Klei Aê Diê Blŭ: Klei Kbiă 27:9-19
Êlan kliăng: “Myơr bĕ kơ Yêhôwa klei guh kơang năng kơ anăn ñu; djă ba mnơ̆ng myơr leh anăn mŭt hlăm wăl sang ñu.” (Klei Mmuñ Hđăp 96:8).
Klei êmuh ksiêm mĭn: Si ngă wăl Sang čhiăm mâo hdră mkra mjing? Ya klei yuôm bhăn wăl sang čhiăm hŏng phung ƀuôn sang Israel? Si ngă drei bi êdah klei khăp hŏng Aê Diê leh anăn hŏng Sang Aê Diê?
Wăl sang čhiăm jing wăl tač hlăm lam Sang čhiăm, mâo thŭng êa pioh rao hŏng kông leh anăn knưl mnơ̆ng myơr čuh (dlăng hlăm Klei Kbiă 30:17‑21). Wăl sang čhiăm mâo rup mta dhar, dlông 100 heh, bi knar hŏng hlăm brô 46 met, prŏng 50 heh, bi knar hŏng hlăm brô 23 met. Grăp tĭng dlông mâo dua pluh kmeh leh anăn dua pluh boh mdhô̆ kông, knuăk kmeh leh anăn klei hyuă digơ̆ srăng ngă hŏng prăk. Grăp tĭng boh găn mâo pluh kmeh, pluh boh mdhô̆ digơ̆ ngă hŏng kông, knuăk kmeh leh anăn klei hyuă digơ̆ srăng ngă hŏng prăk. Riêng gah Sang čhiăm arăng kă čhiăm hŏng kbuă điêt aruăt dlông êma heh, bi knar hŏng 2,3 met. Boh găn nah Ngŏ jing ƀăng jang mŭt hlăm Sang čhiăm, ti krah čhiăm dlông dua pluh heh, bi knar hŏng 9,2 met, ăt dưi ngă hŏng čhiăm hŏng kbuă điêt aruăt ƀiădah hŏng piơk, hrah jŭ, hrah huč, leh anăn hŏng kbuă điêt aruăt. Anei jing ƀăng jang sa anăn čiăng mŭt hlăm Sang čhiăm.
Hlăk êjai djăp mta mnơ̆ng hlăm lam anôk doh jăk leh anăn anôk doh jăk hĭn arăng mkra hŏng kyâo akasi, kbuă điêt aruăt leh anăn mah doh, snăn nah êngao wăl Sang čhiăm, djăp mta mnơ̆ng yua pih đru kơ phung Israel kkuh mpŭ kơ Aê Diê, myơr mnơ̆ng čuh leh anăn mnơ̆ng pa brei arăng mkra hŏng kyâo akasi, kbuă điêt aruăt, kông leh anăn prăk. Sa klei msĕ jing jih jang mnơ̆ng mơ̆ng čhiăm phiang wăl sang čhiăm truh anôk doh jăk dưi ruh leh anăn mbĕ đuĕ ênưih sơăi.
Wăl tač Sang čhiăm jing anôk bi ktlah Sang čhiăm hŏng nah êngao. Dŭm blah čhiăm phiang hŏng kbuă điêt aruăt gang phung nah êngao ƀuh ya bruă mâo hlăm lam Sang čhiăm. Wăl Sang čhiăm jing anôk phung ƀuôn sang Israel dưi mŭt. Diñu srăng bi mlih tuôr mŭt hlăm wăl Sang čhiăm čiăng kkuh mpŭ kơ Aê Diê, myơr mnơ̆ng ngă yang, phung khua ngă yang srăng đru diñu ngă klei bhiăn myơr mnơ̆ng pap brei klei soh leh anăn mnơ̆ng myơr bi mni. Phung Israel huĭ mpŭ kơ Aê Diê, khăp kơ wăl Sang čhiăm kyua anei jing anôk diñu dưi nao giăm Aê Diê hĭn. Anak čô Y‑Kôrê leh anăn phung ƀuôn sang Aê Diê thâo klei jăk mơak sĭt dưi kkuh mpŭ ti wăl Sang čhiăm: “Kyuadah sa hruê hlăm wăl sang ih jing jăk hĭn kơ sa êbâo hruê ti anôk mkăn. Kâo khăp hĭn dôk kiă kriê ƀăng bhă sang Aê Diê kâo hŏng dôk hlăm sang čhiăm klei măk ƀai” (Klei Mmuñ Hđăp 84:10). “Mŭt bĕ ti ƀăng jang ñu hŏng klei hdơr knga, leh anăn hlăm wăl sang ñu hŏng klei bi mni; hdơr knga kơ ñu bĕ, mpŭ mni kơ anăn ñu.” (Klei Mmuñ Hđăp 100:4). Hruê anei Aê Diê brei mâo Sang Aê Diê čiăng kkuh mpŭ, hriăm Klei Aê Diê leh anăn bi mguôp hdơ̆ng drei. Khăp bĕ kơ Sang Aê Diê čiăng hrăm mbĭt mă bruă kơ Aê Diê.
Drei mơak mơ̆ sĭt nao kơ Sang Aê Diê?
Wah lač: Ơ Khua Yang! Ih jing klei kpă ênô, klei Ih pap dôk lă lar leh anăn klei sĭt suôr Ih dôk lă lar, djăp klei jăk mơak leh anăn klei jăk hriê mơ̆ng Ih. Ai tiê kâo khăp kơ Ih leh anăn mơak nao Sang Aê Diê čiăng mpŭ mni kơ Aê Diê. Čang hmăng jih jang mnuih ti lăn ala thâo kral Ih leh anăn jih ai tiê kkuh mpŭ kơ Aê Diê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 20:11 – 21:14
Kênh Youtube BHKTHN:
