Klei Aê Diê Blŭ: Y‑Mathiơ 10:16-18
Êlan kliăng: “…kâo čiăng kơ diih thâo mĭn hlăm klei jing jăk, leh anăn êngeh hlăm klei jhat.” (Rôm 16:19)
Klei êmuh ksiêm mĭn: Ya klei Khua Yang mtô lač kơ phung ƀĭng kna êlâo kơ tiŏ nao diñu nao hiu mtô mblang klei đăo? Si brei diñu hdĭp čiăng dưi găn gao klei lông dlăng tơdah tuôm hŏng klei arăng ngă jhat? Si drei mă yua kơ drei pô mơ̆ng klei hriăm anei?
Êlâo kơ tiŏ nao phung ƀĭng kna hiu mtô mblang klei đăo, Khua Yang Yêsu hưn êlâo diñu srăng tuôm kơ klei arăng ngă jhat, mbĭt hŏng klei anăn Khua Yang mtô lač kơ diñu hdră êlan hdĭp čiăng dưi găn gaoklei lông dlăng. Êlâo hĭn Khua Yang lač, “Kâo tiŏ nao diih” mblang jing pô Khua Yang tiŏ nao srăng hdĭp, mă bruă hŏng anăn iêô jing phung ƀĭng kna Khua Yang, leh anăn Khua Yang srăng răng mgang, kyuadah bruă ngă anăn amâo êlưih ôh. “Phung asâo tan” čiăng lač kơ yang jhat leh anăn phung knuă diñu truă rup biăp (Y‑Mathiơ 7:15; Y‑Yôhan 10:12). Ñu mtă mtăn phung ƀĭng kna brei hdĭp thâo mĭn leh anăn êngeh doh jăk, čiăng dưi găn gao jih klei lông dlăng tơdah phung lăn ala đuĕ kbưi leh anăn ngă jhat.
Khua Yang blŭ kñăm kơ klei thâo răng ala jing. Ala khăng weh đuĕ kơ klei huĭ hyưt, klei rŭng ƀiădah knŏng kñăm čiăng bi leh hdră bruă kñăm leh. Khua Yang Yêsu Pô ăt tuôm weh đuĕ leh mơh čiăng tlaih mơ̆ng klei arăng bhĭr boh tâo (Y‑Yôhan 8:59), leh anăn Ñu dôk kriêp ñăt êjai gưl tal êlâo hlăm bruă Ñu čiăng đăm mâo klei bi kgăn (Y‑Markôs 1:44-45). “Thâo mĭn” jing thâo răng kơ klei êđăp ênang leh anăn klei găl drei pô čiăng dưi bi leh bruă jao prŏng. Dôk kriêp ñăt jing mdê hŏng klei mdăp, hngah klei sĭt nik kơ klei drei jing phung ƀĭng kna Khua Yang. Tơdah bi leh jih leh bruă mtô mjuăt leh anăn hiu hưn Klei Mrâo Mrang Jăk, Khua Yang amâo lŏ dôk kriêp ñăt ôh ƀiădah čiăng kơ jih jang mnuih thâo bruă Ñu ngă leh anăn hưn bi sĭt ti anăp jih jang mnuih.
Mgăm pioh yua kơ mnơ̆ng myơr ngă yang (Bruă Lêwi 14:22), rup bi knăl kơ Yang Mngăt Jăk (Y‑Mathiơ 3:16) bi hmô kơ klei êngeh, doh jăk. “Êngeh” mblang jing “doh, amâo bi lŭk hŏng mta mnơ̆ng mkăn ôh”, boh blŭ anei lŏ yua dua blư̆ mơh hlăm hdruôm hră Klei Bi Mguôp Mrâo (Rôm 16:19 leh anăn Philip 2:15) leh anăn mblang jing “doh jăk”, amâodah “amâo mâo klei čhŏ ôh”. Tơdah mtô lač “ênang msĕ si mgăm”, Khua Yang čiăng kơ drei “dôk dơ̆ng ƀơ̆ng huă jăk nanao ti krah phung amâo đăo, čiăng kơ tơdah diñu mčeh kơ diih jing mnuih ngă jhat, diñu dưi ƀuh bruă jăk diih ngă leh anăn mpŭ mni kơ Aê Diê ti hruê Ñu srăng lŏ hriê.” (I Y‑Pêtrôs 2:12).
“Thâo răng msĕ si ala” bi mguôp hŏng klei “ênang msĕ si mgăm” jing klei dôk ñăt kriêp tơdah klei anăn jing yuôm leh anăn doh êngeh hlăm klei hdĭp, čiăng bi leh bruă Khua Yang jao ti krah lăn ala, leh anăn găn gao klei lông dlăng mơ̆ng klei arăng bi kdơ̆ng. thâo răng msĕ si ala srăng đru drei dưi tlaih mơ̆ng klei huĭ hyưt amâo yuôm ôh, doh êngeh msĕ si mgăm đru drei amâo bi lŭk hlai mbĭt hŏng klei soh ôh. Thâo mĭn ƀiădah amâo mâo mnêč jhat ôh, doh êngeh ƀiădah amâo brei arăng dưi mplư ôh. Tơdah djă pioh knhuah hdĭp thâo mĭn leh anăn doh êngeh ti krah lăn ala, drei srăng dưi găn gao klei dleh dlan, klei lông dlăng čiăng dưi hdĭp kơ Khua Yang, “…kâo čiăng kơ diih thâo mĭn hlăm klei jing jăk, leh anăn êngeh hlăm klei jhat.” (Rôm 16:19).
Jing phung ƀĭng kna Khua Yang, si drei dôk hdĭp ti krah lăn ala bŏ hŏng klei lông dlăng anei?
Wah lač: Ơ Ama kâo khăp! Lăn ala đuĕ kbưi leh anăn ngă jhat nanao kơ phung anak ƀuôn sang Ih. Akâo Khua Yang đru kâo hdĭp thâo mĭn leh anăn doh êngeh čiăng dưi bi leh bruă jao Khua Yang tiŏ nao kâo. Brei knhuah hdĭp kâo bi guh kơang kơ Anăn Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
