Klei Aê Diê Blŭ: Philip 3:4-11
Êlan kliăng: “Kyua Ñu kâo luč leh jih jang mnơ̆ng, leh anăn kâo yap mnơ̆ng anăn msĕ si djah, čiăng kơ kâo dưi mâo Krist” (Philip 3:8b)
Klei êmuh ksiêm mĭn: Khua ƀĭng kna Y‑Pôl amâo dlăng ya mta jing tui si kđeh jing “mâo”, ƀiădah ñu dlăng ya klei jing “mâo”? Ya ngă mâo klei anăn kơh klă sĭt jing “mâo”? Thŭn mrâo ya klei drei čiăng “mâo”?
Tơdah phung mgưt khăt klĭt dlăng ya klei tui si kđeh jing mta čiăng ktưn hưn leh anăn hưn kơ pô, snăn Khua ƀĭng kna Y‑Pôl “yap mnơ̆ng anăn msĕ si djah” (êlan 8). Dlăng msĕ si “djah” jing amâo dlăng yuôm ôh, amâo dlăng ñu jing klei mđing tal êlâo gai klei mĭn amâodah mta kñăm gai bruă drei ngă, amâo dlăng ôh ñu jing mta bi mklă mâo amâodah luč hlăm klei hdĭp. Hrô kơ klei anăn, ñu lač “Kyua Ñu kâo luč leh jih jang mnơ̆ng” hŏng hdră kñăm jing čiăng mâo Yang Krist, dưi dôk hlăm Ñu, dưi mâo klei kpă ênô, dưi thâo kral Ñu, thâo klei myang mơ̆ng klei Ñu kbiă lŏ hdĭp, leh anăn dưi tŭ klei knap mñai mbĭt hŏng Ñu (êlan 8-10). Bi mlih hŏng ya klei phung mkăn dlăng jing ênoh yuôm čiăng ruah klei pap dưi jing anak Khua Yang, čiăng dưi bi mguôp hŏng Khua Yang nanao, dưi jing doh jăk ti anăp Khua Yang, dưi thâo klei Ñu dưi leh anăn dưi tŭ klei knap mñai mbĭt hŏng Ñu, jing klei grăp čô đăo čang hmăng soăi.
Hlăk đưm, êkei êdam hlăk ai mâo kơhưm leh anăn mdrŏng nao kơ Khua Yang Yêsu hŏng klei êmuh “djŏ”, ƀiădah leh Khua Yang brei kơ ñu sa klei brei ruah jing čhĭ jih ngăn drăp ba đru kơ phung ƀun čiăng bi mlih klei hdĭp mơ̆ng sa čô ƀĭng kna, ñu lŏ ruah “soh” jing lŏ djă pioh ngăn drăp (Y‑Markôs 10:17-22). Leh anăn, Khua Yang Yêsu mblang hŏng phung khua ƀĭng kna amâo mâo ôh pô kyua Ñu “lui” pưk sang, ayŏng amai adei, lŏ hma…hlue si klei Khua ƀĭng kna Y‑Pôl lač jing “yap mnơ̆ng anăn msĕ si djah” – snăn mâo “êtuh blư̆ hĭn” kơ dŭm klei anăn hlăm klei hdĭp anei leh anăn klei hdĭp lă lar ênuk êdei (Y‑Luk 10:29-30).
Amâo soh ôh tơdah drei čang hmăng thŭn mrâo mâo bruă mă prăk mlan lu, klei bi mguôp jăk mơak, kyua “Jih jang klei brei jăk leh anăn klei brei klă ênŭm trŭn mơ̆ng adiê mơ̆ng Ama klei mngač sơăi” (Y‑Yakơ 1:17a). Khădah snăn, klei anăn srăng amâo jăk ôh tơdah klei êpa hmao leh anăn tui duah ñu dưi dưm êlâo hĭn kơ bruă thâo kral Khua Yang, amâo lŏ mâo wưng dôk hlăm klei Aê Diê kiă kriê, amâo hdĭp djŏ ôh ti anăp Aê Diê.
Thŭn mrâo, drei čang hmăng leh anăn kčah ya hdră kñăm čiăng mđing truh? “Dôk hlăm Khua Yang”, “mâo klei kpă ênô” leh anăn “thâo kral Khua Yang” djŏ mơ̆ jing hdră kñăm drei hlăm thŭn mrâo anei? Brei drei tui si klei Khua ƀĭng kna Y‑Pôl bi hmô čiăng thâo klei myang dưi hŏng jih jang klei bi kgăn mơ̆ng Khua Yang, dưi hrăm mbĭt găn klei ruă knap Khua Yang găn leh čiăng ƀuh klei Ñu khăp hlăm djăp mta bruă jing găl ênưih hlăm klei hdĭp anei amâo dưi đru drei thâo kral ôh.
Drei dlăng ya klei Khua ƀĭng kna Y‑Pôl dlăng myuôm jing “dưi mâo” mơ̆?
Wal lač: Ơ Khua Yang, kâo bi mni lač jăk kơ Ih kyua kâo dưi lŏ mŭt hlăm thŭn mrâo ti lăn. Akâo kơ Khua Yang đru kâo êlâo hĭn êpa mhao leh anăn mđing truh hdră kñăm pioh lu mnĭt mmông hŏng Ih leh anăn Klei Aê Diê Blŭ, hdĭp bi mơak ai tiê Ih hlăm djăp bruă điêt prŏng hlăm klei hdĭp, leh anăn thâo kral Ih lu hĭn.
Dlăng Klei Aê Diê Blŭ hlăm tlâo thŭn: Y‑Êsêkiêl 16:15-43
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
https://www.youtube.com/c/bhkthn
