Tus Uas Muaj Kev Hlub – Kev Ncaj Ncees – 17/1/2023

629

 

 

II Kevcai 19:1-14

Nqe cim

“Yog ib tug twg tua yuam kev raug lwm tus tuag uas tsis yog nws tus yeebncuab, nws khiav mus cawm siav hauv cov nroog ntawd ib lub, kom luag tsis txhob muab nws tua” (II Kevcai 19:4)

 

Lus nug rau sawvdaws xav:

  • Lub homphiaj tseg muaj tej nroog cawm siav yog dabtsi?
  • Qhov no qhia pom hais tias Vajtswv yog Tus zoo licas?
  • Peb qhov chaw nkaum siav ruaj khov niaj hnub nimno yog dabtsi?

Nyob hauv II Kevcai 4:42-43, tus Tswv samhwm yuav tsum tu peb lub nroog cawm siav tseg cia hauv cheeb tsam nyob ntawm tus dej Yauladees sab hnub tuaj. Nyob hauv ntu Vajluskub no, Mauxes qhia tus Tswv haivneeg thaum txeeb tau lub tebchaws lawm, yuav tsum xaiv peb lub nroog muaj chaw mus yoojyim los tu ua nroog cawm siav ntxiv. Lub homphiaj ntawm tej nroog no yog kom cov neeg uas tsis txhob txwm tua neeg, muaj chaw nkaum siav. Vim yog nyob hauv tus Tswv haivneeg lub neej txhua hnub tej zaum yuav muaj tej teebmeem ua rau tuag neeg tiamsis tsis yog vim ntxub lossis txhob txwm tua tuag. Vim txojcai sau tseg hais tias yuav tsum muab siav pauj siav, yog hais tias tsis muaj tej nroog cawm siav no, nyob tsam tus tuag ntawd cov kwvtij chim, lawv yuav raws qab muab nws ntes coj mus tua. Yog zoo li ntawd yuav muaj kev sib ntxub, sib tua nyob hauv tus Tswv haivneeg tsis tseg.

Tiamsis, yog muaj ib tug twg vim ntxub lwm tus, tuav tswvyim tua neeg thiab khiav mus nkaum hauv tej nroog cawm siav, ces tus ntawd yuav tuag. Cov kev txwjlaug uas nyob hauv tus tua neeg ntawd lub nroog yuav tso neeg mus hauv tej nroog cawm siav ntes nws rov los cob rau tus tuag cov kwvtij, lawv yuav muab nws tua povtseg pauj qhov uas nws tua neeg. Hais tau hais tias, Vajtswv hlub Nws haivneeg txog qib uas txhawj txog txhua yam teebmeem loj me uas yuav muaj los rau Nws haivneeg kom npaj tau kev daws tej teebmeem ntawd. Tej lus samhwm tu tej nroog cawm siav ua rau peb pom txog tus Tswv txojkev hlub dhau los ntawm qhov uas Nws tiv thaiv tus neeg uas tsis txhob txwm tua neeg txojsia. Nrog rau qhov ntawd, peb kuj pom tus Tswv yog Tus ncaj ncees, nws rau txim rau tus uas txhob txwm tua neeg.

Peb txhua tus puavleej yog tib neeg txhaum tsimnyog tuag, tsis muaj ib lub nroog twg hauv ntiajteb no ua chaw nkaum siav rau peb, tsuas muaj Cawmseej Yexus xwb thiaj pab tau peb. Lossis hais raws lwm seem lus, tsis muaj ib txojkev ntseeg twg, lossis ib txojhau kev twg cawm tau peb. Vajtswv Txojlus qhia meej hais tias: “Nimno tus uas nrog Yexus Khetos koom ib txojsia, tus ntawd yuav tsis raug txiav txim” (Loos 8:1). Tsuas muaj Tswv Yexus tibleeg xwb thiaj yog lub nroog cawmsiav ruaj khov rau peb tus ntsujplig. Thaum tibneeg txhaum los cuag tus Tswv los ntawm kev ntseeg, thiab nyob twjywm hauv tus Tswv, ces ntawd yog qhov chaw nkaum siav dim ntawm dab ntxwsnyoog txhais tes. Nyob hauv Tswv Yexus, peb tau dim ntawm Vajtswv txojkev txiav txim thiab dim ntawm kev txhaum lub hwjchim. Tswv Yexus twb tuag txhiv peb lawm, peb thiaj tau ywjpheej ua neej nyob pub rau Nws thiab ua rau Nws tau koobmeej.

Thov Vajtswv

Tus Tswv, Koj yog tus hlub nyuam yaus heev, tiamsis Koj kuj ncaj ncees rau kev qhuab ntuas nyuam yaus. Thov kom nyuam yaus lub neej ua tau ntsev las thiab qhov kaj rau ntiajteb kom coob leej pom txog Koj txojkev hlub thiab kev ncaj ncees dhau ntawm nyuam yaus lub neej. Amees.

Peb paub txog tus Tswv yog Tus zoo licas hauv peb lub neej?

Nyeem Vajluskub hauv peb lub xyoos: Exekees 8:1-9:11

Kênh Youtube BHKTHN:

https://www.youtube.com/c/bhkthn

Bài trướcTiên Tri Thật Của Chúa – 16/1/2023
Bài tiếp theoPô Jăk Leh Anăn Kpă Ênô – 17/1/2023