Pajlug 21:30-31; Mathais 19:23-26
Nqe cim:
“Yexus tsa qhovmuag saib lawv thiab teb hais tias: Neeg ua tsis tau, tiamsis Vajtswv ua tau ib puas tsav yam huv tibsi.” (Mathais 19:26)
Lus nug rau sawvdaws xav:
– Vajtswv tus peevxwm tau qhia tshwm licas hauv Pajlug 21:30-31?
– Vim licas tej kev txawjntse, hwjchim, nyiaj txiag tsis pab tau kom tibneeg txais tau txojsia ibtxhis?
– Peb yuav ua lubneej zoo licas thaum zeem paub Vajtswv tus peevxwm?
Vajtswv muaj hwjchim loj tshajplaws. Vajntxwv Xalumoos zeem paub meej hais tias txawm yog tibneeg muaj “lub tswvyim, txojkev txawj ntse thiab kev totaub” los tawmtsam tsis yeej tus Tswv ib zaug li. Lub tswvyim yog yam cheemtsum hauv lubneej, Vajntxwv Xalumoos tau thov muaj tswvyim los coj tus Tswv haivneeg, thiab tus Tswv pub tswvyim rau nws. Tus Tswv hais tias: “Kuv yuav pub kom koj muaj tswvyim thiab kev txawj ntse. Kuv yuav pub kev muaj txiag npluanuj, thiab kom koj lub koob meej nrov ncha tshaj cov vajntxwv uas nyob ua ntej koj lossis nyob tom qab koj” (II Xwmtxheej 1:12). Tiamsis txawm yog tau pub muaj tswvyim tshaj lwm tus, los Vajntxwv Xalumoos yeej totaub txog kev muaj nrim ntawm tibneeg, tsis muaj leejtwg yuav siv nws lub zog tawmtsam yeej tus Tswv.
Vajtswv tus peevxwm qhia tshwm dhau ntawm kev muaj yeej hauv tshav rog. Daim duab hais txog tus nees ua yamntxwv rau lub zog ntawm tej tubrog. Nees muaj peevxwm khiav ceev, muaj zog, muaj qabhau tseemceeb hauv tshav rog. Qhov uas muaj tsheb nees thiab tubrog caij nees coob qhia tshwm kev muaj muaj zog ntawm cov tubrog (I Vajntxwv 10:26-28). Npaj cuabyeej zoo rau cov tubrog yog yam tseemceeb, tiamsis tsis tau yog yam tseemceeb tshajplaws vim kev muaj yeej nyob txij ntawm tus Tswv. Vajntxwv Daviv tau qhia txog nws kev paub hauv kev ua rog li no: “Muaj qee leej cia siab rau lawv tej tsheb nees thiab ibtxhia cia sia rau lawv tej nees, tiamsis peb cia siab rau tus TSWV uas yog peb tus Vajtswv lub hwjchim” (Ntawv Nkauj 20:7).
Thaum Tswv Yexus tseem ua haujlwm hauv ntiajteb no, cov Timthawj nug Nws hais tias leejtwg thiaj yuav tau kev cawmdim thaum lawv hnov tus Tswv tej lus qhia hais tias “ib tug ntxhuav nkag lub qhov koob tseem yoojyim dua ib tug neeg npluanuj mus rau Vajtswv lub tebchaws”. Tswv Yexus teb hais tias: “Neeg ua tsis tau, tiamsis Vajtswv ua tau ib puas tsav yam huv tibsi” (Mathais 19:23-26). Tibneeg txawm yuav muaj tswvyim kev txawjntse txog qib twg, npluanuj, muaj hwjchim npaum licas, los puavleej vamkhoom tsis tau tej ntawd pab kom tau mus hauv Vajtswv Lub Tebchaws. Yam yuav pab kom txais tau kev zamtxim thiab kev cawmdim tsis yog los ntawm tibneeg vim tsuas muaj Vajtswv xwb thiaj muaj hwjchim pub rau tibneeg tau txojsia ibtxhis. Peb tsuas tau kev cawmdim thaum zeem paub hais tias Vajtswv muaj hwjchim loj tshajplaws, cia siab ntsoov rau kev theej txhoj, kev cawmdim, thiab txojsia ibtxhis tau muab pub dhau ntawm Tswv Yexus Khetos. Peb siv tej tswvyim, peevxwm, nyiaj txiag los ua tus Tswv tes haujlwm, tiamsis tsuas yog kev ntseeg tus Tswv thiaj ua rau peb muaj kev cawmdim. Zeem paub Vajtswv tus peevxwm pab peb cia siab ntsoov rau tus Tswv thiab vamkhom Nws txhua hnub hauv lubneej.
Thov Vajtswv,
Tus Tswv, thov ua tsaug vim Koj tej lus qhuab ntuas nyuam yaus ua neej txhua hnub. Thov kom nyuam yaus paub hwm Koj, zeem paub nyuam yaus kev muaj nrim kom xwv nyuam yaus paub nrhiav Koj txojkev taw qhia txhua hnub. Nyuam yaus tuav Yexus Khetos lub npe thov, Amees.
Peb zeem paub Vajtswv tus peevxwm tabtom ua haujlwm licas hauv peb lubneej?
Nyeem Vajluskub hauv peb lub xyoos: II Kevcai 15
Kênh Youtube BHKTHN:
