Klei Aê Diê Blŭ: Klei Mmuñ Hđăp 100:5
Êlan kliăng: “Kyuadah Yêhôwa jing jăk, klei khăp Ñu dôk hlŏng lar, leh anăn klei sĭt suôr Ñu ăt dôk hlăm jih jang ênuk.” (Klei Mmuñ Hđăp 100:5)
Klei êmuh ksiêm mĭn: Ya ngă brei “jih jang lăn ala” ur hơ̆k, mpŭ mni, mmuñ bi mni, leh anăn hdơr knga bi mni kơ Aê Diê? Klei Mmuñ Hđăp 100:5 brei ƀuh ya phŭn knhal kơ klei hdơr knga bi mni? Drei dôk hdơr knga bi mni kơ Aê Diê kyua ya mta klei?
Si dưi yap jih klei jăk jĭn Aê Diê brei kơ drei. Khua ƀĭng kna Y‑Pôl lač leh snei: “Bi mni kơ Aê Diê kyua mnơ̆ng Ñu brei arăng amâo dưi mblang ôh.” (II Kôrantô 9:15). Klei Mmuñ Hđăp 100:5 brei ƀuh kdlưn hĭn kơ klei jăk jĭn Aê Diê brei, drei kkuh mpŭ, mmuñ bi mni, mpŭ mni, leh anăn hdơr knga bi mni kơ Aê Diê êlâo hĭn kyua kơ Ñu Pô.
Tal sa, kyuadah Aê Diê jing jăk. Klei jăk Aê Diê bi êdah hŏng klei Ñu hrih mjing jih jang mnơ̆ng (Klei Mphŭn Dơ̆ng 1:10, 12, 18, 21, 25, 31). Klei jăk Aê Diê bi êdah wăt knuih jăk Ñu hŏng klei bhiăn Ñu brei kơ anak mnuih (Rôm 7:12). Leh anăn klei jăk Ñu bi êdah wăt hlăm klei mĭn Ñu pioh brei kơ drei (Y‑Yêrêmi 29:11; Rôm 12:2). Kdlưn hĭn kơnăn, klei bi mtlaih Aê Diê brei kơ mnuih soh hŏng klei Khua Yang Yêsu djiê, pia Klei Mrâo Mrang Jăk, mblang jing “klei mrâo mrang jăk mơak”.
Tal dua, kyuadah Aê Diê jing klei jăk. Klei jăk hlăm klei blŭ Hêbrơ jing klei mklin mguôp mâo mbĭt klei khăp, klei jăk yâo, klei pap, klei răng kriê khăp hơiêng. Klei jăk bi êdah klei khăp tui si klei bi mguôp Aê Diê pioh brei kơ phung ƀuôn sang Ñu – sa klei jăk sĭt êmĭt, klei khăp, tui duah amâo tuôm mdei kdlưn hĭn kơ klei diñu dưi lŏ tla wĭt. Leh anăn jing klei jăk mơak êdi, kyua klei jăk Aê Diê ngă hŏng drei “dôk hlŏng lar”, amâo mjưh, amâo mlih.
Tal tlâo, kyuadah Aê Diê jing sĭt suôr. Klei hdĭp anak mnuih jing suăi ênguăi leh anăn rŭng răng kyua klei bi mlih hlăm bruă knuă, asei mlei, leh anăn boh nik klei bi mlih ai tiê mnuih. Ƀiădah Aê Diê Pô năng kơ drei kkuh mpŭ leh anăn hdơr knga bi mni amâo tuôm mlih ôh leh anăn “klei sĭt suôr Ñu ăt dôk hlăm jih jang ênuk”. Klei khăp Ñu pioh kơ drei amâo mâo mlih leh anăn amâo hlue tui si klei drei bi wĭt kơ Ñu ôh, leh anăn klei Aê Diê ƀuăn dôk kjăp leh anăn srăng bi sĭt (Klei Mmuñ Hđăp 89:33-34; Y‑Êsai 54:10; Philip 1:6).
Lu phung đăo dôk hdĭp thu krô leh anăn ƀun ƀin hlăm klei hdĭp mngăt myang kyuadah hmang kơ tui duah klei jăk mơak tui si kđeh ƀiădah amâo ƀuh ôh klei pap, klei jăk jĭn prŏng prĭn êjai dưi kkuh mpŭ kơ Aê Diê klei khăp, klei jăk, leh anăn sĭt suôr. Knuih Aê Diê yơh jing phŭn knhal kơ klei drei myơr klei hdơr knga bi mni kơ Ñu. Bơ bĕ drei mđrăm mbĭt hŏng khua pô hưn êlâo Y‑Habakuk, wăt tơdah amâo mâo mă tŭ ôh sa klei jăk jĭn hlăm kđeh dưn, ăt ñu lač, “ăt kâo srăng hơ̆k hlăm Yêhôwa, kâo srăng mơak hlăm Aê Diê pô bi mtlaih kâo” (Y‑Habakuk 3:18).
Si ngă drei thâo kral mơ̆ klei pap leh anăn klei jăk jĭn prŏng prĭn êjai dưi kkuh mpŭ kơ Aê Diê?
Wah lač: Ơ Khua Yang, kâo hdơr knga bi mni kơ Ih kyua brei kâo dưi jing anak Ih, dưi kkuh mpŭ leh anăn mă bruă kơ Ih, Pô jăk, Pô khăp leh anăn sĭt suôr. Bi mni kơ Khua Yang kyuadah mâo Ih jing kâo mâo leh jih jang mnơ̆ng.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 2:13-38
Kênh Youtube BHKTHN:
