Mơ̆ng Nơ̆r Kră Yang Krao – 30/1/2025

196
Trình chơi Audio

 

 

Lĕch Đơ̆ng Êyiptơ 3:1-10

“Kră Yang ‘bôh sư năm lăng rai jê̆, Kră Yang pơma đơ̆ng lăm jơla noh krao: Ơ Môis, Ơ Môis! Sư tơl khan: Đei inh tơ âu!” (Lĕch đơ̆ng Êyiptơ 3:4)

Nơ̆r jet tơchĕng pơwao:

– ‘Bok Môis hơdrol kơ Kră Yang Krao  sư thoi yơ?

– Kră Yang krao ‘Bok Môis đơ̆ng rŏng kơ puăn jĭt sơnăm tơƀôh tơdrong Kră Yang wei lăng sư thoi yơ?

– Lu bơ̆n kăl kơ pơm tơdrong kiơ lăm sơnăm ‘nao wă kơ mơ̆ng nơ̆r Kră Yang krao?

Puăn jĭt sơnăm kơdâu ôn, puăn jĭt sơnăm wei triu, puăn jĭt sơnăm đei lơ bơngai hiơt, rŏ kơ hiơt kơ sư bơih wă ‘bŭ lăm dêh Mađian hăm kon akăn, đei hnam dơnŏ chơt hiôk, hŭt đĭ dôm tơdrong…, rŏ kơ ‘bok Môis hiơt đĭ! Mă khan sư hiơt đĭ dôm tơdrong mă lei Kră Yang oei ‘blŏk kơ sư. Kon bơngai bơ̆n lơ wơ̆t ngăl hiơt kơ Kră Yang mă lei Kră Yang ưh kơ đei la yơ hiơt kơ bơ̆n. Trŏ kơ jơnăr Kră Yang wă, Kră Yang đei năm tơ Môis păng krao sư. Kră Yang krao anăn sư “Ơ Môis, ơ Môis!” păng Kră Yang đei khan, “Kră Yang khan: Inh ‘bôh boih tơdrong gleh pơmat-tat kon pơlei Inh tơ dêh Êyiptơ păng Inh kơtơ̆ng boih nơ̆r lu sư krao ôr yua kơ tơdrong jang pơmat, Inh băt hơđăl đĭ dôm tơdrong jang pơmat-tat lu sư” (Lĕch đơ̆ng Êyiptơ 3:7), Kră Yang đei ƀôh, păng mơ̆ng hăm băt dôm tơdrong jĭ jăn, ơh sơ’ngon kon pơlei pơla Sư thoi noh na Sư krao Môis athei wih brŏk păng dŏng pơklaih kon pơlei Sư đơ̆ng dêh Êyiptơ.

Rim chăl arih bơ̆n lăm tơpang ti Kră Yang , lơ wơ̆t bơ̆n đei tơchĕng Kră Yang oei tơyơ, nơ̆r ôr krao lu bơ̆n băt Kră Yang hăm mơ̆ng ưh yua kơ Kră Yang nhen ưh kơ tơl nơ̆r bơ̆n ôr krao, phŏ bơ̆n tơchĕng nhen thoi Kră Yang hŭt lê̆ bơ̆n bơih! Mă lei dôm tơdrong băt mơn, dôm tơdrong tơchĕng pơwao, dôm tơdrong bơ̆n đei pơma noh ưh kơ  lăm tơdrong mă ‘Bok Kei-Dei đei tơdă lê̆. Mă lu bơ̆n oei tơyơ, pơm kiơ, Kră Yang oei jê̆ bơ̆n. Dôm tơdrong truh, dôm kơ chăl lăm chăl arih bơ̆n noh jơ̆ Kră Yang pơ’măn lu bơ̆n wă yua lăm tơdrong jang Sư đei kơ nhăm lê̆ bơih. Lu bơ̆n kăl kơ băt Kră Yang đei yua bơ̆n kiơ̆ thoi jơ năr Sư wă ưh kơ trŏ thoi jơnăr mă bơ̆n đei tơchĕng; Kră Yang pơm kiơ̆ thoi Sư wă ưh kơ trŏ pơm kiơ̆ thoi bơ̆n wă. Kră Yang bơih tơ’ngla mơsêh, rơgei, pơtao kơ đĭ đăng kŭm pơtao rim ‘nu lu bơ̆n. Athei chu yom tơdrong ‘Bok Kei-Dei đei hơmet bơih.

            Năr âu năr mă ƀar lăm sơnăm ‘nao, lu bơ̆n đei chơt hiôk sơnăm ‘nao, apinh ‘măn jơ lăng dơ̆ng, hăm đei la yơ bơ̆n nhen thoi ƀok Môis ưh? Kră Yang tơyơ? Yua kơ kiơ Sư ưh kơ mơ̆ng nơ̆r inh? Athei lui gơnang kơ Sư. Lu bơ̆n ‘Bok Kei-Dei đei ăn kơ bơ̆n Sơ̆p hla bơar Nơ̆r Sư bơih. Kơplah bơ̆n đŏk, hŏk pơhrăm, lu bơ̆n đei mơ̆ng Kră Yang bơtho tơƀôh kơ bơ̆n. Kơplah trŏ kơ jơnăr Sư kơnh, Kră Yang gô pao trŏ kơ a-năn bơ̆n nhen thoi Sư đei pao krao trŏ kơ anăn ƀok Môis sơ̆ “ơ kon, ơ kon!” Athei đei jơhngơ̆m lui gơnang kơ Kră Yang ling lang, mơ̆ng nơ̆r Kră Yang păng đei tơl nơ̆r Kră Yang  “đei inh âu!”, chăl arih bơ̆n gô đei yua kơ Kră Yang păng kơ lơ bơngai.

Lu bơ̆n hăm đei mơ̆ng kơtơ̆ng nơ̆r Kră Yang đei krao lu bơ̆n dah ưh? Lu bơ̆n đei sơng iŏk tơdrong Kră Yang krao thoi yơ?

Ơ Kră Yang, apinh mơnat kơ inh phŏ lơ wơ̆t inh đei hiơt kơ Ih, phŏ kơnh inh đei tơchĕng Ih achăng lê̆ inh bơih! Apinh Ih tơgŭm inh đŏk, pơhrăm nơ̆r Kră Yang wă mơ̆ng nơ̆r ih đei bơtho. Apinh ih tơgŭm inh sơng iŏk nơ̆r Ih đei krao lăm chăl arih inh. Yua anăn Kră Yang Yêsu Krist, Amen.

Đŏk Sơ̆p hla bơar ‘Bok Kei-Dei lăm pêng sơnăm: Hơriso 31-32.

Kênh Youtube BHKTHN:

https://www.youtube.com/c/bhkthn

Bài trướcNghe Tiếng Chúa Gọi – 30/1/2025 
Bài tiếp theoXyoo Tshiab Kev Xav Tshiab – 31/1/2025