1 Timautes 6:11-16
Nqe cim:
“Tiamsis koj yog Vajtswv tus neeg lawm, koj tsis txhob ua tej uas hais tas los no. Koj yuav tsum ua ncaj ua ncees, ua zoo, muab siab rau ntseeg, muaj kev hlub, ua siab ntev thiab muaj lub siab mos siab muag” (1 Timautes 6:11)
Lus nug xav:
– Timthawj Paulus ntuas xibhwb Timautes dhau los ntawm tej lus samhwm twg kom zam dhau txojkev ntshaw nyiaj?
– Ua cas muaj ntau lub npe hu sib txawv rau Vajtswv hauv Paulus tej lus ntuas?
– Yuav ua li cas kom peb tsis caum nyiaj txiag tiamsis siv zog xyaum ua neej haum Vajtswv siab?
Hauv tshooj kawg xaus tsab ntawv xa mus rau xibhwb Timautes, timthawj Paulus qhia rau nws tus tub ntawm sab ntsujplig pom muaj ob hom neeg ua Vajtswv haujlwm: Hom neeg ua Vajtswv haujlwm “ntshaw nyiaj” (1 Timautes 6:6-10), thiab hom neeg ua Vajtswv haujlwm uas “siv zog ua neej haum Vajtswv siab” vim kev ntseeg, thiab ua neej zoo (nqe 11-12). Tso yam tsis zoo tseg ces tsis tau txaus yog tsis muab qhov uas muab siab rau ntseeg hloov rau, ces peb yuav yoojyim rov mus nrhiav lwm yam tsis zoo ntxiv, tej thaum tseem yog yam phem dua los hloov chaw. Vim li ntawd, timthawj Paulus nqua hu xibhwb hluas Timautes los ntawm ob lolus samhwm “yuav tsum” thiab lolus samhwm “ua raws”. Yuav tsum nrhiav thiab caum “ua ncaj ua ncees, ua zoo, muab siab rau ntseeg, muaj kev hlub, ua siab ntev thiab muaj lub siab mos siab muag” (nqe 11); “…Koj yuav tsum siv zog khiav kom kawg koj lub zog, koj thiaj li tau txojsia uas ntev mus ibtxhis ” (nqe 12). “Kuv hais kom koj ua raws li tej lus ntawd thiab muab siab npuab tus Tswv mus txog hnub uas tus Tswv Yexus Khetos rov qab los” (nqe 14). “Siv zog khiav” lub ntsiab yog siv zog txeeb tiag, siv zog kom kovyeej. Sau zog lub ntsiab, yog siv zog khiav vim kev ntseeg thiab siv zog xyaum ua neej haum Vajtswv siab dhau los ntawm tus cwjpwm sab hauv hloov thiab ceev Vajtswv Txoj kevcai sab nraud los hloov tej kev caum kev muaj txiag npluanuj chaw.
Hauv tej lus ntuas ntawd muaj ntau lub npe txog Vajtswv. “Vajtswv tus uas pub txojsia rau ib puas tsav yam”, “Yexus Khetos tus uas muaj txojkev ntseeg sawv khov kho ntawm Pooti-us Philaj lub xubntiag”, “Tus Tswv Yexus yuav los raws li lub sijhawm uas Vajtswv teem cia lawm”, “Vajtswv yog tus foom koob hmoov”, “yog tus kav ib puas tsav yam” “Vajntxwv ntawm txhua tus vajntxwv”, “tus Tswv ntawm txhua tus tswv”, “Vajtswv tib leeg yog tus uas tsis txawj tuag; nws nyob hauv qhov pom kev uas tsis muaj leejtwg yuav txav tau mus ti. Tsis tau muaj leejtwg pom dua nws thiab tsis muaj leejtwg yuav pom tau nws li. Nws yog tus uas tsimnyog hwm thiab muaj hwjchim nyob mus ibtxhis! Amees” (nqe 13-16). Xyaum ua lub neej haum Vajtswv siab, muab siab rau ntseeg thiab zeem paub hais tias Vajtswv yog tus muaj hwjchim tswj rawv txhua yam tabpov ruaj khov rau peb heev dua li tej khoom nyiaj txiag txojkev tabpov.
Tig saib yus los ntawm tej yam uas timthawj Paulus ntuas xibhwb hluas Timautes xyaum ua, peb txhua tus yuav tsum ua tib zoo tshuaj xyuas yus, kho yam uas peb tseem ua tsis tau zoo. Thiab kuj Xyaum ua lub neej haum Vajtswv siab thiab muab siab rau ntseeg dhau los ntawm kev kawm paub Vajtswv ntau dua, kom peb ntseeg ruaj rau ntawm Vajtswv, tus uas tuav peb lub neej yav tom ntej no, ntawd yog lub zog uas pab peb tsis caum tej kev muaj txiag npluanuj, tiamsis siv zog xyaum ua lub neej haum Vajtswv siab, ua ib tug tub rog ncaj ncees. Thov Vajtswv pab kom peb hais rau Vajtswv li timthawj Paulus hais tias: “Thov kom Nws tau txais koobmeej thiab muaj hwjchim mus tag ibtxhiab ibtxhis! Amees.” (nqe 16 MWW2022).
Thov Vajtswv,
Vajtswv tus uas foom koob hmoov, tus kav ib puas tsav yam, thiab yog tus Vajntxwv ntawm txhua tus vajntxwv thiab yog tus Tswv ntawm txhua tus tswv. Thov pab nyuam yaus tsis caum kevmuaj txiag npluanuj tiamsis siv zog xyaum ua neej haum Koj siab thiab muab siab rau ntseeg. Nyuam yaus tuav Tswv Yexus Khetos lub npe thov, Amees.
Hnub no, peb coglus dabtsi rau Vajtswv?
Nyeem Vajluskub hauv peb lub xyoos: Exalas 8
Kênh Youtube BHKTHN:
