Daniyees 6:11-24
Nqe cim:
“Nej yog lub tseeb uas ci rau neeg ntiajteb pom kev. Lub nroog uas nyob saum roob yeej tsis muaj ib yam dabtsi yuav thaiv tau lub nroog ntawd.” (Mathais 5:14).
Lus nug rau sawvdaws xav:
- Vajntxwv Dali-us thiab nws tej nomtswv muaj nplooj siab xav sib txawv li cas rau Daniyees?
- Vim li cas vajntxwv thiaj hlub txhua Daniyees thiab xav pab Daniyees li ntawd?
- Cov neeg tsis tau ntseeg Yexus pheej xav ua li cas rau cov ntseeg Yexus lawm?
- Qhov ntawd qhia txog yam dab tsi thiab txhawb peb lub zog li cas?
Ib tsoom mloog txhua tus,
Hauv ntu Vajluskub hnub no, ua rau peb pom muaj ob yam kev sib tawm tsam thaum xav txog Daniyees. Thaum cov nomtswv kom Daniyees rau vajntxwv txog qhov uas Daniyees thov Vajtswv ces vajntxwv nrhiav tswvyim pab Daniyees (nqe 11-15). Thaum Daniyees raug txiav txim pov mus rau hauv qhov tsov ntxhuav ces vajntxwv nyuaj siab kawg “hmo ntawd nws tsis noj mov, tsis pub luag tuaj ua kev lomzem raws li ib txwm ua, thiab nws pw tsis tsaug zog ib hmos kaj ntug” (nqe 18). Thaum kaj ntug txoog hnub tom qab, vajntxwv khiav ncaj nraim mus rau tom qhov tsov ntxhuav thiab hu nrov nrov saib Daniyees puas tseem ciaj. Vajntxwv “zoo siab kawg” thaum hnov Daniyees teb hais tias nws tseem muaj siab nyob (nqe 19-23).
Vajntxwv Dali-us puas paub meej Daniyees tsuas pehawm cov neeg Yudas tus Vajtswv tibleeg xwb, tsis pehawm vajntxwv thiab nws tej vajtswv? Vajntxwv Dali-us paub zoo qhov ntawd! Vim thaum tsis tau muab Daniyees pov hauv qhov tsov ntxhuav vajntxwv tseem hais tias: “Thov koj tus Vajtswv uas koj muab siab npuab pab cawm koj” (nqe 16). Hnub tom qab thaum tuaj txog ntawm qhov kaw tsov ntxhuav, vajntxwv tsis hu hais tias Daniyees koj puas tseem ciaj? Tiamsis nws hais tias: “Daniyees uas yog Vajtswv tus muaj sia nyob tus tubtxib, koj tus Vajtswv uas koj muab siab npuab puas pab tau koj dim ntawm cov tsov ntxhuav los tsis tau?” (nqe 20). Paub tseeb hais tias Daniyees ua neej tsis zais nws kev ntseeg ntawm lwm tus thiab Daniyees yeej piav txog tej txujci tseemceeb uas Vajtswv tau los lawd rau vajntxwv tau mloog huv tibsi. Txawm li ntawd los, Daniyees yeej tsis raug vajntxwv ntxub thiab tsis pub nws ua nomtswv. Vajntxwv paub meej hais tias poob Daniyees ces yog poob ib tug neeg muaj kev txawj ntse, tus neeg ua qhov tseeb thiab ua ncaj ncees thiab yog ib yam kev poob loj heev rau vajntxwv lub tebchaws. Yog li ntawd, vajntxwv thiaj nyuaj siab kawg thaum pom Daniyees raug teebmeem thiab zoo siab heev thaum pom Daniyees tseem muaj sia nyob.
Hauv peb lub neej, peb yeej ua qhov zoo xwb tiamsis raug cov tsis ntseeg txob thuam, tiamsis yeej tseem muaj cov ua ncaj rau peb thiab ua zoo pab peb. Muaj tej zaum tus Tswv kuj siv tej neeg ib ncig ua cov tsav peb cai thiab ua cov thaiv ntis peb. Thaum muaj zoo li ntawd, peb cov uas yog Vajtswv tej me nyuam yuav tau kev txhawb zog, kom ua lub neej zoo nyob ua ke nrog txhua tus, tsis hais ntseeg lossis tsis tau ntseeg, cov uas ua zoo rau peb lossis ua phem rau peb. Peb kuj tsis txhob nrog cov tsis ntseeg muaj lus sib cav thiab khiav deb ntawm lawv, vim yog peb ua li ntawd ces peb lub neej yuav zoo li lub teeb uas muab phiab khwb lawm ntag.
Thov Vajtswv,
Tus Tswv, ua Koj tsaug uas Koj cia nyuam yaus nyob nrog cov tsis tau ntseeg. Thov Koj pab nyuam yaus ua lub neej zoo rau txhua tus kom qhia tshwm txog Koj rau lawv, txawv lawv ntseeg tsis ntseeg los xij. Thov Koj siv nyuam yaus ua rau coob leej ntau lus qhuas txog Koj lub npe. Amees.
Ib tsoom mloog uas hmov thiab tshua,
Peb puas muaj kev sib txuas nrog cov tsis tau ntseeg? Peb yuav ua li cas thiaj muaj kev sib txuas nrog lwm tus tsis tau ntseeg?
Nyeem Vajluskub hauv peb lub xyoo: Yauj 15
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
