Mathais 25:31-40
Nqe cim:
“Vajntxwv yuav teb hais tias, ‘Kuv qhia tseeb rau nej hais tias, thaum uas nej tau pab kuv cov kwvtij no ib tug, txawm yog tus ntawd muaj hwjchim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag!’” (Mathais 25:40).
Lus nug rau sawvdaws xav:
- “Neeg Leej Tub” yog hais txog leejtwg?
- Lub npe no tshwmsim thawj zaug nyob qhov twg?
- Tus Tswv hais licas rau cov neeg uas nyob sab xis?
- Vim licas lawv tau Vaj Leej Txiv foom koobhmoov thiab tau nyob hauv Vajtswv Lub Tebchaws?
- Peb kawm tau yam dabtsi pab rau peb kev ua tus Tswv haujlwm?
Lub npe uas Tswv Yexus pheej siv los hu nws tus kheej yog “Neeg Leej Tub”. Lub npe no tshwmsim thawj zaug yog nyob hauv Daniyees 7:13-14. Tus cev lus Daniyees ua zaj yogtoog pom plaub tug tsiaj loj tawm hauv hiavtxwv tuaj pivtxwv rau plaub lub tebchaws loj uas muaj hwjchim tswjkav ib ntus. Thaum kawg muaj ib tug zoo li Neeg Leej Tub nrog huab nrog cua los thiab Tus Uas Ib Txwm Muaj Nyob (Vaj Leej Txiv) muab lub hwjchim tswjkav tagnrho tibneeg qab ntuj rau Nws tuav mus ibtxhis. Phau Mathais 25 piav txog Tswv Yexus yuav rov qab los hauv lub ntiajteb muaj tshwjchim ci ntsa iab zoo li ib tug Vajntxwv thiab ib tug Txiav Txim uas yuav txiav txim rau tibneeg qab ntuj. Lub sijhawm ntawd, Nws yuav cais lawv ua ob pab zoo ib yam li tus tswv yug yaj cais cov yaj mus nyob sab xis thiab cais cov tshis mus nyob sab laug. Pab nyob xab xis yog pab uas tau Vaj Leej Txiv foom koobhmoov, tau txais nqi zog uas yog Vajtswv Lub Tebchaws. Vim lawv tau ua tej yam qhia tshwm lawv txojkev hlub tus Tswv thaum Nws ntsib kev txomnyem, xws li pub rau tus Tswv noj haus thaum Nws tshaib nqhis, mus xyuas thiab tu tus Tswv thaum Nws muaj mob, raug kaw hauv tsev lojcuj… Cov neeg no tau suav hais tias yog neeg ncajncees, lawv xav tsis thoob vim qhov tseeb lawv yeej tsis tau pab tus Tswv ib zaug twg li. Tus Tswv qhia rau lawv hais tias txhua zaug uas lawv ua tej haujlwm zoo ntawd pub rau tus Tswv cov kwvtij, ces kuj yog ua rau tus Tswv thiab ntag. Tus Tswv cov kwvtij yog Nws cov thwjtim, muab hais kom dav ces yog tagnrho cov uas yog tus Tswv cov menyuam tseeb lawm. Tus Tswv saib txojkev ua zoo rau tus Tswv cov menyuam thaum lawv ntsib txojkev txomnyem yog ua rau tus Tswv ntag.
Zaj no tej zaum ua rau qee leej xav hais tias tau mus nyob ntuj ceebtsheej yog nqi zog ntawm txojkev ua zoo. Tiamsis Vajluskub hais tseeb meej hais tias peb tau txais txojkev cawmdim yog los ntawm peb txojkev ntseeg thiab tus Tswv txojkev hlub (Efexus 2:8-9). Cov neeg dawbhuv tiam Vajluskub Qub xws li Anplahas los kuj tau suav hais tias yog neeg ncajncees vim nws txojkev ntseeg (Loos 4:3). Tiamsis txojkev ntseeg tseeb kuj yuav tsum ua haujlwm qhia tshwm tawm sab nraud rau sawvdaws pom thiab (Yakaunpaus 2:14-17).
Tej zaum peb xav hais tias yog peb tau nyob Tswv Yexus tiam, ces peb yuav tau pab tus Tswv thiab nws cov timthawj tej yam haujlwm xws li ua zaub mov, qiv cuabyeej qhia Txojmoo Zoo, qiv chaw rau lawv ua Kevcai Hla Dhau… ces peb yuav hnov zoo siab thiab muaj hmoo kawg li. Tiamsis Tswv Yexus hais meej hais tias yog peb pab tus Tswv cov menyuam thaum lawv raug txomnyem ces kuj yog peb pab tus Tswv lawm thiab ntag (nqe 40). Yog li ntawd sijhawm zoo rau peb tau ua tus Tswv haujlwm yeej muaj ntau ibncig yog peb paub ua tib zoo xav. Thaum peb ua haujlwm pab cov kwvtij hauv Pawg Ntseeg ces yog peb tabtom ua haujlwm pub rau tus Tswv lawm thiab ntag.
Peb puas muaj nplooj siab xav ua haujlwm pub rau tus Tswv thiab peb tej kwvtwj?
Thov Vajtswv
Tus Tswv, thov pab nyuam yaus txaus siab hlo ua Koj tes haujlwm dhau ntawm qhov uas txhawjxeeb ua yam zoo pub rau lwm tus, tshwjxeeb yog ua zoo rau cov kwvtij nyob hauv Koj lub Pawg Ntseeg. Amees.
Nyeem Vajluskub peb lub xyoos: Yauj 39.
Tshooj Youtube BHKTHN: https://www.youtube.com/c/bhkthn
