Mathais 6:11
Thov Koj pub mov rau peb muaj noj hnub no
Lus nug rau sawvdaws xav:
- Tswv Yexus qhia kom peb ua li cas rau kev cheemtsum noj haus hauv txhua hnub?
- Vim li cas ntawd ho yog yam tseemceeb?
- Peb tab tom ua li cas rau peb kev cheemtsum hauv txhua hnub?
- Nqe lus thov no xav ntuas peb txog dab tsi?
Tswv Yexus qhia txog kev thov Vajtswv tsis muaj dab tsis txhaum thaum thov Vajtswv pub yam cheemtsum rau sab nqaij tawv. Thov pub “mov noj” yog hais txog tej yam cheemtsum ntawm sab nqaij tawv, ntawd puavleej hais txog kev noj hnav, lub dag zog thiab kev ua haujlwm huv tibsi. Thiab thaum peb thov hais tias; “thov Koj” yog xav hais txog kev zeem paub Vajtswv thiaj yog tus pub tau txhua yam uas peb sab nqaij tawv cheemtsum txhua hnub hauv lub neej. Yog Vajtswv cov neeg, peb yuav tau nquag ua haujlwm thiaj muaj txhua yam txaus rau yus thiab yus lub tsev neeg (II-Thexalaunikes 3:10-15). Tiamsis peb yuav tsum paub meej hais tias, txhua yam uas peb muaj puavleej yog tus Tswv pub, tsis yog peb peev xwm khwv tau. Thaum cov Yixalayees nyob tom tiaj suab puam, txhua hnub lawv yuav tsum tawm mus khaws Manas thiaj tau noj. Tus Tswv yug lawv los ntawm Manas, tiamsis qhov lawv yuav tau ua yog nquag tawm mus khaws yam uas tus Tswv pub. Niaj hnub nimno yog tus Tswv tsis pub muaj sijhawm, muaj peev xwm thiab muaj dag zog… ces peb yuav tau dab tsi ntawm peb lub zog khwv? Thaum peb zeem paub qhov ntawd yuav ua rau peb muaj kev hloov ntawm plaub yam li no: Tim ib, paub tus Tswv txiajntsig ntawm tej yam yus muaj thiab tsis khav theeb. Tim ob, txaus siab rau tej yam uas yus muaj thiab tsis txaj muag. Tim peb, cia siab rau tus Tswv kev muab pub tiamsis tsis yog vim qhov ntawd ua rau peb tub nkeeg, tsis ua haujlwm. Tim plaub, tsis nrhiav noj los ntawm ua tej haujlwm uas tsis haum tus Tswv siab.
Cov lus Tswv Yexus qhia thov, yog thov kom tus Tswv pub muaj yam cheemtsum “hnub no”. Qhov ntawd yog hais txog yam ua tsis tseg, txhua hnub yuav tsum cia siab rau tus Tswv. Thaum nyob rau lub tsamthawj uas muaj kev txomyem, peb yeej nco ntsoov thov tus Tswv pab peb kom muaj txaus, tiamsis thaum muaj txaus noj txaus hnav lawm, pes tsawg leej tseem txo fwjchim hais rau tus Tswv hais tias; tus Tswv, thov Koj pub kom kuv muaj txaus hauv hnub no?
Lo lus thov pub yam cheemtsum rau lub neej txhua hnub yuav muaj nqis heev thaum peb thov hais tias “rau peb” tsis yog “rau kuv”. Txhob yog thov Vajtswv pub yam cheemtsum rau yus thiab yus tsev neeg xwb, tiamsis yuav tsum nco txog yus tej kwv tij nrog rau lwm tus thiab. Tus Tswv yuav pub mov rau peb noj li cas? Pub los ntawm tej lub sijhawm zoo ua haujlwm, thiab los ntawm lwm tus. Yog li ntawd, thaum thov Vajtswv pub mov rau peb noj hnub no, peb kuj npaj nroos cia tus Tswv siv peb mus pab lwm tus kom “muaj noj” thiab. Txhua zaus uas peb thov Vajtswv pub yam cheemtsum rau peb, ces peb kuj npaj nroos muab tej uas peb muaj xws li nyiaj txiag, khoom noj haus thiab cia sijhawm pab rau peb tej kwvtij sawvdaws.
Peb tab tom thov Vajtswv “pub mov rau peb muaj noj hnub no” lossis thov pub rau yam uas peb ntshaw?
Thov Vajtswv,
Tus Tswv, nyuam yaus ua koj tsaug vim koj txoj kev ua zoo, ua ncaj ncees thiab kev tiv thaiv muaj pub rau nyuam yaus. Thov Koj siv nyuam yaus qhia Koj txoj kev hlub rau cov neeg txomnyem nyob ib ncig ntawm nyuam yaus. Amees.
Nyeem Vajluskub hauv peb lub xyoo: II.Xwmtxheej Vajntxwv 13:1-14:1
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
