Klei Aê Diê Blŭ: Y‑Mathiơ 7:7
Êlan kliăng: “Akâo bĕ, leh anăn arăng srăng brei kơ diih; duah bĕ, leh anăn diih srăng ƀuh; khŏk bĕ, leh anăn arăng srăng pŏk brei kơ diih.” (Y‑Mathiơ 7:7).
Klei êmuh ksiêm mĭn: Khua Yang Yêsu brei thâo si ênhă êlan Aê Diê wĭt lač kơ klei phung anak Ñu čiăng leh anăn hmăng hmưi? Hruê anei, tơdah dưi akâo, ya mta klei drei srăng akâo? Tơdah čiăng bi tuôm, drei srăng duah bi tuôm hŏng hlei pô? Leh anăn ti anôk ƀăng bhă diih čiăng pŏk?
Aê Diê mâo jih klei myang leh anăn amâo mâo knhal ôh snăn Ñu dưi bi sĭt klei Ñu čiăng hŏng djăp mta ênhă êlan, djăp mmông, djăp anôk. Khădah snăn dưn, yuôm bhăn êdimi tơdah Ñu ruah êlan ngă bruă hŏng klei phung anak ƀuôn sang Ñu wah lač. Tơdah drei ka wah lač djŏ tui si Klei Aê Diê Blŭ mtô lač snăn drei ka đĭ hriê kơ prŏng čiăng dưi hdĭp bi guh kơang kơ Aê Diê ôh.
Khua Yang Yêsu mtô “Akâo bĕ, srăng brei”, ƀiădah klei wah lač amâo djŏ ôh knŏng akâo leh anăn kăp mă tŭ ya klei drei akâo, ƀiădah wăt “duah” leh anăn “ƀuh”. Blŭ mdê hĭn, wah lač jing sa êlan êbat hŏng klei khăp tui duah čiăng bi tuôm hŏng Aê Diê mbĭt hŏng klei jăk siam Ñu. Tơdah hriê kơ Khua Yang knŏng čiăng akâo, snăn klei hdĭp myang drei jing ƀun ƀin leh anăn pap mñai êdi yơh, ƀiădah brei tui msĕ si Y‑Môis, “Kâo akâo kơ ih, bi êdah bĕ kơ kâo klei guh kơang ih.” (Klei Kbiă 33:18), amâodah msĕ si mtao Y‑Đawit knŏng akâo sa mta klei, “Sa mta klei kâo akâo leh kơ Yêhôwa, klei anăn kâo srăng duah; jing klei dôk hlăm sang Yêhôwa jih jang hruê kâo dôk hdĭp, čiăng dlăng klei siam Yêhôwa, leh anăn čiăng duah ñu hlăm sang yang ñu” (Klei Mmuñ Hđăp 27:4).
Ya jing klei drei čiăng “akâo” ară anei hin mtam? Tuôm mơ̆ kyua klei ktrŏ kƀah mnơ̆ng čiăng yua ngă kơ drei wơr bĭt: “Snăn đăm jing msĕ si diñu ôh, kyuadah Ama diih thâo leh ya mnơ̆ng diih kƀah êlâo kơ diih akâo kơ Ñu.” (Y‑Mathiơ 6:8)? Leh anăn lu klei dleh dlan hlăm klei hdĭp ngă kơ drei wơr bĭt mta klei êlâo hĭn hlăm klei hdĭp amâo djŏ ôh tui duah klei bi hrăp klei čiăng kơ mnơ̆ng dhơ̆ng “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y‑Mathiơ 6:33).
Ti anôk “ƀăng bhă” drei čiăng khŏk čiăng mŭt? Djŏ mơ̆ anăn jing “ƀăng bhă” mmông găl kơ klei mnia blei, amâodah đĭ kdlưn hlăm bruă ƀuôn sang? Drei tuôm thâo mơ̆ mâo sa “ƀăng bhă” jing yuôm hĭn brei drei nao “khŏk”, anăn jing ƀăng bhă pŏk kơ kdrăn hma hiu hưn Klei Mrâo Mrang Jăk kơ lu mnuih? Khua ƀĭng kna Y‑Pôl lač: “Ƀiădah kâo srăng dôk ti ƀuôn Êphêsô tơl truh hruê knăm Pantơkôt, kyuadah mâo ƀăng bhă prŏng pŏk leh kơ kâo dưi mă bruă yuôm, wăt mâo lu phung bi kdơ̆ng dưn” (I Kôrantô 16:8-9). Ƀăng bhă anei pŏk srăng mâo “lu phung bi kdơ̆ng” ƀiădah anăn ăt jing ƀăng bhă mmông găl mtlaih mnuih – anăn jing ƀăng bhă brei drei nao “khŏk” êlâo hĭn leh anăn akâo kơ Khua Yang brei drei mŭt.
Brei drei hdơr Aê Diê hơêč hmưi kơ drei čiăng kơ drei dưi jing phŭn klei jăk mơak kơ pô mkăn. Kyuanăn, akâo bĕ, srăng mâo, ƀiădah đăm mjưh tăp anôk anăn ôh ƀiădah brei tui duah Khua Yang leh anăn klei Ñu čiăng, čiăng dưi bi tuôm leh anăn grăp hruê drei dưi đĭ hriê kơ prŏng hĭn, leh anăn msĕ mơh khŏk bĕ ƀăng bhă mmông găl čiăng hdĭp klei hdĭp thâo thiê brei.
Si ngă drei êpa mhao čiăng thâo kral Khua Yang kdlưn hĭn grăp hruê mơ̆?
Wah lač: Ơ Khua Yang, ai tiê kâo êpa mhao čiăng thâo kral Ih kdlưn hĭn grăp hruê. Akâo kơ Ih brei kâo thâo ƀuh klei guh kơang leh anăn klei jăk siam Ih, leh anăn akâo kơ Ih yua kâo atăt lu mnuih mđrăm mbĭt duah čiăng hriê bi tuôm hŏng Ih msĕ si kâo pô.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 11:5 – 12:16
Kênh Youtube BHKTHN:
