Klei Aê Diê Blŭ: Klei Mtô Mñă Klei Bhiăn 7:6-11
Êlan kliăng: “Amâo djŏ ôh kyuadah diih jing lu hĭn kơ phung ƀuôn sang mkăn Yêhôwa khăp kơ diih leh anăn ruah diih leh, ƀiădah kyuadah diih jing ƀiă hĭn kơ jih jang phung ƀuôn sang mkăn;” (Klei Mtô Mñă Klei Bhiăn 7:7).
Klei êmuh ksiêm mĭn: Ya jing phŭn knhal kơ klei Aê Diê ruah phung ƀuôn sang Israel brei jing phung ƀuôn sang pioh hjăn kơ Ñu? Ya mta klei brei ƀuh kơ klei Aê Diê ruah phung ƀuôn sang Israel amâo mâo mlih hlue si hruê mmông ôh? Si knhuah hdĭp brei drei bi mâo hĕ tơdah thâo kơ klei Aê Diê ruah leh drei êlâo kơ klei hrih lăn ala?
Hlăm trăn Klei Aê Diê Blŭ anei, Y-Môis hưn mdah kơ mta čuăn phung ƀuôn sang Israel dưi jing sa phung ƀuôn sang doh jăk kơ Yêhôwa Aê Diê. Y-Môis kñăm sĭt hŏng jih jang phung ƀuôn sang Israel, Aê Diê ruah leh diñu mjing sa phung ƀuôn sang pioh knŏng hjăn kơ Ñu. Anei jing sa mta klei čŏng čiăng, čiăng kơ phung ƀuôn sang Israel jing ngăn dưn sĭt êmĭt yap jing dŏ Aê Diê (êlan 6b). Tơdah čô čĕ phung ƀuôn sang Israel êmuh amĭ ama diñu, ya ngă Aê Diê ruah phung ƀuôn sang diñu ƀiădah amâo ruah ôh phung ƀuôn sang mkăn, snăn klei wĭt lač diñu mă tŭ anăn jing kyuadah Yêhôwa Aê Diê khăp kơ phung ƀuôn sang Israel. Mta klei ngă kơ drei dlưh ai hơ̆k êdi, anăn jing Aê Diê ruah phung ƀuôn sang Israel amâo djŏ ôh kyua diñu mâo lu klei jăk kdlưn hĭn, ƀiădah knŏng kyua klei khăp tloh ênoh amâo mâo hnơ̆ng čuăn Aê Diê pioh kơ diñu.
Sa mta klei yuôm hĭn dơ̆ng, anăn jing klei rơ̆ng kơ klei Aê Diê ruah phung ƀuôn sang Israel, bi êdah hlăm boh blŭ: “djă pioh klei ƀuăn Ñu kat asei leh kơ phung aê đưm diih”, “Aê Diê sĭt suôr”, “djă pioh klei Ñu bi mguôp leh anăn klei pap kơ phung khăp kơ Ñu leh anăn djă pioh klei Ñu mtă, kơ sa êbâo ênuk,” (êlan 8-9). Mta klei anei kñăm sĭt kơ Aê Diê diñu kkuh mpŭ jing Pô kjăp phĭt, năng knang leh anăn amâo tuôm mlih ôh. Kyuanăn klei Aê Diê ruah phung ƀuôn sang Israel ăt kăn bi mlih hlue si hrue mmông rei. Bruă Aê Diê ruah phung ƀuôn sang Israel mjing sa ƀuôn sang pioh hjăn kơ Ñu jing bruă klei pap yuôm bhăn êdimima.
Ară anei, jih jang hlei pô mâo klei lŏ kkiêng mrâo kyua klei đăo hlăm Khua Yang Yêsu Pô Bi Mtlaih, jing phung Ñu ruah leh hlăm Krist êlâo kơ klei hrih lăn ala (Êphêsô 1:4). Snăn yơh klei bi mtlaih anei truh kơ drei amâo djŏ kyua bruă kpă drei ngă leh ôh, kăn djŏ kyua mkăm pioh bruă jăk drei ngă leh rei, ƀiădah kyua tui si klei Ñu pô pap (Y-Tit 3:5). Blŭ mdê, bruă Aê Diê ruah drei brei jing phung anak ƀuôn sang pioh hjăn kơ Ñu ti krah lăn ala soh jhat anei, kluôm dhuôm amâo kbiă hriê mơ̆ng klei gĭr ktĭr amâodah bruă ngă jăk pô ôh, ƀiădah kluôm dhuôm kbiă hriê mơ̆ng klei khăp tloh ênoh leh anăn klei pap prŏng amâo mâo knhal Aê Diê pioh kơ grăp čô drei. Snăn yơh amâo mâo phŭn knhal ôh kơ klei drei myưng mơang amâodah ngă mgao kơ klei Aê Diê ruah leh drei. Klăk wĭt, brei drei dôk hdĭp hŏng ai tiê klei mĭn luă gŭ, sŭk suôr hŏng klei khăp Aê Diê pioh leh kơ drei čiăng dôk hdĭp grăp hruê năng hŏng klei khăp leh anăn klei pap amâo mâo hnơ̆ng čuăn mơ̆ng Aê Diê.
Tơdah thâo săng leh phŭn knhal sĭt kơ klei Aê Diê ruah drei, ya mta klei diih čiăng blŭ hŏng Khua Yang leh anăn si klei diih ƀuăn rơ̆ng hŏng Ñu?
Ơ Khua Yang, bi mni lač jăk kơ Ih kyua klei khăp prŏng prĭn Ih ruah leh kâo, sa čô mnuih amâo mâo năng kơ Ih ôh. Akâo kơ Ih brei kâo kđăm pioh nanao klei khăp klei pap Ih leh anăn dôk hdĭp năng hŏng jih klei anăn.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 5
Kênh Youtube BHKTHN:
