1 Xamuyees 15:13-24
Nqe cim:
“Mloog tus TSWV lus zoo dua qhov uas muab tej yaj zoo nkauj tua fij rau nws. 23Tus neeg uas ntxeev siab rau tus TSWV ua txhaum loj ib yam li tus uas txawj tso dab, thiab tus neeg uas tawv ncauj ua txhaum loj ib yam li tus uas pe mlom…” (1 Xamuyees 15:22b-23a)
Lus nug rau sawvdaws xav:
– Vajntxwv Xa-ules txhob txwm ua txhaum Vajtswv Txojlus li cas?
– Thaum uas raug tus cev lus Xamuyees ntuas, Vajntxwv hais daws nws zaj li cas?
– Nuj nqis thaum tso kev txhaum tsis tas siab yog dab tsi?
– Peb kawm tau dab tsi dhau zaj xwm no?
Txij li thaum tus cev lus Xamuyees tau ywg roj tsa Xa-ules ua vajntxwv kav cov Yixayees, Vajntxwv tau ua rog nrog tagnrho nws cov yeeb ncuab uas nyob ib puag ncig thiab ntaus mus txog qhov twg yeej txog qhov ntawd (1 Xamuyees 14:47-48). Tiamsis tom qab ntawd, Vajntxwv Xa-ules tus cwjpwm hloov lawm. Muaj ib hnub, dhau los ntawm tus cev lus Xamuyees, Vajtswv hais kom Vajntxwv Xa-ules tua cov Amalej thiab tagnrho lawv tej tsiaj txhu huv tibsi mus, rau qhov lawv yog cov neeg uas phem heev tau tav kev thiab ntaus cov Yixalayees thaum uas lawv tawm hauv tebchaws Iziv los (Khiavdim 17:8-16). Vajntxwv Xa-ules ntaus yeej cov Amalej, ntes tau vajntxwv Ankas, tiamsis nws tseem rov tso vajntxwv Ankas mus thiab tseg tej tsiaj txhu uas zoo nkauj cia.
Thaum tus cev lus Xamuyees ntuas, Vajntxwv Xa-ules tawv ncauj tsis kam lees nws kev txhaum. Vajntxwv hais ob zaug rau Xamuyees hais tias, “Kuv twb mus ua raws li tus TSWV hais tas lawm” (nqe 13), thiab “Kuv yeej mloog tus TSWV lus, kuv twb mus ua raws li nws hais lawm” (nqe 20). Nws tsis lees txim, tseem liam txim hais tias yog cov pejxeem tau tseg cov tsiaj txhu zoo nkauj coj mus fij rau Vajtswv! Ntawd yog ib lolus hais dag daws nws zaj zoo li tseeb kawg nkaus! Vim Vajtswv thiab vim cov pejxeem yeej tsis yog vim kuv! Tus cev lus Xamuyees thiaj tau ntuas hais tias: Mloog tus TSWV lus zoo dua qhov uas muab tej yaj zoo nkauj tua fij rau Nws, thiab vim vajntxwv tso tus Tswv tej lus tseg, Vajtswv thiaj tso nws tseg. Thaum tsis muaj lus hais tau lawm vajntxwv Xa-ules lam lees txim hais tias nws tau ua txhaum Vajtswv tej lus samhwm lawm, tiamsis tseem nrhiav rawv kev tiv thaiv nws tus kheej hais tias “Kuv ntshai kuv cov tubrog kuv thiaj ua raws li lawv xav yuav xav tau” (nqe 24). Tsis tas li ntawd xwb, nws tseem yuam tus cev lus Xamuyees hais tias, “Kuv yeej ua txhaum lawm tiag, tiamsis thov koj cia kuv tau ntsejmuag tabmeeg kuv cov thawjcoj thiab cov pejxeem Yixalayees” (1 Xamuyees 15:30)!
Tus cev lus Xamuyees nyuaj siab thiab poob siab heev vim Vajntxwv Xa-ules tso kev txhaum tsis tas siab, txij thaum ntawd los nws tsis xav ntsib vajntxwv Xa-ules lawm. Tom qab ntawd, thaum muaj kev sib ntaus sib tua nrog cov Filitees, vajntxwv Xa-ules peb tug tub tuag, thiab vajntxwv kuj cim civ rov tua nws tuag (1 Xamuyees 31:6). Thaum vajntxwv Xa-ules tso kev txhaum tsis tas siab tsis tau txais Vajtswv hlub tshua thiab zam txim, nuj nqis yog nws lub neej ua vajntxwv tswj kav thiaj xaus mus ib yam li tus cev lus Xamuyees tau hais lawm.
Niaj hnub nimno, Vajtswv siv Vaj Ntsujplig ceebtoom hauv txhua tus ntseeg lub siab tuaj. Thov Vajtswv pab kom peb zeem paub Vaj Ntsujplig kev ceebtoom, tas siab lees txim, tso kev txhaum tseg thiaj tau Vajtswv zam txim rau peb.
Thov Vajtswv,
Vaj Leej Txiv Tus uas muaj lub siab hlub tshua, nyuam yaus ua koj tsaug vim thaum nyuam yaus tso kev kev txhaum tas siab Koj zam txib thiab tsis nco qab nyuam yaus tej kev txhaum lawm. Thov pab nyuam yaus txhob nrhiav kev daws lossis tsis tas siab tso kev txhaum thaum uas tau Vaj Ntsujplig ceebtoom li vajntxwv Xa-ules. Nyuam yaus tuav Tswv Yexus Khetos lub npe thov, Amees.
Muaj qhov kev txhaum twg uas peb cheemtsum tso kiag hnub no?
Nyeem Vajluskub hauv peb lub xyoos: 3 Yauhas
Kênh Youtube BHKTHN:
