Klei Aê Diê Blŭ: II Têsalônik 3:11-13
Êlan kliăng: “Hlăm Khua Yang Yêsu Krist hmei mtă leh anăn mtrŭt phung msĕ snăn, brei diñu êđăp ênang mă bruă diñu pô, čiăng bi mâo mnơ̆ng ƀơ̆ng huă diñu pô” (II Têsalônik 3:12)
Klei êmuh ksiêm mĭn: Klei alah srăng atăt kơ ya klei? Hlăm Anăn Khua Yang Yêsu Krist Khua ƀĭng kna Y‑Pôl mtă kơ phung alah si ngă srăng hdĭp? Ya klei hriăm drei mâo mơ̆ng klei Khua ƀĭng kna Y‑Pôl mtă hŏng klei sĭt suôr?
Khua ƀĭng kna Y‑Pôl lač ñu hmư̆ hlăm Phung Sang Aê Diê ti ƀuôn Têsalônik ngă klei “bi rŭng, amâo mă bruă ôh, ƀiădah hiu yăl dliê hơăi mang kơ bruă arăng” (êlan 11). Anei jing phung alah mă bruă ƀiădah tŭ klei Satan mčhur kyuanăn diñu kriăng leh anăn hur har yua jih hruê mmông diñu kơ bruă ngă hơăi mang msĕ si yăl dliê mčeh, blŭ êkŭt kơ arăng, “lưk hla duah hluăt”, gĭr bi mĭn ƀuh klei soh pô diñu bi êmut čiăng yăl dliê jhat, bi gun bruă phung ayŏng adei pô. Wăt tơdah amâo čŏng čiăng ôh amâodah hŏng klei čŏng čiăng, phung anei jing mnơ̆ng dôk bi gun kơ bruă Aê Diê. Khua Yang Yêsu mtă brei răng kơ klei ƀuah leh anăn phat kđi mnuih mkăn snei, “Si ngă ih ƀuh ƀruih hlăm ală ayŏng adei ih, ƀiădah amâo ƀuh ôh êda hlăm ală ih pô?” (Y‑Luk 6:41).
Ti anăp phung alah, bi gun mnuih mkăn mă bruă, hlăm Anăn Khua Yang Yêsu Krist lŏ sa blư̆ Khua ƀĭng kna Y‑Pôl “mtă leh anăn mtrŭt” digơ̆. Ñu mtô kơ digơ̆ hŏng klei jing sa čô gĭt gai klei hdĭp myang, leh anăn kwưh hŏng klei jing sa čô ayŏng hlăm gŏ sang klei đăo. Ñu bi êdah knuih sĭt suôr ƀiădah hŏng klei khăng snăk leh anăn bŏ hŏng klei khăp mơh. Khua ƀĭng kna Y‑Pôl čiăng phung anăn bi mlih klei diñu jing leh anăn mâo bruă mă hŏng klei klă, “brei diñu êđăp ênang mă bruă diñu pô, čiăng bi mâo mnơ̆ng ƀơ̆ng huă diñu pô.” “Brei diñu êđăp ênang” čiăng lač đăm lŏ yăl dliê mčeh, đăm lŏ blŭ êkŭt kơ arăng ôh, brei pioh mmông hur har mă bruă čiăng bi mâo mnơ̆ng ƀơ̆ng huă kơ diñu pô, amâo jing mnơ̆ng bi ktrŏ klei mĭn wăt mnơ̆ng mnuă kơ pô mkăn ôh. Bi phung ayŏng adei sĭt suôr hŏng Khua Yang, amâo êdu ai ôh ƀiădah “đăm êmăn ôh hlăm klei ngă jăk”, čiăng ăt hur har uêñ mĭn đru phung tuôm hŏng klei dleh dlan čiăng mă bruă ƀiădah amâo dưi ngă ôh.
Hlăm Phung Sang Aê Diê ênuk anei, ƀiă lu ăt msĕ mơh hŏng Phung Sang Aê Diê ti ƀuôn Têsalônik ênuk mphŭn dô. Mâo phung alah mă bruă wăt tơdah diñu dôk mâo ai mă bruă, mŭt hlăm Phung Sang Aê Diê knŏng čiăng mjhua klei jăk phung ayŏng amai adei, phung anei khăp blŭ jhat kơ hlei pô amâo đru ôh diñu. Ƀiădah lĕ, ăt ênguôt mơh, mâo đa đa mnuih wăt tơdah mâo bruă mă ƀiădah ăt pioh mmông kăp ksiêm leh pô anei truh kơ pô mkăn, leh anăn tăp năng wăt drei pô mơh khăp hmư̆ leh anăn hur har bi đru ƀuah, phat kđi leh anăn duah hiu yăl dliê amâo mĭn kơ klei soh djŏ ôh. Anăn jing knhuah hdĭp amâo bi mơak kơ Khua Yang ôh. Hŏng klei sĭt suôr Khua ƀĭng kna Y‑Pôl mtrŭt phung anak čô Aê Diê êđăp ênang mă bruă, răng kơ klei hmư̆ leh anăn blŭ, hur har leh anăn amâo êmăn ôh ngă klei jăk.
Si ngă knuih drei mâo hŏng phung alah, khăp mđing klei pô mkăn?
Wah lač: Ơ Aê Diê Pô Doh Jăk, brei bĕ kơ kâo ai tiê hur har mă bruă čiăng kâo dưi mă bruă kơ Ih. Tơdah hmư̆ klei arăng yăl dliê hơăi mang, đru kâo thâo mtô lač hŏng klei sĭt suôr, amâo djŏ đru bi ƀuah, bi blŭ jhat hdơ̆ng ayŏng adei ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Yôhan 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
