Klei Aê Diê Blŭ: Klei Bi Hriêng 21:4; Philip 2:5-11
Êlan kliăng: “Ală dlăng krưh leh anăn ai tiê mgao, pui kđen pô ƀai — jih jang anăn jing soh!” (Klei Bi Hriêng 21:4)
Klei êmuh ksiêm mĭn: Si mblang dŭm boh blŭ hlăm êlan Klei Bi Hriêng anei? Si Khua Yang Yêsu bi hmô kơ klei luă gŭ? Si diih tui hlue Khua Yang hdĭp luă gŭ?
Klei mgao wăt tơdah dôk hlăm lam ai tiê, hlăm klei mĭn, amâodah bi êdah hlăm bruă ngă, ăt jing klei soh sơăi. Boh blŭ “Ală dlăng krưh” jing “kngưr ală dlăng kơ dlông” amâodah “ală mta ktưn hưn”, čiăng lač kơ pô kơ dlông hĭn leh anăn dlăng kơ phung mkăn hơăi mang. Knuih anei brei ƀuh anei jing phung bŏ hŏng klei mgao. Boh blŭ êdei anăn jing “ai tiê mgao” lač kơ mnuih lač nanao pô jing djŏ anăn amâo uêñ kơ klei blŭ phung mkăn, amâo bi ti gŭ pô amâo mđing hmư̆ leh anăn amâo thâo ƀuh ôh klei soh pô. Phung mgao ngă msĕ si pô mâo klei dưi hlăm jih jang mnuih. Boh blŭ knhal tuč jing “pui kđen pô ƀai “bi êdah klei bi mguôp amâo jăk mơ̆ng knuih mgao hŏng klei soh. Phung ƀai knŏng ktưn hưn, lač pô mâo pui mngač atăt êlan, phung ƀai bi mĭn pô dưi phat kđi ya klei jing djŏ, klei jing soh. Phung ƀai ăt lač klei pô bi mklă jing djŏ, êlan diñu nao jing djŏ (Klei Bi Hriêng 21:2), snăn amâo mđing ôh kơ Klei Yêhôwa mtô. Boh jhat mơ̆ng phung ƀai srăng jing sa hruê êdei anăp mmăt tĭt, leh anăn pui diñu srăng djiê (Klei Bi Hriêng 24:20), kyua Yêhôwa bi êmut kơ ală dlăng hŏng klei krưh anăn (Klei Bi Hriêng 6:16-17).
Klei Aê Diê Blŭ hưn hŏng khua pô hưn êlâo Y-Êsai kơ klei phat kđi phung mgao hlăm hruê knhal tuč: “Ală mnuih krưh arăng srăng mdlưh leh anăn arăng srăng bi luă gŭ phung mgao. Knŏng hjăn Yêhôwa srăng mâo klei bi mđĭ hlăm hruê anăn” (Y-Êsai 2:11). Anak mnuih jing mnơ̆ng Aê Diê hrih mjing, hrô kơ mpŭ kơ Aê Diê jing Pô Hrih Mjing, diñu mpŭ kơ klei hing ang, klei thâo amâodah ngăn drăp pô. Tơdah sa čô mnuih hdĭp mgao, pô anăn amâo lŏ huĭ mpŭ kơ Aê Diê ôh. Hŏng Aê Diê, klei mgao jing klei soh, jing klei Aê Diê bi êmut kheh (Klei Bi Hriêng 8:13).
Mâo lu mnuih hruê anei bi êdah klei luă gŭ kñăm mplư phung mkăn, ƀiădah hlăm ai tiê diñu bŏ hŏng klei mgao, klei mĭn diñu bŏ hŏng klei mgao, mđĭ pô, amâo lŏ thâo huĭ mpŭ kơ Aê Diê ôh. Diñu dưi bi mplư hdơ̆ng pô ƀiădah amâo dưi mdăp ôh hŏng Aê Diê. Wăt tơdah thâo mbruă dưn mơh, knhal tuč phung mgao ăt srăng lĕ hlăm ƀăng êlam klei soh leh anăn phung mkăn srăng ƀrư̆ ƀrư̆ ñĕ đuĕ.
Khua ƀĭng kna Y-Pôl mtô leh, “Đăm ngă ôh sa mta klei hŏng klei mĭn kơ pô amâodah hŏng klei mgao, ƀiădah hŏng klei luă gŭ brei diih yap phung mkăn jing prŏng hĭn kơ diih pô” (Philip 2:3). Khua Yang Yêsu jing Aê Diê ƀiădah Ñu ăt bi hmô leh: “Leh Ñu jing sa čô mnuih, Ñu bi luă gŭ Ñu pô, leh anăn gưt asăp tơl djiê, wăt klei djiê ti kyâo bi kal” (Philip 2:8). Akâo kơ Ih đru grăp čô drei huĭ mpŭ nanao kơ Aê Diê mơ̆ng knuih hdĭp luă gŭ hlue si klei Khua Yang Yêsu bi hmô.
Mâo ya klei čŏng mđĭ pô, mgao hlăm drei čiăng akâo kơ Khua Yang lăm brei hruê anei?
Wah lač: Ơ Khua Yang, akâo kơ Ih pap brei kơ kâo kyua mâo lu blư̆ kâo jing mgao kơ klei Aê Diê brei kơ kâo. Akâo kơ Ih đru kâo huĭ mpŭ kơ Ih mơ̆ng hlăm lam klei mĭn truh kơ bruă ngă čiăng kâo hdĭp luă gŭ êbat tui hlue klei Ih bi hmô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
