Klei Aê Diê Blŭ: Klei Kbiă 3:1-6, 4:18
Êlan kliăng: “Brei diih hur har, đăm alah ôh. Brei diih mă bruă kơ Khua Yang hŏng jih ai tiê. ” (Rôm 12:11)
Klei êmuh ksiêm mĭn: Ya bruă Y‑Môis dôk ngă ti sang kmha ñu hlăm krĭng Madian? Si klei hdĭp ñu bi mlih leh Aê Diê iêô? Hlăm thŭn mrâo hlue mlan ƀlĕ, si ih hdĭp leh anăn mă bruă hŏng ai tiê mrâo?
Leh arăng thâo ñu mdjiê sa čô mnuih Êjip, Y‑Môis đuĕ ti krĭng Madian, dôk mô̆ leh anăn răng kiă biăp kơ kmha ñu. Pă pluh thŭn sui ya ngă Y‑Môis amâo mâo ôh ngăn drăp hjăn ƀiădah ăt hdĭp msĕ si sa čô pô kiă biăp mưn amâo kdlưn hĭn ôh? Sa čô mnuih msĕ si Y‑Môis amâo djŏ jing amâo mâo klei thâo ôh. Năng ai ñu ênguôt kyua phung ƀuôn sang Israel amâo thâo săng ôh ai tiê ñu, đru ƀiădah lŏ ba klei ngêñ, anăn ñu tŭ ư hdĭp hŏng bruă răng biăp grăp hruê ƀiădah amâo mđing ôh kơ ngăn drăp kơ pô. Spăn pluh thŭn leh, Y‑Môis msĕ si tŭ ư kơ klei hdĭp pô, amâo bi mĭn ôh kơ phung ƀuôn sang, amâo mđing ôh kơ bruă ngă mdrŏng, amâo čiăng đuĕ ôh mơ̆ng anôk êđăp ênang. Kyua anăn tơdah Aê Diê iêô ñu, ñu lu blư̆ duah êlan hngah.
Y‑Môis amâo thâo ôh Aê Diê yua klei truh čiăng bi hriăm ñu. Truh wưng Aê Diê kčah, Aê Diê iêô Y‑Môis wĭt mtlaih djuê ana mơ̆ng klei jing hlŭn. Knhal tuč, Y‑Môis gưt asăp Aê Diê, wĭt kơ sang akâo kơ kmha ñu lŏ wĭt ti Êjip mphŭn bruă atăt gai phung ƀuôn sang Aê Diê hlăm krĭng lăn Aê Diê ƀuăn. Mơ̆ng sa čô mnuih êđăp ênang hŏng klei hdĭp hlăm grăp hruê, Y‑Môis mă leh bruă kơ Aê Diê hŏng sa ai tiê mrâo mrang. Mơ̆ng sa čô pô kiă biăp jing sa khua kiă kriê phung ƀuôn sang Aê Diê. Mơ̆ng sa čô anak mtao čar Êjip, ară anei wĭt jing sa čô bi kdơ̆ng hŏng Pharaôn hŏng klei akâo brei kơ phưi phung ƀuôn sang Aê Diê.
Hruê anei jing hruê tlâo Tết, drei dôk hdĭp hlăm thŭn mrâo hlue mlan ƀlĕ, akâo kơ Aê Diê brei drei hur har êbat hŏng Khua Yang hŏng sa ai tiê mrâo. Đăm ôh hlei pô ư ai hŏng bruă jing sa čô đăo nao bi kƀĭn grăp hruê kăm jing djăp leh. Amâodah drei dôk êđăp ênang hŏng bruă hriăm, mă bruă pô ƀiădah amâo mđing ngă ôh bruă Aê Diê jao jing ba Klei Mrâo Mrang Jăk kơ jih jang mnuih. Akâo kơ Khua Yang đru kơ thŭn mrâo hlue mlan ƀlĕ, drei mâo Yang Mngăt Jăk mđĭ ai, jhŏng kgŭ, hur har êbat nao čiăng hrăm mbĭt hlue ngă asăp Khua Yang mtă êlâo kơ Ñu đĭ wĭt kơ adiê: “Kyuanăn nao bĕ diih mjing phung ƀĭng kna hlăm jih jang găp djuê mnuih, ngă ƀaptem kơ diñu hlăm anăn Ama, anăn Anak, leh anăn anăn Yang Mngăt Jăk; bi hriăm diñu brei gưt jih jang klei kâo mtă leh kơ diih. Leh anăn nĕ anei, kâo dôk mbĭt hŏng diih nanao tơl knhal tuč lăn ala” (Y‑Mathiơ 28:19-20). Thŭn mrâo, ai tiê mrâo! Wăt tơdah tuôm hŏng klei dleh dlan, gun kpăk, wăt tơdah mâo klei bi kgăn mơ̆ng Satan, wăt tơdah mâo klei truh hlăm klei hdĭp, akâo kơ Aê Diê đru drei dôk kjăp nanao čiăng mă tŭ bruă Aê Diê jao, đru mkŏ mjing leh anăn mđĭ kyar Ƀuôn Ala Mtao Aê Diê ti lăn ala.
Ya klei drei ƀuăn hŏng Khua Yang hlăm thŭn mrâo?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo amâo gưt asăp klei Ih iêô, ka jih ai tiê mguôp ôh hlăm bruă Ih. Akâo kơ Yang Mngăt Jăk đru kơ ai tiê kâo hur har hưn Klei Mrâo Mrang Jăk hlăm thŭn mrâo. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: Klei Mmuñ Hđăp 33-34
Kênh Youtube BHKTHN:
