Mathais 7:7
Nej thov, nej thiaj yuav tau; nej nrhiav, nej thiaj yuav ntsib; nej khob, Vajtswv thiaj yuav qhib qhov rooj rau nej.
Lus nug rau sawvdaws xav:
- Tswv Yexus qhia paub txog Vajtswv kev pub rau Nws cov me nyuam yam uas lawv cheemtsum thiab ntshaw yog li cas?
- Niaj hnub nim no, yog taij thov no peb yuav thov yam dab tsi?
- Yog xav ntsib no, peb yuav nrhiav ntsib leejtwg?
- Thiab lub qhov rooj twg yog lub uas nej xav kom qhib?
Vajtswv yog tus muaj fwjchim tsis paub kawg, Nws muaj peev xwm ua raws li Nws siab nyiam los ntawm txhua yam, hauv txhua lub sijhawm thiab ntawm txhua thaj tsam. Tiamsis ib qhov txawv heev uas Vajtswv xaiv kev ua haujlwm tshwm los ntawm Nws haiv neeg tej lus taij thov. Yog peb tsis tau los taij thov raws li Vajtswv Txojlus qhia ces peb tsis tau yog ib tus ntseeg hlob txaus hauv kev ntseeg thiab muaj lub neej ua rau Vajtswv tau ntsej muag.
Tswv Yexus qhia hais tias; “nej thov, nej thiaj yuav tau”, txawm li ntawd los taij thov tsis yog thov thiab tau txais yam yus thov xwb tiamsis tseem tshuav yam uas “nej nrhiav, nej thiaj ntsib” thiab. Hais tau hais tias, taij thov yog tes haujlwm ntawm kev ua neej hlub tshua uas ntshaw ntsib Vajtswv thiab xav pom yam zoo ntawm Nws. Yog peb los cuag tus Tswv tsuas yog taij thov xwb ces peb lub neej ntawm sab ntsujplig pluag kawg thiab txhim hlub heev, tiamsis peb yuav tsum ua ib yam li Mauxes “Thov koj qhia koj lub tshwjchim uas ci ntsa iab rau kuv pom” (Khiavdim 33:18), lossis ua li Daviv tsuas thov tib yam xwb, “… yog kuv xav nyob hauv tus Tswv lub tsev mus tas kuv sim neej, kuv xav tsis thoob rau tej uas Nws ua zoo, thiab kuv yuav thov Nws ua tus coj kuv txoj haukev” (Ntawv Nkauj 27:4).
Dab tsis yog yam uas peb xav “thov” thaum lub sijhawm no? Puas muaj tej zaum uas peb txhawj rau sab nqaij tawv ua rau peb tsis nco qab hais tias: “Thaum nej tsis tau thov, nej Leejtxiv twb paub tej uas nej xav yuav lawm” (Mathais 6:8)? Thiab tej kev txhawj hauv lub neej nrhiav noj nrhiav haus ua rau peb tsis nco hais tias, yam yuav tsum nrhiav ua ntej hauv lub neej tsis yog nrhiav kev noj kev haus thiab kev hnav tiamsis yog, “…xub nrhiav Vajtswv lub tebchaws thiab uas raws Vajtswv siab nyiam tso…” (Mathais 6:33).
Lub “qhov rooj” twg yog lub uas peb xav khob kom qhib rau peb mus lawm hauv? Puas yog “qhov rooj” caij nyoog zoo rau kev ua lag luam, lossis tau nce qib ntawm lub meej mom? Puas muaj tej zaug uas peb zeem paub hais tias, muaj ib lub “qhov rooj” tseemceeb heev uas peb yuav tsum “khob”, uas yog lub qhov rooj qhib ntawm kev mus tshaj tawm Txoj Moozoo rau coob leej ntau tus? Timthawj Paulus hais tias: “Tiamsis kuv yuav nyob hauv lub nroog Efexus no mus txog hnub uas sawvdaws ua kevcai Peetekos tas tso, rau qhov nimno Vajtswv qhib qhov rooj rau kuv ua tes haujlwm tseemceeb thiab muaj nqis heev, txawm li ntawd los tseem muaj ntau leej tawm tsam kuv” (I-Kauleethaus 16:8-9). Lub qhov rooj no qhib ces yuav “muaj ntau leej tawm tsam” tiamsis ntawd yog lub qhov rooj uas cawm tibneeg, thiab ntawd yog lub qhov rooj uas peb yuav tsum xub khob kom qhib rau peb tau mus lawm hauv.
Yuav tsum nco ntsoov hais tias, Vajtswv foom koob hmoov rau peb, kom peb ua koob hmoov rau lwm tus. Yog li ntawd, cia li thov nej thiaj yuav tau, thiab tsis yog tas li ntawd xwb, tiamsis nrhiav saib Vajtswv dej siab yog li cas kom tau ntsib tus Tswv thiaj kheev hlob hauv Nws txhua hnub thiab khob lub qhov rooj zoo sijhawm kom muaj sijhawm ua lub neej vim yog rau lwm tus.
Peb puas nqhis nqhawv xav paub tus Tswv heev ntxiv?
Thov Vajtswv,
Tus Tswv, nyuam yaus lub siab nqhis nqhawv xav paub Koj heev dua qub. Thov pub nyuam yaus tau pom Koj lub tshwjchim thiab yam zoo uas koj ua, thiab thov siv nyuam yaus coj coob leej ntau tus los cuag koj li nyuam yaus tau lawm. Amees.
T Nyeem Vajluskub hauv peb lub xyoo: II.Xwmtxheej Vajntxwv 11:5-12:16
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
