II-Xwmtxheej Vajntxwv 10:1-14
Nqe cim:
“Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse. Txhua yam uas koj ua koj yuav tsum nco ntsoov tus Tswv, nws thiaj yuav coj koj taug txojkev uas yog txoj tseeb” (Pajlug 3:5-6).
Lus nug rau sawvdaws xav:
- Cov Yixalayees tuaj hauv Sekhees thov Lehaunpau-as yam dabtsi ua ntej uas lawv yuav tsa nws ua vajntxwv?
- Lehaunpau-as mus thov leejtwg pab tswvyim rau nws?
- Vim licas nws tsis ua raws li cov laus neeg tej lus hais?
- Thaum mloog cov hluas lus, tsis mloog cov laus lus muaj xwm dabtsi?
- Yuav ua licas peb thiaj yuav ua tiav tus Tswv tes haujlwm?
Ib tsoom cov mloog txhua tus,
Tom qab uas vajntxwv Xalumoos tuag lawm, “cov Yixalayees” tuaj ua ke rau hauv lub nroog Sekhees tsa Xalumoos tus tub Lehaunpau-as ua vajntxwv. Ncua sijhawm ntawd Nenpas tus tub Yelaunpau-as tawmtsam Xalumoos thiab khiav mus nkaum nram tebchaws Iziv kuj rov qab los, nrog cov Yixalayees tuaj thov kom Lehaunpau-as txo lawv tej se kom sib, vim lawv twb ua “tej haujlwm hnyav heev” thiab them se hnyav heev thaum nws txiv kav lawm. Yog kam ua li ntawd, lawv yuav txaus siab ua nws pejxeem mus li.
Vajntxwv Lehaunpau-as mus thov tswvyim ntawm cov laus neeg, lawv ntuas vajntxwv kom hais tej lus haum cov pejxeem siab. Vajntxwv Lehaunpau-as tsis yuav raws li cov laus neeg tej lus qhia, nws txawm mus thov tswvyim ntawm cov neeg hluas uas nrog nws phaum. Lawv ntxias kom vajntxwv mus teb cov lus hnyav heev thiab tseem hem yuav muab haujlwm hnyav ntau ntxiv rau lawv ua thiab. Vim li ntawd, thiaj ua rau cov Yixalayees“ntxeev siab rau Daviv cov xeebntxwv” (nqe 19), thiab lub tebchaws thiaj tawg ua ob lub txij thaum ntawd los.
Thaum yuav txiav txim siab ua ib yam tseemceeb, vajntxwv Lehaunpau-as mus nrhiav tswvyim ntawm tibneeg. Ua ntej tshaj plaws, nws mus thov tswvyim ntawm cov laus neeg thiab tom qab ntawd nws thov cov hluas uas nrog nws ib phaum neeg, nws tsis thov tus Tswv pub tswvyim. Tsis yog li ntawd xwb, nws tseem tsis mloog cov laus neeg tej lus ntuas, nws txawm ua raws li cov hluas lub tswvyim ruam. Vim li ntawd, Lehaunpau-as thiaj tsis tau tus Tswv lub tswvyim txawj ntse, nws hais tej lus ruam khavtheeb thiab xav ua raws li nws lub siab nyiam. Vajntxwv Daviv uas yog vajntxwv Lehaunpau-as yawg tau qhia li no,“Cov neeg uas hwm tus Tswv, Nws yuav qhia kom lawv paub taug txojkev tseeb uas tsimnyog lawv taug” (Phau Ntawv Nkauj 25:12), vim vajntxwv Lehaunpau-as tsis hwm tus Tswv, tsis thov tsis nrhiav tus Tswv, vajntxwv thiaj txiav txim siab ua yuam kev lawm. Thiab vajntxwv Daviv kuj qhia hais tias, “Nws coj cov neeg txo hwjchim taug txojkev tseeb, thiab qhia kom lawv ua haum Nws siab” (Phau Ntawv Nkauj 25:9), tiamsis vim tsis txo hwjchim, vajntxwv Lehaunpau-as thiaj tsis ua raws li cov laus neeg tej lus ntuas.
Yakaunpaus qhia hais tias, “Yog nej leejtwg tsis muaj tswvyim, kom nws cia li thov ntawm Vajtswv, Vajtswv yuav pub tswvyim rau nws” (Yakaunpaus 1:5a) tiamsis thaum peb tsis txo hwjchim, ces peb yuav hais tias peb yog neeg ntse tsis tas thov Vajtswv zoo ib yam li vajntxwv Lehaunpau-as ntag. Ntau tus hluas nimno tsis mloog cov laus neeg tej lus qhia vim lawv xav hais tias, lawv yog tus ntse dua, lawv thiaj ua tsis tau tus Tswv tes haujlwm. Hwm tus Tswv thiab txo hwjchim yog ob yam uas yuav tsum muaj thiaj ua tau tiav txhua yam haujlwm.
Thov Vajtswv,
Tus Tswv, thov Koj qhia nyuam yaus paub taij thov tswvyim ntawm Koj thiab ua raws li Koj qhia, tsis txhob ua raws li nyuam yaus lub siab nyiam. Thov Koj pab kom nyuam yaus ua tau neeg txo hwjchim thiab mloog koj lus hauv txhua lub tsamthawj. Amees.
Ib tsoom cov mloog uas hmov thiab tshua,
Peb txiav txim siab ua raws li tus Tswv qhia lossis yog peb tabtom ua raws li peb lub siab nyiam?
Nyeem Vajluskub hauv peb lub xyoo: Exethaws 7:1-8:17
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
