Khiavdim 3:1-6, 4:18
Nqe cim:
“Nej rau siab ntso ua haujlwm tsis txhob tubnkeeg, thiab yuav tsum muab siab rau ua tes haujlwm uas Vajtswv kom peb ua” (Loos 12:11)
Lus nug rau sawvdaws xav:
– Mauxes tabtom ua dabtsi hauv nws yawmtxiv tsev hauv tebchaws Midias?
– Nws lub neej tau hloov pauv zoo li cas tom qab tau tus Tswv nqua hu?
– Nyob rau lub xyoo tshiab, koj ua neej thiab ua haujlwm los ntawm txojkev xav tshiab zoo li cas?
Tom qab qhov xwmtxheej uas tua tus neeg Iziv raug lwm tus paub, Mauxes khiav mus nkaum rau tom tebchaws Midias, yuav pojniam thiab yug nws yawmtxiv pab yaj. Plaub caug xyoo ntev loo tiamsis vim li cas Mauxes ho tsis muaj cuabtam uas yog nws tug tiamsis nws tseem ua neej zoo li ib tug neeg mus yug tsiaj uas raug ntiav? Ib tug neeg zoo li Mauxes tsis yog ib tug neeg uas tsis muaj peevxwm. Tej thaum nws qaug zog heev vim haivneeg Yixalayees tsis totaub nws nplooj siab, ua zoo tiamsis tseem raug cem, yog li nws thiaj txaus siab ua neej nyob ntsiag to nrog tej haujlwm uas yug yaj hnub dhau hnub es tsis xav, tsis npaj ib yam cuabtam dabtsi rau nws. Twb muaj yim caum xyoo, cuag li Mauxes twb txaus siab rau nws txoj hmoo, tsis xav txog nws haivneeg ntxiv, tsis xav ua kom npluanuj, tsis xav rhais ruam tawm hauv qhov chaw uas muaj kev thajyeeb mus. Yog li ntawd thaum tus Tswv hu nws, nws thiaj nrhiav ntau txoj haukev los yig.
Mauxes tsis paub hais tias tus Tswv siv tej tsam thawj hauv nws lub neej los cob qhia nws. Thaum txog tus Tswv lub sijhawm, Nws hu Mauxes rov mus tso Nws haivneeg dim kev ua cev qhev los. Thaum kawg, Mauxes tau mloog tus Tswv lus, rov mus tsev thov nws yawmtxiv tso nws rov mus rau nram tebchaws Iziv pib ua tus Tswv tes haujlwm uas coj tus Tswv haivneeg los mus rau lub tebchaws uas tus Tswv coglus tseg. Ntawm ib tug neeg txaus siab rau nws lub neej hnub dhau hnub, Mauxes tau los ua tus Tswv haujlwm nrog ib txojkev xav tshiab. Ntawm ib tug neeg yug yaj dhau los ua ib tug thawjcoj coj tus Tswv haivneeg. Ntawm ib tug tub vajntxwv nyob hauv Iziv, nimno rov los nrog lub meejmom ua ib tug neeg tawmtsam Falaus, kom Falaus tso tus Tswv haivneeg tawm mus.
Hnub no yog xiab peb tsiab, peb tabtom ua neej nyob hauv ib lub xyoo tshiab, thov tus Tswv pab peb kom kub siab rhais ruam nrog tus Tswv mus los ntawm ib txojkev xav tshiab. Tsis txhob muaj leejtwg txaus siab rau yus lub tsam thawj uas yog ib tug ntseeg tsuas mus pehawm Vajtswv txhua as thiv ces txaus lawm. Lossis peb tabtom txaus siab rau yus kev kawm, kev ua haujlwm es tsis quav ntsej los mus ua tus Tswv tes haujlwm uas yog coj Txojmoo Zoo mus qhia rau txhua haivneeg. Thov tus Tswv pab nyob hauv lub xyoo tshiab, kom peb tau txhawb los ntawm Vaj Ntsujplig, muaj siab tawv qhawv sawv los, kub siab lug rhais ruam mus lawm yav tom ntej, koom tes ua tiav tus Tswv lolus samhwm ua ntej nws rov mus saum ntuj: “Yog li ntawd, nej cia li tawm mus qhia txhua haivneeg hauv qab ntuj no, kom lawv los ua kuv cov thwjtim: Nej yuav tsum tuav Vaj Leej Txiv, Vaj Leej Tub thiab Vaj Ntsujplig tus Dawbhuv lub npe, muab lawv ua kevcai raus dej. Thiab qhia kom lawv paub coj raws li txhua yam uas kuv tau qhia rau nej lawm; thiab kuv yuav nrog nraim nej mus txog hnub uas lub ntiajteb no kawg” (Mathais 28:19-20). Xyoo tshiab, kev xav tshiab! Txawm yuav txomnyem, ntsib kev khwv, txawm yuav raug ib txojkev tav twg los ntawm dab Ntxwgnyoog, txawm yuav yuam kev hauv lub neej, thov tus Tswv pab peb yeejmeem sawv ruaj kom tau txais tus Tswv tej lus samhwm, koom tes txhim kho thiab ua kom Vajtswv lub tebchaws nthuav dav nyob hauv ntiajteb.
Thov Vajtswv,
Tus Tswv, thov zam txim rau nyuam yaus vim muaj ntau zaug nyuam yaus tsis mloog ua raws li Koj lolus nqua hu, tsis tau kub siab koom tes rau Koj tes haujlwm. Thov Vaj Ntsujplig txhawb kom nyuam yaus muaj lub siab kub lug tshaj tawm Txojmoo Zoo nyob rau lub xyoo tshiab. Nyuam yaus tuav Yexus Khetos lub npe thov, A-mees.
Peb coglus li cas rau tus Tswv nyob rau lub xyoo tshiab no?
Nyeem Vajluskub hauv peb lub xyoo: Phau Ntawv Nkauj 33-34
Kênh Youtube BHKTHN:
