Klei Aê Diê Blŭ: Y-Đaniel 6:11-24
Êlan kliăng: “Diih jing klei mngač kơ lăn ala. Sa boh ƀuôn prŏng dôk ti dlông čư̆ amâo dưi hgăm ôh.” (Y-Mathiơ 5:14).
Klei êmuh ksiêm mĭn: Si klei mdê knhuah hdĭp phung khua leh anăn mtao Đarius hŏng Y-Đaniel? Ya ngă Y-Đaniel mâo klei mtao khăp čiăng leh anăn duah êlan čiăng bi mtlaih ñu msĕ snăn? Si knhuah hdĭp phung ka đăo khăng mâo hŏng phung đăo? Si klei anei bi mđĭ ai leh anăn mñă kơ drei?
Hlăm trăn Klei Aê Diê Blŭ hruê anei, drei ƀuh dua mta knhuah bi klăk hlăm klei dôk dơ̆ng hŏng Y-Đaniel. Tơdah phung khua prŏng pah mă mtam mmông găl ƀuh Y-Đaniel dôk wah lač hŏng Aê Diê kăp blŭ jhat leh anăn kčŭt kơ mtao Đarius bi sĭt klei ghă (êlan 11-15) snăn mtao dê lĕ duah êlan čiăng mgang, bi mtlaih Y-Đaniel (êlan 14). Tơdah phung khua prŏng čang hmăng hwiê Y-Đaniel hlăm war êmông gu, bi mtao Đarius dê ruă ai tiê snăk tơdah hwiê Y-Đaniel hlăm ƀăng anăn, “kăm ƀơ̆ng huă mlam anăn, ñu amâo akâo phung mkăn hriê bi mơak kơ ñu ôh, leh anăn ñu amâo dưi pĭt ôh” (êlan 18). Mtao kgŭ ưm aguah ruăt nao kơ war êmông gu, ñu iêu êmuh Y-Đaniel hŏng asăp ênguôt si ngă ăt dôk hdĭp mơ̆, leh anăn mtao “mơak snăk” tơdah hmư̆ Y-Đaniel hưn ñu ăt êđăp ênang (êlan 19-23).
Si ngă mtao Đarius thâo mơ̆ kơ Y-Đaniel kkuh mpŭ knŏng hjăn kơ Aê Diê Yêhôwa phung Yuđa ƀiădah amâo kkuh mpŭ ôh kơ rup yang ñu amâodah kơ ñu? Sĭt nik mtao thâo klă! Hĭn kơnăn mơh, êlâo kơ hwiê Y-Đaniel hlăm war êmông gu, mtao ăt lač kơ Y-Đaniel: “Brei Aê Diê ih, Pô ih mă bruă nanao, bi mtlaih ih!” (êlan 16). Si hruê mgi ruăt nao ti ƀăng êmông gu, ñu amâo êmuh ôh “Ơ Y-Đaniel, ih dôk hdĭp mơ̆?”, ƀiădah ñu êmuh: “Ơ Y-Đaniel, dĭng buăl Aê Diê hdĭp! Aê Diê ih, Pô ih mă bruă nanao, dưi bi mtlaih ih mơ̆ng êmông gu mơ̆?” (êlan 20). Klă mngač leh, Y-Đaniel amâo tuôm mdăp ôh klei đăo ñu, leh anăn mtao Y-Đarius lu blư̆ leh hmư̆ ñu hưn kơ bruă prŏng prĭn Aê Diê ngă. Ƀiădah klei anăn amâo ngă ôh kơ mtao bi êmut amâodah amâo knang kơ Y-Đaniel. Hŏng mtao, klei luč Y-Đaniel jing luč sa čô mnuih jăk knhâo knhăk, kpă ênô, sĭt suôr, leh anăn jing sa klei luč prŏng prĭn kơ lăn čar, kyuanăn mtao ênguôt snăk tơdah Y-Đaniel tuôm hŏng klei jhat truh leh anăn hơ̆k mơak hlăk Y-Đaniel mâo klei bi mtlaih.
Hlăm klei hdĭp, tăp năng phung ka đăo kơ Aê Diê mưč mač drei wăt tơdah drei hdĭp jăk dưn, ƀiădah ăt adôk lu mnuih sĭt suôr, khăp čiăng leh anăn đru drei. Tăp năng Aê Diê ăt yua diñu mơh kăp dŏng mgang drei. Klei anăn bi mđĭ ai phung anak Aê Diê dôk hdĭp êđăp ênang, jăk mơak nanao hŏng jih jang mnuih, hŏng phung đăo wăt hŏng phung ka đăo, hŏng mnuih jăk amâodah mnuih ka jăk hŏng drei. Đăm mâo klei bi mĭn jhat êlâo leh anăn ñĕ đuĕ mơ̆ng phung ka đăo ôh, kyua tơdah ngă snăn, drei jing msĕ si pui kđen dưm ti gŭ jhưng.
Si ngă drei khăng bi tuôm hŏng phung ka đăo hlăm gŏ sang găp djuê leh anăn mah jiăng drei mơ̆? Ya drei ngă čiăng mkŏ mdơ̆ng klei bi mguôp hŏng digơ̆?
Wah lač: Ơ Khua Yang, bi mni lač jăk kơ Ih dưm jŭm găn kâo lu mnuih ka đăo. Akâo Khua Yang đru kâo dôk hdĭp sĭt suôr hŏng diñu leh anăn bi êdah Khua Yang kơ diñu, wăt tơdah si diñu wĭt lač dưn. Akâo Khua Yang yua kâo čiăng kơ Anăn Khua Yang dưi mâo lu mnuih mpŭ mni. .
Dlăng Klei Aê Diê Blŭ hlăm tlâo thŭn: Y-Yôp 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
