Pauj Vajtswv Nplooj Siab – 3/12/2021 

1265

 

I Timautes 2:1-8

1 Qhov tseemceeb uas kuv xav kom nej ua yog nej yuav tsum thov Vajtswv pab sawvdaws thiab nej yuav tsum ua Vajtswv tsaug. 2 Kuv thov nej thov Vajtswv pab cov vajntxwv thiab cov nomtswv. Yog peb ua li ntawd, peb yuav tau nyob kaj siab lug ua Vajtswv tes haujlwm thiab tau zoo ua peb lub neej kom phim qhov uas peb yog cov ntseeg. 3 Qhov no yog qhov zoo thiab haum Vajtswv tus uas yog peb tus Cawmseej lub siab. 4 Vajtswv xav kom tej neeg sawvdaws nyias dim nyias lub txim thiab xav kom lawv paub qhov tseeb. 5 Rau qhov yeej muaj tib tug Vajtswv xwb, thiab muaj tib tug nyob nruab nrab ua kom neeg thiab Vajtswv sib cuag tau. Tus ntawd yog Yexus Khetos tus uas los yug ua neeg. 6 Nws muab nws txojsia los theej sawvdaws lub txhoj; nws ua li ntawd yog nws qhia rau sawvdaws paub hais tias twb txog lub sijhawm uas Vajtswv teem cia lawm hais tias Vajtswv yuav pab kom neeg dim neeg lub txim. 7 Yog li ntawd, Vajtswv thiaj tsa kuv ua ib tug timthawj thiab ua xibhwb qhia Vajtswv Txojlus uas yog qhov tseeb rau lwm haivneeg thiab coj lawv los ntseeg Vajtswv. Tej lus uas kuv hais no kuv hais tseeb xwb kuv tsis dag.

8 Thaum cov neeg tuaj nyob ua ke mloog lus qhuab qhia, tsis hais hauv lub nroog twg lossis lub zos twg, kuv xav kom cov txivneej thov Vajtswv; cov ntawd yuav tsum yog cov uas muab siab rau ntseeg, tsis chim rau leejtwg, thiab tsis nrog leejtwg sib cav sib ceg.

Nqi cim: 

“Qhov tseemceeb uas kuv xav kom nej ua yog nej yuav tsum thov Vajtswv pab sawvdaws thiab nej yuav tsum ua Vajtswv tsaug.” (I Timautes 2:1).

 

Lus nug rau sawvdaws xav: 

  • Yuav kom pauj tau Vajtswv nplooj siab uas hais hauv nqi 4, Timautes thiab cov ntseeg yuavtsum ua tej yam twg?
  • Peb tabtom ua tes haujlwm no zoo licas lawm?

Thaum uas Pawg Ntseeg tabtom raug tsimtxom hnyav heev ces Timthawj Paulus hais rau Timautes hais tias qhov tseemceeb uas kuv xav kom nej ua” – txhais tau hais tias yog yam uas cheemtsum ua tshajplaws yog:“yuav tsum thov Vajtswv pab sawvdaws thiab nej yuav tsum ua Vajtswv tsaug.” (nqi 1), thov Vajtwv rau cov uas tsis tau ntseeg, thiab tseemceeb yog “thov Vajtswv pab cov vajntxwv thiab cov nomtswv.” (nqi 2). Thov Vajtswv txog yam dabtsi? Thov rau lawv “nyias dim nyias lub txim thiab xav kom lawv paub qhov tseeb.” (nqi 4), txawm lub sijhawm ntawd Huabtais Nelaus siab phem tseem zaum saum zwmtxwv kav tebchaws Loos. Qhov ntawd qhia tau hais tias txhua tus cheemtsum tau txais kev cawmdim, leej cov uas ua phem ua qias huv tibsi.

Yuav kom tshajtawm tau Txoj Moozoo raws li Vajtswv lub siabnyiam, yam xubthawj peb yuavtsum ua yog thov Vajtswv. Yuavtsum saib kev thov Vajtswv yog yam xub ua, vim peb tabtom nyob hauv pluav rog sab ntsujplig thiab peb tsuas muaj yeej taus dhau los ntawm Vajtswv lub hwjchim xwb. Nyob hauv kev tshajtawm Txoj Moozoo, yog tsis muaj Vaj Ntsujplig lub hwjchim ces yeej tsis muaj ib tug neeg twg kam los txais yuav Tswv Yexus. Yog li ntawd, ua ntej uas yuav tawm mus ua timkhawv yuavtsum tas siab tas ntsws los “thov Vajtswv” rau cov neeg uas yuav raug kev puastsuaj thiab thov Vaj Ntsujplig tu cov neeg ntawd lub siab kom lawv txais yuav Txoj Moozoo uas peb coj mus qhia rau lawv.

Tiamsis xav kom tej lus thov tau Vajtswv teb, tus uas thov Vajtswv yuavtsum muaj peb yam. Tim ib yog “muab siab rau ntseeg” – lwm phau txhais hais tias “tsa txhais tes dawbhuv” txhais tau hais tias yuavtsum muaj ib lubneej dawbhuv, thiab muaj ib nploojsiab dawb paug. Yog tias hauv lubneej tseem zais ntshis kev txhaum, ces peb txhob cia siab hais tias thaum thov Vajtswv yuav teb peb tej lus (Ntawv Nkauj 66:18). Tim ob, tus uas thov Vajtswv yuavtsum “tsis chim rau leejtwg”, txhais tau hais tias tus ntawd yuavtsum muaj kev sib raug zoo nrog lwm tus. Yog tias leejtwg pheej txawj chim taus, tsis sibhaum nrog lwm tus ntseeg, ces tus ntawd tsuas yog tus tsim teebmeem xwb, yuav ua tsis tau tus cheem lwm tus. Thiab tim peb, “tsis nrog leejtwg sib cav sib ceg”, lus hauv paus ntawm lo lus no yog xav hais txog “ua xyemxyav” lossis “tsis ntseeg”. Tus neeg uas los thov Vajtswv yuavtsum muaj kev ntseeg, tsis txhob ua xyemxyav (Yakaunpaus 1:5-8). Yog li ntawd, yuav kom ua tau ib tug neeg tshajtawm Txoj Moozoo tawg paj txi txiv, peb yuavtsum thov Vajtswv, txhim kho lubneej dawbhuv, txhim kho txojkev ntseeg, thiab txhim kho kev sib raug zoo nrog lwm tus.

Heev tshaj qhov ntawd, peb yuavtsum sawv tsees, tawm mus, nrhiav cov neeg uas yuav raug kev puastsuaj thiab qhia Txoj Moozoo rau lawv. Timthawj Paulus yog timkhawv txog Vajtswv txojkev nqua hu cov ntseeg los mus tshajtawm Txoj Moozoo thiab kuj yog tus yamntxwv zoo rau peb kev ua tes haujlwm no (nqi 7).

Peb puas xav ua tus neeg koom tes ua haujlwm pauj Vajtswv nploojsiab?

 

Thov Vajtswv:

Vajtswv, thov Koj muab lub nra uas yog txhawj txog cov neeg yuav raug puastsuaj rau hauv nyuamyaus lub siab thiab siv nyuamyaus zoo li yam cuabyeej hauv Koj txhais tes los tshajtawm Txoj Moozoo rau lawv thiab cia nyuamyaus tau koom tes rau kev ua haujlwm pauj Koj nploojsiab. Ameeg.

Kênh Youtube BHKTHN:

https://www.youtube.com/c/bhkthn

Bài trướcLong An: Lễ Bổ Nhiệm Quản Nhiệm Chi Hội Thạnh Phước
Bài tiếp theoWĭt Lač Kơ Ai Tiê Aê Diê – 3/12/2021