Klei Aê Diê Blŭ: II Klei Yăl Dliê 10:1-14
Êlan kliăng: “Knang kơ Yêhôwa hŏng jih ai tiê, đăm knang ôh kơ klei mĭn ih pô. Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih” (Klei Bi Hriêng 3:5-6)
Klei êmuh ksiêm mĭn: Ya klei phung ƀuôn sang Aê Diê nao ti ƀuôn Sičem akâo kơ Y‑Rôbôam leh diñu mpŭ gơ̆ jing mtao? Hlei klei blŭ Y‑Rôbôbam êmuh? Ya ngă ñu amâo gưt hlue si phung khua mduôn mtă? Ya boh jhat mơ̆ng klei anăn? Si ngă čiăng kơ drei tŭ jing hlăm bruă Aê Diê?
Leh Mtao Salômôn djiê snăn “jih jang phung ƀuôn sang Israel” nao ti ƀuôn Sičem čiăng mjing Anak êkei mtao Y‑Rôbôam đĭ ngă mtao. Y‑Jêrôbôam, anak êkei Y‑Nêbat, dôk đuĕ dăp ti čar Êjip kơ klei soh bi dơ̆ng, ăt wĭt leh leh anăn mbĭt hŏng jih jang phung ƀuôn sang nao akâo kơ Y‑Rôbôam bi hrŏ klei ktrŏ kơ phung ƀuôn sang kyua diñu dôk hlăm klei ktrŏ leh anăn jiă ktrŏ hlăm ênuk mtao ama. Tơdah dưi ngă snăn digơ̆ srăng mă bruă kơ ñu.
Mtao Rôbôam bi trông hŏng phung khua mduôn, diñu lač kơ mtao ngă jăk hŏng phung ƀuôn sang. Amâo ư ai hŏng klei kčĕ thâo mĭn mơ̆ng phung khua mduôn, Mtao Y‑Rôbôam lŏ êmuh phung mda asei msĕ si ñu. Diñu lač kơ Y‑Rôbôam brei blŭ ktrŏ hŏng phung ƀuôn sang leh anăn arưp srăng mđĭ thiăm klei ktrŏ kdơ̆ng kơ phung ƀuôn sang. Hdră êlan kiă kriê anei ngă kơ “phung Israel dôk bi kdơ̆ng hŏng sang Y‑Đawit hlŏng truh kơ hruê anei” (êlan 19), lăn čar bi mbha mdua mơ̆ng hlăk anăn.
Hlăk êjai brei bi mklă sa klei yuôm bhăn snăn Mtao Rôbôam duah klei thâo mĭn anak mnuih. Êlâo hĭn, ñu êmuh klei mĭn phung khua mduôn leh anăn phung hlăk ai mdrăng hŏng ñu amâo êmuh ôh klei Aê Diê čiăng. Kyua anăn, hrô kơ hmư̆ klei kčĕ thâo mĭn phung khua mduôn, ñu hmư̆ klei kčĕ mluk phung hlăk ai. Ñu kƀah klei thâo mĭn Aê Diê brei leh anăn ngă bruă mluk kyua klei mgao, čiăng ngă tui si klei pô čiăng. Mtao Y‑Đawit, aê Mtao Rôbôam, lač leh: “Hlei mnuih huĭ mpŭ kơ Yêhôwa? Yêhôwa srăng bi hriăm ñu thâo êlan ñu srăng ruah” (Klei Mmuñ Hđăp 25:12), ƀiădah kyua Mtao Rôbôam kƀah klei huĭ mpŭ kơ Aê Diê, amâo duah ôh klei Aê Diê čiăng anăn mtao amâo mâo ôh klei Aê Diê atăt gai čiăng mâo klei bi mklă thâo mĭn. Leh anăn Mtao Y‑Đawit ăt mtô, “Ñu atăt phung luă gŭ hlăm klei kpă; bi hriăm phung luă gŭ êlan Ñu (Klei Mmuñ Hđăp 25:9), ƀiădah kyua kƀah klei luă gŭ Mtao Rôbôam amâo hlue ngă ôh klei phung khua mduôn kčĕ.
Y‑Yakơ mñă,“Tơdah sa čô hlăm phung diih kƀah klei thâo mĭn, brei ñu akâo kơ Aê Diê” (Y‑Yakơ 1:5a) ƀiădah lu blư̆ anak mnuih drei khăng kƀah klei luă gŭ, lač pô jing thâo mĭn anăn amâo êmuh ôh Aê Diê msĕ si Mtao Y‑Rôbôam. Lu phung hlăk ai hruê anei amâo mđing hmư̆ ôh klei kčĕ phung khua mduôn kyua bi mĭn pô thâo mĭn hĭn anăn amâo tŭ jing ôh hlăm klei mă bruă Aê Diê. Huĭ mpŭ kơ Aê Diê leh anăn luă gŭ jing dua mta brei mâo čiăng tŭ jing hlăm djăp mta bruă.
Drei khăng bi mklă hlue si klei Aê Diê mtô amâodah ngă tui si klei pô čiăng?
Wah lač: Ơ Khua Yang, akâo kơ Ih đru kâo thâo duah klei Aê Diê čiăng leh anăn hlue ngă klei Ih atăt gai hlăm djăp mta bruă amâo knang ôh hlăm klei thâo mĭn pô. Akâo kơ Ih đru kâo mâo klei luă gŭ leh anăn gưt asăp čiăng hlue ngă Klei Aê Diê Blŭ hlăm djăp boh klei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Êsther 7:1-8:17
Kênh Youtube BHKTHN:
