Klei Aê Diê Blŭ: Y‑Mathiơ 6:11
Êlan kliăng: “Brei kơ hmei mnơ̆ng ƀơ̆ng huă bi djăp kơ grăp hruê;” (Y‑Mathiơ 6:11).
Klei êmuh ksiêm mĭn: Khua Yang Yêsu mtô drei si brei ngă kơ mnơ̆ng čiăng hlăm klei hdĭp grăp hruê? Ya ngă klei anei jing yuôm snăk? Hŏng si êlan drei čiăng mâo mnơ̆ng yua hlăm klei hdĭp drei? Ya klei mñă kơ drei mơ̆ng klei wah lač anei?
Klei Khua Yang Yêsu mtô kơ klei wah lač brei ƀuh amâo djŏ jing soh wê ôh tơdah kwưh akâo mnơ̆ng čiăng kơ klei hdĭp kđeh. “Mnơ̆ng ƀơ̆ng huă” amâo djŏ knŏng lač kơ mnơ̆ng ƀơ̆ng ôh ƀiădah čiăng lač kluôm kơ jih jang mnơ̆ng čiăng kơ klei hdĭp kđeh msĕ si mnơ̆ng ƀơ̆ng huă, klei suaih asei mlei, bruă knuă… Leh anăn tơdah drei wah lač: “ Brei kơ hmei…” čiăng lač drei thâo săng kơ Khua Yang yơh jing phŭn brei kơ drei djăp mta mnơ̆ng čiăng hlăm klei hdĭp. Phung anak ƀuôn sang Aê Diê brei kriăng mă bruă čiăng dưi mâo djăp mnơ̆ng yua kơ drei pô leh anăn kơ gŏ sang (II Têsalônik 10:15), ƀiădah brei thâo săng djăp mta mnơ̆ng drei mâo kbiă hriê mơ̆ng Aê Diê sơăi, amâo djŏ ôh kyua mơ̆ng klei drei gĭr ktĭr. Phung ƀuôn sang Israel êjai dôk hlăm kdrăn tač, grăp hruê ăt duñ kpŭng mana hŏng klei suăi čiăng mâo mnơ̆ng ƀơ̆ng, kpŭng mana kbiă hriê mơ̆ng Aê Diê brei kơ diñu, ƀiădah klei diñu gĭr jing mă tŭ mnơ̆ng ƀơ̆ng Aê Diê brei leh kơ diñu. Hruê anei tơdah Aê Diê amâo brei ôh hruê mmông, klei myun, klei dưi, klei suaih asei mlei… snăn ya klei drei dưi mă tŭ mơ̆ng klei drei gĭr ktĭr? Klei thâo săng anei atăt drei kơ pă mta knhuah hdĭp yuôm: Tal sa, thâo hdơr knga kơ Aê Diê kơ jih jang mnơ̆ng drei mâo leh anăn amâo mgao ôh. Tal dua, mơak mơai hŏng ya mta mnơ̆ng drei mâo leh anăn amâo klei hêñ ôh. Tal tlâo, đăo knang kơ klei Aê Diê thiê brei amâo djŏ ôh brei drei jing mnuih alah, lui phưi bruă knuă. Tal pă, amâo duah ƀơ̆ng hŏng mta bruă mă amâo bi mơak kơ Aê Diê ôh.
Klei wah lač Khua Yang mtô, akâo kơ Aê Diê brei kơ drei mnơ̆ng yua djăp kơ “hruê anei”. Boh blŭ anei bi êdah klei ngă nanao mđruĕ mđrông, grăp hruê đăo knang kơ Aê Diê. Êjai dôk hlăm klei kƀah knap, drei akâo nanao kơ Khua Yang čiêm rông drei. Ƀiădah hlăk djăp leh mnơ̆ng ƀơ̆ng huă djăp leh čhum ao čŭt hơô, adôk dŭm čô mnuih grăp hruê kwưh akâo sĭt kơ Aê Diê hŏng klei luă gŭ, Ơ Khua Yang, akâo kơ Ih brei kơ kâo djăp mnơ̆ng yua kơ hruê anei?
Klei kwưh akâo kơ Aê Diê brei djăp mnơ̆ng yua kơ klei hdĭp hlăm kđeh jing yuôm hĭn mơh tơdah pô wah lač akâo kơ Aê Diê brei djăp mnơ̆ng yua kơ “hmei”, amâo djŏ knŏng kơ “kâo” ôh. Drei amâo wah lač knŏng kơ drei pô leh anăn kơ gŏ sang drei pô ôh, đăm wơr bĭt ôh phung ayŏng amai adei drei mkăn. Snăn grăp blư̆ wah lač akâo kơ Aê Diê thiê brei djăp mnơ̆ng yua kơ drei, drei ăt kăp kah mbha mơh prăk kăk, mnơ̆ng ƀơ̆ng, hruê mmông mđing hmư̆ klei ayŏng amai adei drei bi êdah leh anăn bi đru hlăm klei hriăm hră mơar, hlăm bruă mă…
Si ngă drei dôk kwưh akâo “mnơ̆ng ƀơ̆ng huă djăp kơ grăp hruê” amâodah akâo djăp mta mnơ̆ng drei čiăng? Aê Diê brei djăp grăp hruê
Wah lač: Ơ Khua Yang, bi mni kơ Khua Yang kyua klei jăk leh anăn klei sĭt suôr Ih mbĭt hŏng klei Ih kiă kriê răng mgang kâo leh anăn gŏ sang kâo. Akâo kơ Aê Diê yua kâo čiăng bi êdah klei khăp Ih kơ phung kƀah knap Ih dưm giăm kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 13:1 – 14:1
Kênh Youtube BHKTHN:
