yam haulwm dabtsi li.” (nqe 11). Nov yog cov neeg tub nkeeg tsis xav ua haujlwm tiamsis cia dab ntxwgnyoog kav yog li lawv siv tas lub sijhawm mus ua tes haujlwm tsis muaj nqis, pheej mus tab kaum lwm tus tes haujlwm, hais phem rau lwm tus, “tsa nplooj nrhiav kab”, pheej xav txog tej uas yus ua tsis tau, tab kaum cov kwvtij tes haujlwm. Txawm yog tsis paub lossis txhob txwm ua, cov neeg no tabtom thaiv Vajtswv tes haujlwm kev. Tswv Yexus ceebtoom thiab hais txog lawv tus cwjpwm uas pheej txiav txim rau lwm tus, “Vim li cas koj yuav saib qhov nyuag hmoov ntoo uas nyob hauv koj tus kwvtij lub qhovmuag, tiamsis koj twb tsis paub hais tias muaj ib yav ntoo nyob hauv koj lub qhovmuag?” (Lukas 6:41).
Tabmeeg cov neeg tub nkeeg, tab kaum lwm tus ua haujlwm, ib zaug ntxiv Timthawj Paulus tuav Tswv Yexus lub npe “samhwm” lawv. Paulus samhwm los ntawm lub meejmom ua tus coj sab ntsujplig, thiab ntuas los ntawm lub meejmom uas yog lawv ib tug tijlaug hauv tsevneeg ntseeg Yexus. Paulus hais tas siab, hais nruj thiab puv npho txojkev hlub. Timthawj Paulus xav kom lawv yuav tsum hloov cwjpwm thiab kev ua, “lawv yuav tsum ua haujlwm yug lawv, lawv tsis txhob tos luag noj xwb.” “Yuav tsum ua” muaj lub ntsiab tias tsis txhob tab kaum lwm tus tes haujlwm, tsis txhob hais lus phem rau lwm tus, cia li nquag ua haujlwm yug tus kheej thiab tsis ua lub nra hnyav rau lwm tus. Cov uas ntseeg Vajtswv zoo,“tsis txhob dhuav ua tej haujlwm zoo”, txhais hais tias kub siab lug pab lwm tus ua haujlwm.
Hauv cov ntseeg Yexus hnub thaud thiab tamsim no, tsis muaj ntau los twb muaj tsawg cov neeg zoo ib yam li Pawg Ntseeg Thexalaunikes thaud. Muaj cov neeg tub nkeeg txawm yog muaj peev xwm ua haujlwm, los lawv los koom Pawg Ntseeg lub homphiaj tsuas yog vamkhom cov ntseeg lub siab zoo pab, cov neeg no nyiam hais phem cov neeg uas tsis pab lawv. Ib qhov uas txaus tu siab yog muaj qee tus txawm yog ua haujlwm los tseem siv sijhawm mus ntsia tus ub tus no, thiab muaj tej zaug peb kuj nyiam mloog thiab koom tes nrog lawv thuam, tham lwm lus tus thiab. Nov yog kev ua neej tsis haum tus Tswv siab. Timthawj Paulus ntuas tas siab rau Vajtswv cov menyuam yuav tsum nquag ua haujlwm, ua tib zoo mloog, hais, thiab tsis txhob dhuav ua tej haujlwm zoo.
Thov Vajtswv,
Vajtswv tus uas dawbhuv. Thov Koj pab kom nyuam yaus nquag ua haujlwm rau Koj. Thaum hnov tej lus tsis muaj qabhau, thov Koj pab kom nyuam yaus ntuas qhia tas siab tsis txhob yog thuam, hais phem. Nyuam yaus tuav Tswv Yexus lub npe thov, Amees.
Peb muaj tus cwjpwm zoo li cas rau cov neeg tub nkeeg, nyiam hais lwm tus?
Nyeem Vajluskub hauv peb lub xyoo: Yauhas 21
Kênh Youtube BHKTHN:
