Klei Aê Diê Blŭ: Klei Bi Hriêng 21:30-31; Y-Mathiơ 19:23-26
Êlan kliăng: “Ƀiădah Yêsu dlăng kơ digơ̆ leh anăn lač, “Klei anăn mnuih amâo dưi ngă ôh, ƀiădah Aê Diê dưi ngă sơăi jih jang klei” (Y-Mathiơ 19:26)
Klei êmuh ksiêm mĭn: Si klei dưi Aê Diê prŏng hĭn bi êdah hlăm Klei Bi Hriêng 21:30-31? Ya ngă klei thâo mĭn, klei dưi, prăk mah amâo dưi đru anak mnuih mă tŭ klei hdĭp hlŏng lar ôh? Si ngă drei srăng hdĭp tơdah thâo kral klei dưi Aê Diê prŏng hĭn?
Aê Diê djă klei dưi prŏng hĭn. Mtao Y-Salômôn bi klă leh wăt tơdah anak mnuih mâo klei thâo mĭn, klei thâo săng amâodah klei bi kčĕ bŏ hŏng klei mnêč dưn kăn dưi bi kdơ̆ng hŏng Yêhôwa rei. Klei thâo mĭn jing sa klei čiăng yuôm kơ klei hdĭp, Mtao Y-Salômôn wah lač akâo klei thâo mĭn čiăng dưi kiă kriê phung ƀuôn sang Aê Diê, leh anăn Aê Diê brei leh kơ ñu, Aê Diê lač, “snăn Kâo brei yơh klei thâo mĭn leh anăn klei thâo săng kơ ih. Kâo srăng brei mơh kơ ih klei mdrŏng, ngăn dŏ, leh anăn klei mpŭ, klei msĕ snăn phung mtao êlâo kơ ih leh anăn êdei kơ ih amâo mâo ôh” (II Klei Yăl Dliê 1:12). Wăt tơdah Aê Diê brei kơ ñu mâo klei thâo mĭn amâo mâo pô mđơr ôh, Mtao Y-Salômôn ăt thâo săng mơh kơ klei mâo kdriêl anak mnuih, amâo mâo pô dưi bi kdơ̆ng hŏng Yêhôwa hŏng klei ktang ñu pô ôh.
Klei dưi Aê Diê prŏng hĭn bi êdah hlăm klei dưi hlăm klei bi blah. Aseh bi hmô kơ klei ktang phung kahan. Aseh dưi êran pral, mơai leh anăn jing yuôm snăk hlăm klei bi blah ngă. Ênoh êdeh aseh leh anăn phung đĭ aseh bi êdah kơ klei ktang phung kahan (I Bruă Mtao 10:26-28). Mprăp bi jăk kơ phung kahan jing sa klei yuôm, ƀiădah ka djŏ klei yuôm hĭn ôh kyuadah klei dưi hlăm klei bi blah jing tui si Yêhôwa dê. Mtao Y-Đawit brei thâo kơ klei ñu bi knal hlăm klei bi blah snei, “Mâo phung đa đa knang kơ êdeh, đa đa knang kơ aseh; ƀiădah hmei srăng knang kơ anăn Yêhôwa Aê Diê hmei” (Klei Mmuñ Hđăp 20:7).
Hlăk Khua Yang Yêsu mă bruă ti lăn ala, phung ƀĭng kna êmuh Ñu, snăn hlei srăng tlaih tơdah digơ̆ hmư̆ Ñu lač “ênưih hĭn sa drei aseh samô mŭt ti ƀăng êrŭm hŏng sa čô mdrŏng mŭt hlăm ƀuôn ala mtao Aê Diê.” Khua Yang lŏ wĭt lač, “Klei anăn mnuih amâo dưi ngă ôh, ƀiădah Aê Diê dưi ngă sơăi jih jang klei” (Y-Mathiơ 19:23-26). Wăt tơdah anak mnuih thâo mĭn lu, mdrŏng sah, mâo klei dưi prŏng dưn mơh, jih jang mnơ̆ng anăn amâo dưi đru ñu dưi mŭt hlăm ƀuôn ala mtao Aê Diê ôh. Klei čoh čuăn čiăng dưi mâo klei pap brei kơ klei soh leh anăn mâo klei bi mtlaih amâo kbiă hriê mơ̆ng anak mnuih ôh kyuadah knŏng hjăn Aê Diê yơh dưi brei kơ anak mnuih klei hdĭp hlŏng lar. Drei dưi mâo klei bi mtlaih knŏng tơdah drei thâo kral Aê Diê jing Pô mâo klei dưi prŏng hĭn, đăo kơ klei Ñu bi mtlaih, klei pap brei kơ klei soh leh anăn brei klei hdĭp hlŏng lar hlăm Khua Yang Yêsu Krist. Drei yua klei thâo mĭn, klei thâo, prăk kăk pioh mă bruă kơ Khua Yang, ƀiădah amâo mâo klei mkăn ôh êngao kơ klei đăo kơ Khua Yang yơh srăng mâo klei bi mtlaih. Thâo kral klei dưi Aê Diê prŏng hĭn đru drei đăo kluôm ênŭm kơ Ñu leh anăn knang kơ Ñu hlăm klei hdĭp.
Si ngă drei thâo kral klei dưi Aê Diê prŏng hĭn dôk mă bruă hlăm klei hdĭp drei?
Wah lač: Ơ Khua Yang, kâo lač jăk kơ Ih kyuadah Klei Ih Blŭ bi hriăm kâo hlăm klei hdĭp. Đru kâo thâo huĭ mpŭ kơ Ih, thâo săng kơ kâo pô jing mnuih mâo knhal čiăng kơ kâo tui duah nanao klei atăt gai mơ̆ng Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
