Luka 15:11-24
“Dang ei iĕm athei tơbral, wih tơ ‘Bok Kei-Dei dơ̆ng, na ‘Bok Kei-Dei gô pơklaih yoch iĕm păng ăn kơ iĕm hiôk chơt” (Tơdrong jang 3:19)
Nơ̆r jet tơchĕng pơwao:
– Kon drŏnglo hơdruch apinh ‘bă sư tơdrong kiơ?
– Sư oei pơm kiơ păng puh pơ̆k lăm tơdrong kiơ?
– Đơ̆ng tơdrong kiơ na sư gơh mơnat păng jing kon dơ̆ng lăm hnam dơnŏ?
– Bai pơhrăm ‘nâu tơ’blŏk kơ ih tơdrong kiơ?
Kră Yang Yêsu đei roi hơ’mon kơ minh ‘nu bơngai kon tơklah đơ̆ng ‘Bă sư wă kơnhăm kơ tơdrong ‘mêm ‘Bă kơpal plĕnh kơplah kon bơngai băt tơbral, wih brŏk tơ Kră Yang. Lăm tơdrong hơ’mon ‘nâu, kon drŏnglo hơdruch apinh ‘bă sư klah asong sư mŭk tơmam. Tơdrong ‘nâu tơplơ̆ hăm tơdrong juăt lu bơngai Juđê, juăt hmă sư bơngai ‘bă pơpioh chă klah asong mŭk tơmam ăn kơ lu kon sư. Na bơngai kon sâu pơm thoi noh tơ’bôh sư thoi minh ‘nu bơngai kơ chu apinh ‘bă sư klah asong mŭk tơmam ăn kơ sư adrol. Mă khan lei ră, ‘bă sư kư̆m chu klah asong mŭk tơmam kơ sư. Đơ̆ng noh sư weh đơ̆ng ‘bă sư na năm tơ anih ataih, tơ ei sư pơm kư̆ kă, pơhuach đĭ mŭk tơmam sư. Na lăm pơlei ‘nei đei pơngot rơwĕt, sư pă đei tơmam sa bơih na sư wei nhŭng đe tơmir, mă khan nhŭng noh tơmam ‘mê̆ krưp hăm bơngai Juđê. Mălei tơdrong lŭch hloh sư pơngot rơwĕt, ‘mah sa tơmam đơ̆ng nhŭng sa mălei kơ bĭ bu mơnat kơ sư.
Kơplah tơ’bơ̆p tơdrong pơmat tat truh lăm chăl arih, jơ noh kon drŏnglo hơdruch băt ‘blŏk hơdơ̆r, mơn kơdih pơm yoch bơih păng ‘blŏk hơdơ̆r kơ tơdrong ‘mêm đơ̆ng lăm hnam dơnŏ. Sư tơchĕng chă đon wă wih brŏk tơbral păng pă hơnhŏ krao inh kon dơ̆ng păng lăng inh thoi minh ‘nu bơngai jang kơ ih đĕch. Thoi noh, na sư iung brŏk năm khan kơ ‘bă sư. ‘Bă sư ‘mêm kơ sư dêh, ‘bă sư tơmang ‘bôh sư bơih, ‘bă sư lăng ‘brơ̆k mơnat na “tơkan” “kuăr chŭm sư.” Bơngai mă hiong đơ̆ng ‘bă sư đunh. Hloh kơ noh dơ̆ng, ‘bă sư wơh hloi lu bơngai jang kơ sư na khan: Iŏk ao mă ‘lơ̆ng bĕ, pơhrŭk ăn kơ sư, iŏk tơkhiĕn tơ’bot ăn kơ sư păng pơtrô̆ ăn kơ sư chơkhŏ. Yua kơ sư thoi lĕ kơ lôch na dang ei arih dơ̆ng thoi noh lu sư ngôi pơchơt sŏng sa hơdai sư. ‘Nâu tơ’bôh tơdrong ‘mêm, tơdrong mơnat păng tơdrong ‘mêm hlĭch đơ̆ng ‘bă ‘măn kơ kon hơ’lơ̆p mă băt tơbral.
Kon drŏnglo hơdruch băt kơdih ưh kơsĭ minh ‘nu bơngai kon kơchu hăm ‘bă đĕch mălei sư kư̆m băt sư pơm “yoch hăm ‘Bok Kei-Dei” kơplah tơbral păng pơkă wă wih brŏk tơ ‘Bok Kei-Dei, sư tơchĕng jang kơ ‘bă sư đĕch, mălei đĭ jơhngơ̆m tơbral na sư đei nơ̆r tơl sư hloh kơ sư tơchĕng. Nơ̆r ‘Bok Kei-Dei lăm Tơdrong Pơđơ̆k 28:13 “Bơngai bu ôn tơdrong yoch sư ưh kơ đei pŭn hiôk; Mă-lei đei bu tơbral păng achăng lê̆ sư gô đei mơnat.” Kră Yang ‘Bok Kei-Dei ‘bĕnh kơ tơdrong ‘mêm mơnat, Sư huay kơ jô̆ yo kơ lu đe bu tơbral tơpă păng pơ̆n nuih wih brŏk tơ Sư.” (I Yôhan 1:9).
Kiơ̆ kơ kon bơngai juăt kơ tơchĕng păng ‘maih weh dah ôn tơdrong yoch, mălei Kră Yang ưh kơ lăp đon. Bơ̆n jing kon pơlei pơla Kră Yang bơih, băt kơ nơ̆r Kră Yang pơkă, na bơ̆n athei jah roi tơdrong yoch bơ̆n kơ Sư. Jah wih brŏk tơ Kră Yang na Kră Yang mơnat yoch bơ̆n.
Ơ Kră Yang, inh bơnê kơ Ih ‘mêm kơ inh. Apinh Ih tơgŭm inh ‘nĕ kơ ôn tơdrong yoch wă kơ inh pơ̆n nuih jah roi păng wih brŏk tơbral hăm Ih wă kơ Ih mơnat yoch inh. Krao khan yua anăn Kră Yang Yêsu Krist, Amen!
Lu bơ̆n hăm pơ̆n nuih jah roi tơdrong yoch, tơbral păng pŭ iŏk tơdrong glăi bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Giăng
Kênh Youtube BHKTHN:
