Klei Aê Diê Blŭ: Y‑Mathiơ 25:31-40
Êlan kliăng: “Leh anăn Mtao srăng lŏ wĭt lač kơ diñu, ‘Sĭt nik kâo lač kơ diih, êjai diih ngă leh klei anăn kơ sa čô hlăm phung ayŏng adei kâo đơ điêt anei jing klei diih ngă leh kơ kâo yơh.’” (Y‑Mathiơ 25: 40).
Klei êmuh ksiêm mĭn: Kơ hlei čiăng lač kơ “Anak Mnuih”? Ti anôk čih tal êlâo hĭn kơ anăn iêô anei? Ya klei Khua Yang lač kơ phung tĭng hnuă Ñu? Ya ngă diñu dưi mâo klei Ama hơêč hmưi leh anăn dưi dưn Ƀuôn Ala Mtao Adiê? Ya klei hriăm kơ drei hlăm klei mă bruă kơ Khua Yang?
Khua Yang Yêsu khăng yua Anăn iêô čiăng pia kơ Ñu pô jing “Anak Mnuih”. Anăn iêô anei tal êlâo hĭn ƀuh mâo hlăm hră Y‑Đaniel 7:13-14. Khua pô hưn êlâo Y‑Đaniel ƀuh klei bi êdah pă drei hlô dliê prŏng kbiă hriê mơ̆ng êa ksĭ ƀrư̆ ƀrư̆ jing klei bi knăl kơ pă ƀuôn ala mtao mâo klei dưi kiă kriê hlăm sa wưng. Ti knhal tuč mâo sa čô msĕ si Anak Mnuih hriê mbĭt hŏng knam mơ̆ng adiê leh anăn Pô Dôk Hdĭp Mơ̆ng Ênuk Đưm (Aê Diê Ama) brei kơ Ñu klei dưi kiă kriê jih jang găp djuê mnuih tơl lă lar. Klei Mrâo Mrang Jăk Y‑Mathiơ 25 hưn mdah Khua Yang Yêsu srăng lŏ hriê ti lăn ala guh kơang msĕ si sa čô Mtao leh anăn Khua Phat Kđi čiăng phat kđi jih jang mnuih. Hlăk anăn Ñu srăng kah mnuih jing dua phung msĕ si sa čô mgăt kah biăp tĭng hnuă ñu leh anăn bê tĭng điâo ñu. Phung tĭng hnuă jing phung mâo Aê Diê Ama hơêč hmưi, mâo klei mưn dưi dưn Ƀuôn Ala Mtao Adiê. Kyuadah diñu ngă leh bruă klei pap kơ Khua Yang êjai Ñu tuôm hŏng klei dleh dlan msĕ si brei mnơ̆ng ƀơ̆ng huă, êa mnăm hlăk Ñu êpa mhao, răng kriê leh anăn čuă čhưn hlăk Ñu ruă duam, arăng krư̆ kđăl… Ñu iêô kơ phung anei jing phung kpă, diñu bi kngăr kyuadah sĭt gơ̆ diñu ka tuôm đru Khua Yang ôh. Khua Yang mblang kơ diñu thâo hlăk diñu ngă bruă jăk kơ phung ayŏng adei Khua Yang, anăn jing klei ngă jăk kơ Khua Yang pô. Phung ayŏng adei Khua Yang jing phung ƀĭng kna Khua Yang, blŭ lar hĭn jing jih jang phung anak Aê Diê sĭt. Khua Yang dlăng bruă ngă jăk kơ phung anak Aê Diê dôk tuôm hŏng klei dleh dlan jing ngă jăk kơ Khua Yang pô yơh.
Klei yăl dliê anei đa mnuih mĭndah klei dưi dôk ti ƀuôn jăk hlăm adiê jing klei mưn mơ̆ng klei ngă bruă jăk, ngă bruă klei pap. Ƀiădah Klei Aê Diê Blŭ hưn klă mngač drei mâo klei bi mtlaih jing, hŏng klei đăo kơ klei pap Khua Yang (Êphêsô 2:8-9). Wăt phung doh jăk ênuk Klei Bi Mguôp Hđăp msĕ si Y‑Abraham ăt mâo klei yap kpă kyua hŏng klei đăo mơh (Rôm 4:3). Ƀiădah klei đăo sĭt brei mâo bruă bi êdah klă sĭt (Y‑Yakơ 2:14-17).
Năng ai drei hmăng hmưi tơdah dưi dôk hdĭp hlăm ênuk Khua Yang Yêsu, dưi đru Ñu leh anăn phung khua ƀĭng kna hlăm lu mta bruă msĕ si tŭk knă, brei mañ mnơ̆ng yua pioh mtô klei đăo, brei mañ adŭ pioh mkra knăm ƀơ̆ng Klei Găn,… snăn jing klei hơ̆k mơak jăk jĭn êdi yơh. Ƀiădah Khua Yang Yêsu lač klă snei, klei đru phung đăo dôk găn klei knap mñai jing klei ngă jăk kơ Khua Yang pô yơh (êlan 40). Kyuanăn mmông găl čiăng kơ drei mă bruă kơ Khua Yang bŏ jŭm dar drei nanao tơdah drei mđing uêñ. Tơdah mă bruă kơ phung ayŏng amai adei hlăm Phung Sang Aê Diê jing drei dôk mă bruă kơ Khua Yang yơh.
Si ngă drei mâo klei bi mĭn mă bruă kơ Khua Yang jing mă bruă kơ phung ayŏng adei drei mơ̆?
Wah lač: Ơ Khua Yang, akâo Ih đru kâo kăp mă bruă kơ Khua Yang hŏng klei mđing uêñ ngă bruă jăk kơ jih jang mnuih, boh nik kơ phung ayŏng amai adei kâo hlăm găp djuê klei đăo.
Dlăng Klei Aê Diê Blŭ hlăm tlâo thŭn: Y‑Yôp 39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
