Klei Aê Diê Blŭ: Klei Bi Hriêng 23:15-18
Êlan kliăng: “Ơ Anak kâo, tơdah ai tiê ih thâo mĭn, ai tiê kâo srăng hơ̆k mơak” (Klei Bi Hriêng 23:15)
Klei êmuh ksiêm mĭn: Si klei hdĭp phung anak bi hmăi kơ amĭ ama? Ya ngă amâo brei drei tluh ôh kơ phung soh? Ya boh tŭ dưn srăng mâo kơ phung huĭ mpŭ kơ Aê Diê? Ya klei brei drei bi mlih hĕ čiăng hdĭp bi mơak kơ amĭ ama leh anăn bi guh kơang kơ Khua Yang?
Mtao Salômôn blŭ kñăm kơ klei bi djŏ plah wah klei anak mâo klei thâo mĭn hŏng klei ama mâo klei hơ̆k mơak. Ñu lač: “Tơdah ai tiê ih thâo mĭn, ai tiê kâo srăng hơ̆k mơak”. Klei mơak amâo djŏ bi êdah mă bhiâo knŏng ti êngao ôh ƀiădah kbiă hriê mơ̆ng “prôč tiê” ama. Ama hơ̆k mơak hĭn mơh tơdah anak bi êdah klei thâo mĭn, klei kpă ênô Aê Diê hlăm grăp bruă ngă, klei blŭ. Ama mơak kyuadah hŏng klei blŭ anak bi êdah kơ klei mĭn mâo klei bi hriăm mjuăt čiăng “blŭ klei djŏ”, klei kpă ênô, klei doh jăk. Klei yuôm hĭn ama mtă kơ anak jing “huĭ mpŭ kơ Yêhôwa grăp hruê” amâo djŏ duah ngăn dŏ, klei hing ang knŏng bhiâo, boh nik nak klei mdrŏng hŏng klei wê ôh, kyuanăn đăm tluh kơ phung soh ôh, kăn bi keh hŏng phung ƀai rei tơdah digơ̆ mâo klei mbhă myun. Klei kñăm čiăng yuôm hĭn kơ klei hdĭp anak jing huĭ mpŭ kơ Aê Diê leh anăn duah klei kpă ênô Ñu kyuadah “sĭt nik anak srăng mâo klei mưn êdei, leh anăn klei anak čang hmăng amâo srăng rai tuč ôh” (êlan 18). Anăn yơh jing klei jăk mơak, klei čăt đĭ amâo thâo tuč Khua Yang brei êdei anăp. Aê Diê srăng bi leh klei mnuih kpă čang hmăng kơ klei hdĭp êbeh dlai hlăm klei hdĭp anei wăt hlăm klei hdĭp hlŏng lar ênuk êdei.
Klei mơak prŏng hĭn kơ amĭ ama đăo kơ Krist jing klei phung anak huĭ mpŭ kơ Khua Yang, kyuadah dŏ ngăn klei hing ang srăng rai tuč, ƀiădah klei hdĭp hlŏng lar yơh amâo thâo rai tuč ôh. Mâo lu phung hlăk ai čhuai tơdah ƀuh amĭ ama diñu ƀun ƀin, knap mñai, tŭ klei arăng mưč, kyuanăn diñu mŭt hlăm êlan soh čiăng djăl mâo prăk đru gŏ sang, leh anăn lĕ hlăm kđông klei soh. Wăt tơdah mâo klei mdrŏng bhiâo riâo rit, tŭ klei prăk mah gai, tŭ klei hêñ jih hruê dôk hdĭp, ngă klei bi hêñ kơ amĭ ama, kơ gŏ sang. Pô čih hră Y‑Yakơ lač snei: “Nĕ anei, drei yap phung dôk kjăp jing phung hơ̆k mơak. Diih hmư̆ leh arăng yăl dliê kơ klei Y‑Yôp dôk kjăp, leh anăn diih ƀuh leh klei Khua Yang čuăn, si klei Khua Yang bŏ hŏng klei thâo pap leh anăn klei jăk” (Y‑Yakơ 5:11). Brei klei hdĭp phung đăo thâo “huĭ mpŭ kơ Aê Diê” hlăm klei blŭ leh anăn bruă ngă. Wăt tơdah srăng tŭ klei knap mñai bhiâo, ƀiădah êdei srăng mă tŭ klei jăk jĭn, klei pap leh anăn klei jăk Khua Yang. Amĭ ama tŭ klei knap mñai dưn ăt mơak mơh tơdah ƀuh anak hdĭp hŏng klei thâo mĭn tui si klei Khua Yang mtă hĭn kơ klei ƀuh anak mâo lu prăk ƀiădah lĕ hlăm klei soh, rai tuč hlăm klei hdĭp anei wăt hlăm klei hdĭp ênuk êdei.
Si ngă klei drei blŭ, bruă drei ngă grăp hruê bi mơak kơ amĭ ama leh anăn bi guh kơang kơ Khua Yang leh mơ̆?
Wah lač: Ơ Khua Yang, kâo lač jăk kơ Ih kyuadah hŏng klei amĭ ama bi hriăm hŏng klei djŏ Ih brei kâo hdĭp hŏng klei thâo mĭn tui si Klei Ih Blŭ. Akâo Ih đru kâo huĭ mpŭ kơ Ih nanao, bi mơak kơ amĭ ama leh anăn bi mơak kơ Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
