Pajlug 1:8
8 Kuv tub ‘e, cia li mloog koj txiv tej lus qhuab qhia,
thiab tsis txhob muab koj niam tej lus qhia tso tseg;
Lus nug rau sawvdaws xav:
- Leejtwg muaj feemxyuam cob qhia menyuam?
- Qhia menyuam txog yam dabtsi?
- Menyuam muaj feemxyuam ua licas rau niam txiv tej lus cob qhia?
- Peb yuav tsum nqis peev rau tus kheej yam dabtsi thiaj txawj qhia menyuam
mus rau qhov yog?
Phau Pajlug hais ntau txog kev cob qhia kom cov nyeem zeem paub txog Tus Tswv Yog Tus Muaj Tswvyim thiab ua tau lub neej muaj tswvyim. Ib yam tseemceeb hauv phau ntawv yog hais txog feemxyuam cobqhia menyuam thiab menyuam li feemxyuam hauv kev ua tib zoo mloog tej lus cob qhia.
Nqe Pajlug hnub no qhia rau peb txog peb yam tseemceeb. Tim ib, cob qhia menyuam yog leej niam thiab leej txiv li feemxyuam, ob tug puavleej muaj feemxyuam thiab muaj cai tib yam nkaus. Vajntxwv Xalumoos tau hais txog “txiv tej lus qhuab qhia” thiab “niam tej lus qhia”. Nyob hauv lub cuabyig, tsis hais cov ntseeg thiab cov tsis ntseeg, tsuas yog niam lossis txiv tib leeg xwb thiaj ua tes haujlwm tseemceeb no, thiab tu siab ntau, lawv raug ris lub nra hnyav rau kev qhia menyuam mus rau qhov tseeb qhov yog. Hais txog qabhau ntawm lub cuabyig rau kev qhuab qhia menyuam, Chuck Colson tus uas yog xibhwb sau ntaub ntawv thiab kuj yog xibhwb qhuab qhia Vajtswv Txojlus hais tias: “Yog tsis muaj cuabyig, peb cov menyuam yuav tsis muaj ib qhov chaw txawb rau kev ua zoo thiab yuav dhau mus ua cov neeg poob qis rau kev ua zoo. Cuabyig yog tibneeg thawj lub tsev kawm uas tau Vajtswv siv los cob qhia.”
Tim ob, lo lus “tej lus qhuab qhia” (instruction) nyob hauv paus lus muaj leej kev cob qhia thiab kev rau txim, hais txog ib kauj ruam tiv kev mob thiaj txais tau lub tswvyim zoo. Ua neej raws li tej lus cob qhia muaj tswvyim yuav raug them nqi thiab raug mob, tiamsis thaum kawg yuav tau txais nqi zog zoo heev.
Tim peb, lo lus “tej lus qhia” (law, teaching) yog hais txog tej kevcai (precept) lossis txojcai (statute), thiab tshwjxeeb raws li cov neeg Yudais, lo lus no yog hais txog Kaum Nqe Kevcai (Decalogue) lossis Mauxes Tsib Phau Ntawv (Pentateuch). Yog li ntawd, qhov tseemceeb ntawm kev cob qhia menyuam yog Vajtswv Txojlus. Qhuab qhia menyuam tsuas yog qhov uas coj lawv los cuag Vajtswv thiab Nws Txojlus, thiab ua neej raws li Vajtswv Txojlus qhia xwb.
Dhau qhov ntawd, menyuam kuj muaj ob feemxyuam hauv kev mloog niam txiv lus. Xubthawj yog “mloog”, hauv paus lus yog mloog los ntawm qhov uas ua tib zoo xav, totaub, thiab ua raws. Lo lus “mloog” tshwmsim tsawg tshaj yog 12 zaug nyob hauv Phau Pajlug, thiab muaj txog 8 zaug hauv 9 tshooj xubthawj. Tim ob yog “tsis txhob muab…tso tseg”, tsis yog tsuas mloog dhau ces tas tiamsis yuav tsum ua raws. Yog li ntawd, mloog thiab ua raws yog ob kauj ruam yuav tsum muaj kom loj hlob tiav (Yauhas 13:17; Yakaunpaus 1:19, 22).
Muab hais sau zog, yuav ua kom tiav tes haujlwm cob qhia menyuam, leej niam thiab leej txiv li feemxyuam yog nqis peev rau tus kheej kawm Vajtswv Txojlus, tomqab ntawd muab Vajtswv Txojlus qhia rau cov menyuam, kom lawv nqis peev ntxiv rau lawv lub neej los ntawm Vajtswv Txojlus.
Thov Vajtswv.
Vajtswv, thov pab nyuam yaus txhua hnub mloog thiab kawm xyaum Koj Txojlus, siv Koj Txojlus los yug nyuam yaus lub neej, nyuam yaus thiaj yuav siv tau Koj Txojlus los qhia tej menyuam thiab qhia cov uas Koj muab cob rau nyuam yaus. Amees.
Peb qhia menyuam txog yam dabtsi?
Nyeem Vajluskub hauv peb lub xyoos: Nkauj Quaj Ntsuag 1:16-2:9
Kênh Youtube BHKTHN:
