Pajlug 21:4; Filipis 2:5-11
Nqe cim:
“Lub qhovmuag uas qaujles thiab lub siab uas khavtheeb, yog kev txhaum” (Pajlug 21:4)
Lub qhov muag khavtheeb thiab lub siab muab hlob, uas yog cov neeg limhiam lub teeb mas puavleej txhaum (Pajlug 21:4 HMOWSV)
Lus nug rau sawvdaws xav:
– Lub ntsiab ntawm nqe Pajlug no yog dabtsi?
– Tswv Yexus tau ua qauv ntawm kev txo hwjchim li cas?
– Koj xyaum txo hwjchim raws tus Tswv licas lawm?
Kev khavtheeb txawm nyob hauv siab, hauv kev xav, lossis tes haujlwm tawm sab nraud yeej yog kev txhaum huvsi. Lolus “lub qhov muag qaujles” koom tib lub ntsiab nrog lo lus “tsa qhov muag saib” lossis “lub qhov muag thab plaub”, lub ntsiab yog khav tias yus zoo dua thiab saib tsis taus lwm tus. Tus cwjpwm zoo li no qhia tshwm nws txojkev khavtheeb. Lolus txuas ntxiv “lub siab uas khavtheeb” yog hais txog tus neeg uas tsuas pom yus qhov thiaj yog xwb tsis yuav lwm tus tej lus li, tsis kam txo hwjchim, tsis kam mloog lwm tus tej lus thiab tsis muaj hnub pom yus qhov txhaum. Tus neeg khavtheeb ua nws tes haujlwm zoo yam li nws yog tus muaj cai tshaj txhua tus huvsi. Lolus kawg “cov neeg limhiam lub teeb” yog cov neeg phem txojkev khavtheeb. Cov neeg phem yeej tsis kam lees tias yus yog neeg phem, tsuas khav tias yus yog lub teeb ci rau sawvdaws pom kev, cov neeg phem xav tias lawv muaj cai txiav txim qhov twg yog thiab qhov twg txhaum. Tus neeg phem kuj khav tias lawv txojkev thiaj zoo, thiaj tseeb (Pajlug 21:2), lawv tsis quav ntsej txog Vajtswv tej lus li. Lawv lubneej yav tom ntej tsaus ntuj nti, lawv lub teeb yuav tuag mus (Pajlug 24:20), vim li ntawd tus Tswv ntxub lub qhov muag uas khavtheeb heev (Pajlug 6:16-17).
Tus cev lus Yaxayas hais txog Vajtswv kev rau txim rau cov neeg khavtheeb hnub txiav txim: “Hnub ntawd cov neeg khavtheeb yuav raug txo hwjchim, thiab thaum ntawd cov neeg siab heev yuav raug kev puastsuaj. Ces Vajtswv tib leeg xwb thiaj yog tus zoo tshaj plaws ” (Yaxayas 2:11). Tibneeg yog Vajtswv tsim, tsimnyog yuav tsum los pehawm Vajtswv, tiamsis lawv rov los qhuas lawv lub koob npe, kev txawjntse thiab txhua yam uas lawv muaj. Thaum ib tug neeg twg ua neej khavtheeb, nws yeej tsis paub hwm Vajtswv li lawm. Vajtswv suav tias kev khavtheeb yog ib txojkev phem, yog yam uas Vajtswv ntxub heev (Pajlug 8:13).
Niaj hnub nimno, muaj ntau leej ua txuj li yog neeg txo hwjchim kom npog tau lwm tus, tiamsis lawv lub siab khavtheeb kawg nkaus, lawv txojkev xav puv nkaus kev khavtheeb, tsis paub ntshai Vajtswv li lawm. Lawv dag tau lwm tus tiamsis npog tsis tau Vajtswv. Txawm yuav txawjntse npaum twg, los tus neeg khavtheev yeej yuav raug thawb mus poob rau hauv lub qhov kev txhaum thiab tsis muaj leejtwg xav txav mus ze lawv li.
Timthawj Paulus hais tias: “Nej tsis txhob ua ib yam dabtsi kom zoo rau nej lossis kom neeg qhuas nej xwb; tiamsis nej yuav tsum txo hwjchim thiab ib tug tsis txhob khav hais tias ib tug zoo dua ib tug” (Filipis 2:3). Tswv Yexus yog Vajtswv ntag tiamsis Nws tau ua qauv: “Nws txo hwjchim thiab niaj hnub ua raws li Vajtswv lub siab nyiam, txawm yog neeg muab Nws ntsia rau saum ntoo khaublig los Nws tseem mloog Vajtswv lus” (Filipis 2:8). Thov Vajtswv pab kom peb txhua tus ua neej paub ntshai Vajtswv thiab txo hwjchim raws li Tswv Yexus tus qauv.
Thov Vajtswv
Vajtswv, thov Koj zam txim rau nyuam yaus uas ntau zaug nyuam yaus tau khavtheeb rau tej uas Koj pub rau nyuam yaus. Thov pab kom nyuam yaus ua neej paub ntshai Koj hauv kev xav thiab tes haujlwm, ua neej txo hwjchim raws li Tswv Yexus tus qauv. Nyuam yaus tuav Tswv Yexus Khetos lub npe thov, Amees.
Puas muaj tej kev khavtheeb khavtxiv twg uas peb cheem tsum Vajtswv muab tshem tawm mus?
Nyeem Vajkuskub hauv peb lub xyoo: Chivkeeb 28
Kênh Youtube BHKTHN:
