Klei Aê Diê Blŭ: I Klei Yăl Dliê 29:20-25
Êlan Kliăng: “Snăn Y-Salômôn dôk gŭ ti jhưng mtao Yêhôwa jing mtao čuê Y-Đawit ama ñu; leh anăn ñu đĭ kyar, leh anăn jih jang phung Israel gưt kơ ñu.” (I Klei Yăl Dliê 29:23).
Klei êmuh ksiêm mĭn: Ya bruă Mtao Y-Đawit leh anăn phung bi kƀĭn ngă? Ya mnơ̆ng ngă yang diñu myơr? Ya ngă anei jing gưl tal dua Y-Salômôn dưi brei ngă mtao? Si ngă Aê Diê hơêč hmưi kơ ñu? Ya klei hriăm drei mâo mơ̆ng klei jăk Aê Diê brei kơ Y-Salômôn?
Hŏng klei hơ̆k mơak kơ klei Aê Diê brei, Mtao Y-Đawit myơr mpŭ mni kơ Khua Yang ti anăp phung bi kƀĭn. Leh anăn jih jang phung bi kƀĭn mpŭ mni leh anăn kkuh mpŭ kơ Khua Yang. Hruê êdei, diñu myơr kơ Aê Diê lu mnơ̆ng ngă yang mâo sa êbâo drei êmô knô, sa êbâo drei biăp knô, leh anăn sa êbâo drei êđai biăp. Lu mnơ̆ng ngă yang brei ƀuh anei jing sa knăm bŏ hŏng yuôm bhăn. Ăt hlăm hruê anăn, diñu trôč êa ƀâo mngưi leh anăn brei Y-Salômôn, anak êkei Y-Đawit jing mtao. Leh anăn klei yuôm bhăn anei jing gưl tal dua ñu dưi mpŭ jing mtao. Khă gơ̆ klei anei dưi lŏ bi hdơr đŭt ƀiădah hlăm lam anăn jing klei dleh dlan Y-Salômôn hgao čiăng dưi jing mtao. Ñu dưi mpŭ ngă mtao tal sa hlăm klei mjêč leh Anak êkei mtao Y-Adonija, ayŏng sa ama mdê amĭ, čŏng đĭ ngă mtao. Leh hmư̆ klei hâo hưn amâo jăk anei, Mtao Y-Đawit jao mnuih mjêč brei Y-Salômôn nao ti ƀuôn Gihôn čiăng mâo Khua ngă yang Y-Sadôk leh anăn Khua pô hưn êlâo Y-Nathan trôč êa ƀâo mngưi ngă mtao (I Bruă Mtao 1).
H’Batsêba jing amĭ mtao Y-Salômôn leh anăn lu phung mkăn hlăm sang mtao thâo sơaĭ Y-Salômôn jing mnuih Aê Diê ruah jing mtao čuê ama ñu ƀiădah bruă ñu ngă mtao yuôm hŏng lu klei dleh dlan. Năng ai diñu mâo lu mmông êdu ai, amâo thâo ôh hdră mơ̆ng Aê Diê srăng dưi ngă amâodah hơaĭ. Wăt mtao Y-Đawit wăt tơdah lu blư̆ dưi trôč êa ƀâo mngưi jing mtao ƀiădah ăt găn leh lu dlei dlan (I Y-Samuel 16:13, II Y-Samuel 2:4, 5:3). Leh anăn knhal tuč, jih jang mnuih ƀuh hdră mơ̆ng Aê Diê jing sĭt. Mtao Y-Salômôn, pô jing Aê Diê ruah jing mtao (II Klei Yăl Dliê 22:9-10), ăt klă sĭt dưi jing mtao ti anăp phung khua gĭt gai yuôm bhăn leh anăn wăt Israel, hŏng sa klei đĭ ngă mtao bŏ hŏng drưh kơang. Amâo djŏ knŏng dŭm năn ôh, Aê Diê lŏ hơêč hmưi kơ ñu lu klei jăk mơak: mâo klei mdrŏng sah, klei gưt asăp mơ̆ng dŭm gưl phung khua gĭt gai leh anăn phung ƀuôn sang Israel. Yêhôwa brei kơ ñu dưi mâo “klei hing ang prŏng” leh anăn “klei kdrăm kơah năng kơ mtao” tơl amâo tuôm mâo ôh klei msĕ snăn kơ phung mtao êlâo kơ ñu hlăm čar Israel.
Mâo lu mông Aê Diê dưm hlăm ai tiê drei klei čang hmăng, klei bi êdah, hdră kñăm drei thâo anăn jing klei Aê Diê čiăng, ƀiădah Aê Diê brei kơ klei anăn mtam, amâodah Ñu knŏng brei klei anăn hlăm ai tiê drei leh anăn brei dôk čang guôn. Klei yuôm bhăn hĭn jing brei dôk kjăp đaŏ kơ hdră jăk hĭn mơ̆ng Aê Diê klă sĭt srăng truh.
Drei êdu ai mơ̆ kyua ƀuh klei jăk siam hlăm hdră Aê Diê ka dưi ngă?
Ơ Khua Yang, akâo kơ Ih brei kơ kâo đaŏ knang kluôm ênŭm kơ ih wăt tơdah ya klei mâo, kyua knhal tuč klei Ih čiăng leh anăn hdră jăk mơ̆ng Ih klă sĭt srăng truh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 16:25-50
Kênh Youtube BHKTHN:
