Klei Aê Diê Blŭ: I Y-Samuel 15:13-24
Êlan kliăng: “Nĕ anei, klei gưt asăp jing jăk hĭn kơ klei ngă yang, leh anăn klei dôk hmư̆ jing jăk hĭn kơ prăi biăp knô. Kyuadah klei bi kdơ̆ng jing msĕ si klei soh mdian, leh anăn klei khăng kŏ jing msĕ si klei wê leh anăn klei kkuh rup yang. …” (I Y-Samuel 15:22b-23a)
Klei êmuh ksiêm mĭn: Si klei mtao Y-Sôl čŏng čiăng ngă mdê soh hŏng klei Aê Diê mtă? Si klei mtao blŭ mgang kơ klei ñu ngă tơdah khua pô hưn êlâo Y-Samuel êmuh? Ya jing boh jhat mơ̆ng klei kmhal mkrah dưh? Ya klei hriăm kơ drei mơ̆ng klei yăl dliê anei?
Dơ̆ng mơ̆ng hlăk khua pô hưn êlâo Y-Samuel trôč êa ƀâo mngưi brei jing mtao kơ phung Israel, mtao Y-Sôl bi blah hŏng jih jang phung roh jŭm dar, djăp anôk ñu bi blah mâo klei dưi sơăi (I Y-Samuel 14:47-48). Ƀiădah êdei anei, knuih mtao Y-Sôl bi mlih. Mâo sa hruê, hŏng khua pô hưn êlâo Y-Samuel, Khua Yang mtă kơ mtao Y-Sôl bi rai jih phung Amalek leh anăn wăt jih jang hlô mnơ̆ng diñu rông, kyuadah diñu jing phung ƀuôn sang jhat ƀai snăk, diñu bi kgăn êlan leh anăn kăp gang ngă jhat kơ phung Israel hlăk digơ̆ kbiă mơ̆ng čar Êjip (Klei Kbiă 17:8-16). Mtao Y-Sôl bi blah dưi leh hŏng phung Amalek, mă hdĭp mtao Y-Agak, bi rai jih jang phung ƀuôn sang, ƀiădah amâo bi mdjiê ôh mtao Y-Agak leh anăn lŏ pioh hlô mnơ̆ng jăk hĭn.
Tơdah khua pô hưn êlâo Y-Samuel nao êmuh, mtao Y-Sôl lŏ khăng kŏ amâo tŭ klei pô ngă soh leh ôh. Dua blư̆ mtao lač hŏng khua pô hưn êlâo Y-Samuel snei, “Kâo ngă leh tui si klei Yêhôwa mtă” (êlan 13), leh anăn “Kâo gưt leh asăp Yêhôwa, kâo nao leh ngă tui si klei Yêhôwa mtă leh brei kâo nao.” (êlan 20). Hrô kơ tŭ klei soh pô ngă, mtao Y-Sôl lŏ čhal kơ phung ƀuôn sang pioh leh hlô mnơ̆ng rông jăk hĭn čiăng myơr ngă yang kơ Yêhôwa Aê Diê! Sa klei blŭ mgang myang êdi! Kyua Aê Diê leh anăn kyua phung ƀuôn sang, amâo djŏ kyua kâo pô ôh! Khua pô hưn êlâo Y-Samuel ƀuah mtao ktang tĭt snei, klei gưt asăp kơ Aê Diê jing jăk hĭn kơ klei ngă yang, leh anăn kyuadah mtao hngah leh kơ klei Yêhôwa Aê Diê Blŭ, kyuanăn Aê Diê srăng hngah kơ mtao mơh. Tơdah amâo lŏ mâo êlan tăng mgăl ôh, mtao Y-Sôl hŏng klei mgô̆ tŭ klei soh ñu gao klei Yêhôwa mtă, ƀiădah ăt gĭr lŏ mgang mơh “kyuadah kâo huĭ kơ phung ƀuôn sang leh anăn gưt asăp kơ diñu” (êlan 24). Ka jih mơh, mtao Y-Sôl lŏ akâo kơ khua pô hưn êlâo Y-Samuel, “Kâo ngă soh leh, ƀiădah mpŭ bĕ kơ kâo ară anei ti anăp phung khua mduôn phung ƀuôn sang kâo leh anăn ti anăp phung Israel, leh anăn lŏ hriê bĕ mbĭt hŏng kâo čiăng kơ kâo dưi kkuh mpŭ kơ Yêhôwa Aê Diê ih” (I Y-Samuel 15:30)!
Khua pô hưn êlâo Y-Samuel ênguôt snăk, luč klei čang hmăng kyuadah mtao Y-Sôl knŏng kmhal kơ klei soh mkrah dưh, amâo kmhal sĭt ôh, kyuanăn dơ̆ng mơ̆ng anăn ñu amâo lŏ čiăng bi tuôm hŏng mtao Y-Sôl ôh. Êdei anei, hlăm klei bi blah ktang hŏng phung Philistin, tlâo čô anak êkei mtao Y-Sôl djiê, mtao ăt bi mdjiê asei ñu pô mơh (I Y-Samuel 31:6). Tơdah mtao Y-Sôl amâo sĭt jih ai tiê kmhal kơ klei soh čiăng kơ Aê Diê pap brei, boh jhat mă tŭ jing klei jing mtao jih ruê̆ mơh, djŏ msĕ si klei khua pô hưn êlâo Y-Samuel hưn leh.
Hruê anei, Aê Diê brei Yang Mngăt Jăk kčŭt ƀuah hlăm ai tiê grăp čô anak ƀuôn sang Ñu. Akâo Khua Yang brei drei thâo kral klei Yang Mngăt Jăk kčŭt ƀuah, tŭ klei soh pô ngă leh, hưn klei soh leh anăn jih ai tiê kmhal sĭt kơ klei soh čiăng dưi mă tŭ klei Khua Yang pap brei.
Mâo mơ̆ ya mta klei soh brei drei kmhal hĕ hŏng Khua Yang hruê anei mtam?
Wah lač: Ơ Ama Pô jăk, mdrŏng hŏng klei pap, bi mni lač jăk kơ Ama kyua tơdah kâo kmhal sĭt hŏng jih ai tiê, lui klei ƀai, snăn Ama srăng lăm jih klei soh kâo, amâo srăng lŏ hdơr klei soh kâo ôh. Akâo Khua Yang đăm brei kâo dêč mgang, amâo kmhal mkrah dưh ôh, tơdah mâo klei kčŭt ƀuah mơ̆ng Yang Mngăt Jăk Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: III Y-Yôhan
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
