Klei Aê Diê Blŭ: I Y‑Timôthê 2:1-8
Êlan kliăng: “Snăn êlâo kơ jih jang klei, kâo mtrŭt brei ih kwưh, akâo, wah lač brei kơ arăng leh anăn bi mni kơ Aê Diê kyua jih jang mnuih” (I Y‑Timôthê 2:1).
Klei êmuh ksiêm mĭn: Čiăng wĭt lač kơ ai tiê Aê Diê hlăm êlan 4, ya mta klei brei Y‑Timôthê leh anăn phung đăo ngă? Si hdră drei dôk ngă hŏng dŭm klei mtă anei?
Êjai Phung Sang Aê Diê hlăk dôk hlăm klei arăng ngă jhat ktang tĭt, snăn khua ƀĭng kna Y-Pôl lač hŏng Y‑Timôthê “Snăn êlâo kơ jih jang klei” – čiăng lač kơ bruă yuôm hĭn mrô sa – “brei ih kwưh, akâo, wah lač brei kơ arăng leh anăn bi mni kơ Aê Diê kyua jih jang mnuih” (êlan 1), wăt kơ phung ka đăo, leh anăn boh nik kơ “phung mtao leh anăn kyua jih jang phung khua kiă kriê” (êlan 2). Wah lač kơ ya mta klei? Wah lač čiăng kơ diñu “srăng tlaih leh anăn truh kơ klei thâo săng klei sĭt nik” (êlan 4), wăt tơdah hlăk anăn khua mtao Nêrô jhat ƀai adôk jing khua mtao kluôm čar Rôm. Klei anei brei ƀuh klei bi mtlaih čiăng kơ jih jang mnuih brei mâo, wăt kơ phung soh, jhat ƀai hĭn.
Čiăng dưi ngă klei Aê Diê čiăng hlăm bruă hiu hưn Klei Mrâo Mrang Jăk, mta bruă brei ngă tal êlâo hĭn jing klei wah lač. Brei dlăng kơ klei wah lač jing mrô sa, kyuadah drei hlăk dôk hlăm kdrăn blah klei hdĭp mngăt myang leh anăn drei knŏng dưi mâo klei dưi hĭn hŏng klei myang Aê Diê. Hlăm bruă hiu hưn Klei Mrâo Mrang Jăk, tơdah amâo mâo hŏng klei myang Yang Mngăt Jăk snăn amâo mâo ôh pô dưi đăo jum Khua Yang Yêsu. Kyuanăn yơh, êlâo kơ kbiă hiu hưn bi sĭt brei drei hŏng jih ai tiê čiăng “kwưh, akâo, wah lač” brei kơ phung rai luč leh anăn akâo kơ Yang Mngăt Jăk mprăp hmiêt ai tiê diñu čiăng jum drông Klei Mrâo Mrang Jăk drei hriê ba kơ diñu.
Ƀiădah čiăng kơ klei wah lač mâo klei dưi tŭ, pô wah lač brei mâo tlâo mta klei snei. Tal sa jing, “kngan doh jăk”, klei bi knăl kơ sa klei hdĭp doh jăk, sa ai tiê doh êngeh. Tơdah hlăm ai tiê adôk djă pioh klei soh, drei amâo dưi ôh wah lač leh anăn hmăng hmưi kơ Aê Diê lŏ wĭt lač (Klei Mmuñ Hđăp 66:18). Tal dua, pô wah lač jing mnuih “amâo mâo klei ăl”, čiăng lač kơ klei thâo bi mguôp jăk hŏng phung ayŏng adei. Tơdah sa čô mnuih djăl ăl, amâo thâo bi djŏ hŏng phung đăo mkăn snăn mnuih anăn jing mnuih bi rŭng amâo djŏ jing mnuih bi grăng ôh. Leh anăn tal tlâo, amâo mâo “bi mneh msao” ôh, hlăm boh blŭ phŭn ăt mblang jing “klei đing” mơh. Sa čô mnuih hriê kơ Aê Diê brei mâo klei đăo, amâo mâo klei đing ôh (Y‑Yakơ 1:5-8). Snăn, čiăng dưi jing sa čô mnuih hiu hưn Klei Mrâo Mrang Jăk mâo klei tŭ dưn brei drei wah lač, rŭ mdơ̆ng klei hdĭp doh jăk, rŭ mdơ̆ng klei đăo kơ Aê Diê, leh anăn rŭ mdơ̆ng klei bi mguôp jăk hŏng ayŏng amai adei hlăm sa klei đăo.
Kdlưn hĭn dơ̆ng, brei drei kgŭ dơ̆ng, kbiă nao, tui duah mnuih rai luč leh anăn hưn Klei Mrâo Mrang Jăk kơ diñu. Khua ƀĭng kna Y‑Pôl yơh jing pô hưn bi sĭt kơ klei Aê Diê iêu brei kơ phung đăo hlăm bruă hiu mtô Klei Mrâo Mrang Jăk leh anăn wăt jing klei bi hmô kơ drei hlăm bruă anei msĕ mơh (êlan 7).
Si ngă drei čiăng jing mnuih mâo kdrêč hlăm klei čiăng jăk Aê Diê mơ̆?
Wah lač: Ơ Khua Yang, akâo kơ Ih dưm klei gui ktrŏ mngăt mnuih dôk rai luč hlăm ai tiê kâo, leh anăn akâo kơ Ih yua kâo msĕ si sa mnơ̆ng yua hlăm kngan Ih, pioh hiu hưn Klei Mrâo Mrang Jăk kơ digơ̆ leh anăn čiăng kơ kâo dưi mâo kdrêč hlăm klei wĭt lač kơ ai tiê Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 2
Kênh Youtube BHKTHN:
