Yêhôwa Bi Mtlaih Mnuih Kpă Ênô – 18/4/2021

1100

 

Klei Aê Diê Blŭ: Klei Bi Hriêng 11: 6-8.

Êlan kliăng:

“Tơdah phung kpă ur kwưh klei đru, Yêhôwa hmư̆, leh anăn bi mtlaih digơ̆ mơ̆ng jih jang klei knap mñai.” (Klei Muiñ hđăp 34:17).

Klei êmuh ksiêm mĭn: Si ngă klei mdê mtao Y-Salômôn lač kơ klei tŭ mơ̆ng phung kpă ênô leh anăn phung jhat ƀai? Ya ngă phung knă ênô tuôm hŏng klei truh? Ya klei hriăm drei mâo tơdah tuôm hŏng klei truh, klei lông dlăng?

Mtao Y-Salômôn bi hriăm anak čô hdĭp hlăm klei kpă ênô hlăm djăp boh klei. Ñu bi hriăm anak čô hdĭp kpă ênô amâo djŏ knŏng jing klei bhiăn mơ̆ng Aê Diê đuč ôh, ƀiădah ñu lơ lač kơ klei ñu thâo kơ klei jăk mơak dưi mâo tơdah hdĭp kpă ênô. Ti nei, Mtao Y-Salômôn brei ƀuh klei truh srăng mâo hŏng grăp čô mnuih, ƀiădah phung hdĭp kpă ênô srăng mâo Aê Diê bi mtlaih, bi phung măk ƀai srăng tŭ klei bi kmhal mơ̆ng bruă ƀai pô ngă. Phung kpă ênô dưi bi mtlaih hlăm dua mta: Tal sa, jing dŭm bruă ngă kpă ênô mơ̆ng digơ̆ srăng bi mtlaih digơ̆ (êlan 6), leh anăn tal dua, Yêhôwa srăng bi mtlaih digơ̆ mơ̆ng klei jhat (êlan 8). Klei tŭ mơ̆ng mnuih wê snăn mklăk hŏng anăn, diñu srăng djŏ ƀưi klei tluh diñu pô (êlan 6), klei čang hmăng mơ̆ng diñu luč rai (êlan 7), leh anăn tŭ klei rŭng răng mơ̆ng diñu čiăng ngă jhat kơ mnuih kpă ênô (êlan 8).

Khua Yang Yêsu lač leh êlâo kơ klei bi nač mơ̆ng anak mnuih hŏng anak Aê Diê hlăm Y-Yôhan 15: 18-27, leh anăn tơdah dlăng hlăm Bruă Phung Khua Ƀĭng Kna, drei ăt ƀuh klă klei truh, klei lông dlăng lu mta phung mă bruă kơ Khua Yang srăng tuôm. Phung đaŏ tăp năng lŏ tuôm hŏng klei dleh dlan lu hĭn kơ phung amâo đaŏ. Drei khăng tŭ lu klei amâo jăk hlăm klei hdĭp ti lăn ala kyua msĕ si lu mnuih lač leh “kpă ênô khăng tŭ lu klei amâo myun” leh anăn đaŏ knang kơ Khua Yang anăn drei khăng tŭ yang ƀuôn, ƀĭng găp, gŏ sang bi êmut (Y-Yôhan 15:19).

Klei Aê Diê Blŭ ti nei mđĭ ai drei lu snăk, kyua tơdah phung đaŏ hdĭp thâo bi khăp, hơ̆k mơak, êđăp ênang, thâo gĭr, sĭt suôr, êdu êun, djŏ hnơ̆ng, snăn klă knuih hdĭp anăn srăng đru drei tlaih mơ̆ng klei yang jhat mplư. Klei yuôm bhăn hĭn jing, Khua Yang yua klei truh čiăng mjing klei tŭ dưn kơ phung đaŏ kơ Ñu (Rôm 8:28). Khua Yang brei mâo klei truh hŏng hlei pô đaŏ kơ Ñu, ƀiădah “Tơdah phung kpă ur kwưh klei đru, Yêhôwa hmư̆, leh anăn bi mtlaih digơ̆ mơ̆ng jih jang klei knap mñai” (Klei Muiñ Hđăp 34:17). Brei drei đaŏ knang klei čang hmăng mơ̆ng phung wê srăng luč rai, ƀiădah klei čang hmăng mơ̆ng phung kpă ênô srăng bi mtlaih, êđăp ênang, jăk mơak. Akâo kơ Khua Yang đru drei thâo gĭr, jih ai tiê akâo kơ Khua Yang leh anăn hơĭt ai tiê hdĭp kpă ênô hlăm djăp klei mâo.

Di ih mprăp leh mơ̆ ai tiê hdĭp kpă ênô tui si Klei Aê Diê Blŭ?

Ơ Khua Yang, kâo bi mni lač jăk kơ Ih kyua Ih bi mtlaih leh kâo mơ̆ng klei jhat. Akâo kơ Ih pap brei kơ kâo kyua tăp năng kâo bi ênguôt leh anăn êdu ai sĭt tŭ klei amâo jăk amâo dah tuôm hŏng lu klei truh kyua hdĭp tui si Klei Aê Diê Blŭ. Akâo kơ Khua Yang đru kâo đaŏ knang hlăm klei bi mtlaih mơ̆ng Khua Yang leh anăn hdĭp hlăm klei đaŏ knang leh anăn thâo bi khăp.

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm

Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com

Kênh Youtube BHKTHN:

https://www.youtube.com/channel/UCaSY8ebjVfMKhPups5jZ9yw

Bài trướcĐức Giê-hô-va Giải Cứu Người Công Bình – 18/4/2021
Bài tiếp theoTrung Tín Truyền Rao Lời Chúa – 19/4/2021