2Thexalaunikes 2:1-3a
Nqe cim:
“Txawm yog li cas los xij, nej tsis txhob cia leejtwg ntxias tau nej li.” (2Thexalaunikes 2:3a)
Lus nug rau sawvdaws xav:
– Cov ntseeg hauv Thexalaunikes tabtom ntsib yam kev dag ntxias twg?
– Timthawj Paulus ntuas cov ntseeg yuavtsum xyuamxim rau yam dabtsi?
– Peb yuav tsum ua dabtsi kom tsis raug cov xibhwb cuav ntxias?
Nyob rau hauv tshooj 1, tim thawj Paulus qhuas cov ntseeg Thexalaunikes hais tias, lawv ua lub neej muaj kev ntseeg thiab muaj kev hlub, lawv yeej loj hlob rau hauv txoj kev tsim txom. Tiamsis, hauv pawg ntseeg muaj qee tus neeg siv lub sijhawm uas cov ntseeg tabtom raug tsim txom los qhia hais tias, kev tsim txom yog lub cim qhia txog “ hnub Tswv Yexus los lawm”. Qhov uas qhia yuam kev ntawd ua rau coob leej txhawj ntshai vim lawv xav hais tias tabtom nyob hauv txoj kev txomnyem uas yog hnub tug Tswv rov los (1Thexalaunikes 5:1-3). Qhov txaus ntshai ntawm yam kev qhia no ua rau coob leej txhawj, tsis quav ntsej txog lub neej sab ntsujplig uas ib txwm ua lawm.
Tim thawj Paulus ntuas cov ntseeg Thexalaunikes yuavtsum xyuamxim thaum hais txog zaj uas Tswv Yexus rov qab los thiab qhov uas yuav tau mus nrog Nws nyob ua ke hais tias, “nej tsis txhob rawm poob siab lossis ntxhov siab rau qhov uas nej hnov hais tias, twb txog lub sijhawm uas Yexus los lawm. Tej zaum ntshai muaj qee leej qhia txog tej zaj uas yuav tshwm muaj los yav tom ntej rau nej lossis muaj qee leej qhia hais li ntawd lossis muaj qee leej hais tias yog peb sau li ntawd rau hauv peb tej ntawv uas peb xa tuaj rau nej los tsis paub” (nqe 1-2). Tim thawj Paulus txhawb cov ntseeg Thexalaunikes kom tsis txhob poob siab lossis ntxhov siab los ntawm cov neeg uas hais tias lawv tau Vajntsujplig qhia lawv, vim cov ntawd yog cov cev lus cuav, lawv siv lus qhia los dag ntxias cov ntseeg, thiab dag hais tias Paulus tej tsab ntawv sau li ntawd los txhawb lawv txojkev dag. Qhov ntawd ua rau pom hais tias, cov neeg dag ntxias ua yam ntse ntsuav nraim nkoos, lawv siv lub tswvyim uas muaj tim khawv tseeb los ntxias cov ntseeg. Vim li ntawd, tim thawj Paulus thiaj ceebtoom cov ntseeg hauv Thexalaunikes hais tias, “Txawm yog li cas los xij, nej tsis txhob cia leejtwg ntxias tau nej li” (nqe 3).
Vajtswv Txojlus ceebtoom rau txhua tiam dhau los txog cov cev lus cuav thiab cov xibhwb cuav uas niaj hnub nimno tseem muaj nyob rau hauv pawg ntseeg, pheej ntxias Vajtswv cov menyuam los ntawm ntau lub tswvyim nraim nkoos. Lawv siv txoj kev vammeej saum huab cua los mus qhia lawv zaj cuav tshwjxeeb yog hais txog hnub uas tus Tswv yuav rov qab los, ua rau pawg ntseeg poob siab, ntxhov siab thiab txhawj ntshai. Yog hais tias peb yog cov ntseeg tiag, nyob rau hauv qhov kaj ces peb cia li nyob tso siab plhuav. Txawm luag yuav siv lub tswvyim twg dag ntxias los txhob cia luag ntxias tau peb. Tsis muaj leejtwg paub sijhawm hnub uas tus Tswv rov qab los tiamsis Vajluskub qhia paub hais tias, txhua lub qhovmuag yuav pom hnub tus Tswv los zoo ib yam li thaum uas Nws mus saum ntuj (Tes Haujlwm 1:11). Cia li tsim los, rau siab nyeem thiab kawm Vajtswv Txojlus txhua hnub. Vajtswv Txojlus yuav ua qhov kaj rau peb pom kev kom zeem paub qhov twg yog tseeb thiab qhov twg yog cuav, rau qhov Vajluskub twb qhia tas txhua yam thiab muaj txaus tej uas Vajtswv xav qhia nyob hauv Vajluskub lawm.
Thov Vajtswv:
Vajtswv tus uas yog qhov tseeb, thov pab nyuam yaus rau siab nyeem kawm thiab xav txog Koj Txojlus txhua hnub, nyuam yaus paub koj Txojlus tseeb los ua lub neej li Koj Txojlus qhia. Kom zeem paub cov cev lus cuav, cov xibhwb cuav tej lus qhia thiaj tsis mloog raws. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas rau siab nyeem, kawm thiab xav txog Vajtswv Txojlus lawm tau?
Nyeem Vajluskub hauv peb lub xyoos: Teev Npe 33
Kênh Youtube BHKTHN:
