Pajlug 23:15-18
Nqe cim:
“Metub, yog koj ua ib tug neeg txawj ntse, mas kuv yuav zoo siab kawg li.” (Pajlug 23:15).
Lus nug rau sawvdaws xav:
– Menyuam txojkev ua neej ua rau niamtxiv lub neej zoo li cas?
– Vim li cas tsis tsimnyog muab peb piv rau cov neeg ua phem ua qias?
– Tus neeg hwm Vajtswv lub neej yuav zoo li cas?
– Yam dabtsi peb cheemtsum hloov kom ua rau niamtxiv zoo siab thiab ua rau Vajtswv tau ntsejmuag?
Vajntxwv Xalumoos hais txog txojkev sib txuas ntawm tus menyuam ua zoo thiab leej txiv txojkev zoo siab kawg nkaus. Xalumoos hais tias, “yog koj ua ib tug neeg txawj ntse, mas kuv yuav zoo siab kawg.” Txojkev zoo siab tsis yog qhia tshwm sab nraud ib vuag xwb tiamsis yog pib hauv leej txiv “lub siab” tuaj. Leej txiv yuav zoo siab heev thaum nws tus menyuam ua tau neeg txawj ntse, ua zoo los ntawm tes haujlwm, lus hais. Leej txiv yuav zoo siab heev thaum tus tub hais tej lus ntse ntsuav, lus zoo, dawbhuv. Qhov tseemceeb uas leej txiv qhia rau tus tub yog “hwm tus Tswv” txhua hnub, tsis yog muaj txhua yam txaus, koob npe nrov, npluanuj tsis ncaj ncees, yog li ntawd tsis txhob muab yus piv rau cov neeg ua phem, tsis txhob khib cov neeg txhaum thaum lawv vammeej. Lub homphiaj tseemceeb ntawm tus menyuam lub neej yog hwm tus Tswv thiab ua ncaj ncees “Yog koj ua li ntawd, koj lub neej yav tom ntej yuav kaj siab lug.” (nqe 18). Qhov no thiaj yog lub neej kaj siab, vammeej tsis paub kawg uas tus Tswv pub. Vajtswv yuav ua tiav tus neeg ncaj ncees txojkev cia siab tias yuav tau lub neej npluamias tamsim no thiab nyob mus ibtxhis.
Cov niamtxiv ntseeg Yexus txojkev zoo siab tshaj plaws yog cov menyuam paub hwm tus Tswv, rau qhov muaj txhua yam, koob npe tsuas yog nyob ib vuag xwb, tiamsis txoj sia yuav nyob mus ibtxhis tsis kawg. Ntau tus menyuam xav yuam kev thaum pom niamtxiv, tsevneeg txomnyem, raug thuam, yog li lawv xaiv taug txojkev tsis ncaj kom ua rau muaj nyiaj sai pab tsevneeg, thaum kawg poob rau lub txim txhaum. Txawm yog tib pliag ntshis npluanuj, los tom qab ntawd yuav raug nyiaj ntxias, txomnyem mus tas simneej, ua rau niamtxiv, tsevneeg txajmuag ntsuav. Tus uas sau tsab ntawv Yakaunpaus qhia hais tias: “Cov neeg uas ua siab ntev nyiaj tej kev tsimtxom, peb hu lawv ua cov uas tau koob hmoov. Nej twb hnov lawm hais tias Yauj yog tus uas ua siab ntev, thiab nej twb paub lawm hais tias tus Tswv npaj txhua yam rau Yauj thaum kawg. Rau qhov tus Tswv muaj lub siab hlub thiab hmov tshua.” (Yakaunpaus 5:11). Cov ntseeg Yexus yuav tsum “hwm tus Tswv” los ntawm tej lus hais, kev ua haujlwm. Txawm yog raug txomnyem ib ntu sijhawm los nws yuav tau Vajtswv ua zoo, koob hmoov, kev hlub mus li. Niamtxiv zoo siab tiv txomnyem tsuav yog menyuam ua neeg ntse mloog Vajtswv lus heev dua li uas menyuam muaj nyiaj ntau tiamsis ho poob rau kev txhaum, puas neej mus li.
Thov Vajtswv,
Vajtswv, ua tsaug Koj qhia nyuam yaus paub ua neeg ntse raws li Koj Txojlus dhau los ntawm niamtxiv tej lus qhuab ntuas. Thov Koj pab kom nyuam yaus niaj hnub ua neeg hwm Koj, ua rau niamtxiv zoo siab, thiab haum Koj siab txhua hnub. Nyuam yaus tuav Tswv Yexus lub npe thov, Amees.
Peb tej lus hais thiab haujlwm ua txhua hnub puas ua rau niamtxiv zoo siab thiab ua rau Vajtswv tau ntsejmuag?
Nyeem Vajluskub hauv peb lub xyoo: I Vajntxwv 12
Kênh Youtube BHKTHN:
