Mathais 10:16-18
Nqe cim zaj kawm hais tias:
“…Kuv xav kom nej ua neeg txawj ntse rau yam uas zoo; kuv xav kom nej ua li tus neeg ruam rau yam uas phem.” (Loos 16:19)
Lus nug rau sawvdaws xav:
– Tswv Yexus qhia cov thwjtim yam dabtsi ua ntej thaum Nws txib lawv mus qhia?
– Lawv cheemtsum ua neej zoo li cas kom tiv taus dhau sim siab thaum raug tsimtxom?
– Peb kawm tau zaj no rau yus zoo li cas?
Ua ntej txib cov thwjtim mus qhia Yexus zaj, Tswv Yexus qhia rau cov thwjtim paub txog tej kev tsimtxom uas lawv yuav raug, tsis tas li ntawd xwb Nws qhia kom lawv paub ua neej kom tiv taus tej kev sim siab. Thawj qhov tus Tswv hais tias, “Kuv txib nej mus” txhais tau tias tus neeg uas tus Tswv txib mus yuav ua neej, ua haujlwm zoo li Nws tus thwjtim, thiab tus Tswv yuav tiv thaiv rau qhov mus qhia Vajtswv Txojlus tsis yoojyim. “Hma” xav hais txog Xatas thiab nws cov tubtxib uas hnav plaub yaj (Mathais 7:15; Yauhas 10:12). Tus Tswv ntuas cov thwjtim kom yuav tsum ua neeg ntse, txawj hais lus thiab dawbhuv kom tiv taus dhau tej kev sim siab uas neeg ntiajteb thuam thiab tsimtxom.
Tus Tswv hais txog nab yog tus ntse. Nab paub qaij tej yam txaus ntshai, nws rau siab ntso rau lub homphiaj kom tiav. Tswv Yexus twb qaij mus kom tsis raug txawb zeb (Yauhas 8:59), thiab Nws tsis xav kom nrov npe thaum Nws pib ua haujlwm thiaj tsis muaj dabtsi thaiv Nws kev ua haujlwm (Malakaus 1:44-45). “Ntse” yog ua tib zoo saib kom zoo thiab npaj kom tsimnyog ua tiav tes haujlwm uas yus tau txib. Nyob ntsiag to txawv qhov uas zais, tsis lees yuav qhov tseeb uas peb yog Yexus tus thwjtim. Thaum ua tiav tes haujlwm mus qhia thiab tshaj tawm, tus Tswv tsis nyob ntsiag tos lawm Nws xav kom txhua tus paub tej haujlwm Nws ua thiab ua timkhawv rau txhua tus.
Nquab siv los ua khoom fij (Levis Kevcai 14:22), piv txog Vaj Ntsujplig (Mathais 3:16) piv txog kev dawbhuv. “Siab mos muag” lub ntsiab tiag yog dawbhuv, tsis xyaw ntxaws”, lo lus no siv ob zaug nyob hauv Phau Vajluskub Tshiab (Loos 16:19 thiab Filipis 2:15) thiab tau muab txhais hu ua “dawbhuv”, lossis “tsis ceb”. Thaum hais kom cia li muaj lub siab “mos muag zoo li tus nquab”, tus Tswv xav kom peb yuav tsum ua lub neej raws li Nws txoj lus uas hais tias“nej yuav tsum ua nej lub neej kom zoo, txawm yog cov neeg tsis ntseeg Vajtswv uas nrog nej koom zej koom zos nyob ua ke, lawv thuam hais tias nej ua phem los lawv yeej yuav pom tes haujlwm zoo uas nej ua thiab thaum txog hnub uas Yexus rov qab los lawv yuav qhuas Vajtswv.” (I Petus 2:12).
“Ntse li tus nab” txuas nrog qhov “siab mos muag li tus nquab” yog ceev tus kheej thaum cheemtsum thiab dawbhuv hauv kev ua neej kom ua tiav tes haujlwm tus Tswv cob nyob hauv ntiajteb no thiab tiv taus dhau tej kev sim ntawm qhov kev tawmtsam. Ntse li nab yuav cawm tau peb dim tej kev txaus ntshai tsis cheemtsum, dawbhuv li tus nquab pab kom peb qaij dhau kev txhaum. Ntse tsis ua siab phem, dawbhuv tsis raug dag. Thaum tswj kev ua neej ntse thiab dawbhuv nyob nrog ntiajteb, peb yuav tiv taus dhau tej kev nyuaj, sim siab los ua neej pub rau tus Tswv, “Kuv xav kom nej ua neeg txawj ntse rau yam uas zoo; kuv xav kom nej ua li tus neeg ruam rau yam uas phem.” (Loos 16:19).
Thov Vajtswv,
Peb Leej Txiv! Lub ntiajteb no thuam thiab tsimtxom Koj cov menyuam. Thov Koj pab kom nyuam yaus paub ua neeg ntse thiab dawbhuv kom ua tiav tes haujlwm Koj txib nyuam yaus ua. Thov Koj pab kom nyuam yaus ua rau Koj tau ntsejmuag. Nyuam yaus tuav Tswv Yexus lub npe thov, Amees.
Yog Tswv Yexus thwjtim, peb yuav ua neej zoo li cas nyob hauv lub ntiajteb uas puv npho kev sim siab no?
Nyeem Vajluskub hauv peb lub xyoo: Yauhas 10
Kênh Youtube BHKTHN:
