Klei Aê Diê Blŭ: Klei Mtô Mñă Klei Bhiăn 19:1-14
Êlan kliăng: “Anei jing klei mkra đru kơ pô bi mdjiê mnuih, pô đuĕ dăp tinăn dưi bi mtlaih klei hdĭp ñu. Tơdah hŏng klei amâo čŏng čiăng ôh sa čô bi mdjiê pô riêng gah ñu amâo tuôm jing roh hŏng gơ̆ mơ̆ng êlâo ôh.” (Klei Mtô Mñă Klei Bhiăn 19:4)
Klei êmuh ksiêm mĭn: Ya klei kñăm čiăng kơ klei mdơ̆ng ƀuôn đuĕ dăp? Klei anei brei ƀuh si Pô Aê Diê jing? Ya jing anôk đuĕ dăp kjăp hlŏng lar kơ drei hruê anei?
Hlăm Klei Mtô Mñă Klei Bhiăn 4:42-43, Aê Diê mtă brei mdơ̆ng tlâo boh ƀuôn đuĕ dăp tĭng ngŏ êa krông Yurdan. Hlăm trăn anei, Y‑Môis mtă kơ phung ƀuôn sang tơdah mă bha čar leh, brei ruah tlâo boh ƀuôn mâo anôk găl hlăm čar pioh mdơ̆ng thiăm tlâo boh ƀuôn đuĕ dăp mơh. Klei kñăm čiăng kơ tlâo boh buôn anei jing pioh kơ hlei pô bi mdjiê mnuih amâo mâo hŏng klei čŏng čiăng ôh mâo anôk đuĕ dăp hơĭt ênang. Kyuadah hlăm klei hdĭp grăp hruê phung ƀuôn sang Aê Diê srăng tuôm hŏng klei jhat truh kơ klei bi mdjiê mnuih amâo djŏ hŏng klei čŏng čiăng kyua klei bi roh ôh. Kyuadah klei bhiăn čuăn leh klei hdĭp hrô kơ klei hdĭp snăn tơdah amâo mâo ƀuôn đuĕ dăp ôh, sĭt năng ai găp djuê pô djiê anăn srăng tiŏ leh anăn bi mdjiê pô bi mdjiê mnuih. Klei anăn srăng mjing klei bi roh leh anăn srăng mâo nanao klei bi rŭ ênua yơh ti krah phung ƀuôn sang Aê Diê.
Ƀiădah, tơdah hlei pô keh nač kơ mnuih mkăn, bi mdjiê gơ̆ hŏng klei čŏng čiăng leh anăn đuĕ dăp hlăm ƀuôn đuĕ dăp, pô anăn amâo srăng tlaih hŏng klei djiê ôh. Phung mduôn khua hlăm ƀuôn pô bi mdjiê mnuih anăn srăng tiŏ nao mnuih mă ba ñu jao kơ pô juă nư êrah bi mdjiê hĕ. Dưi lač, Aê Diê khăp kơ phung ƀuôn sang Ñu tơl Ñu răng mkăp êlâo kơ klei srăng truh añhăr kơ phung ƀuôn sang čiăng dưi mâo klei msir mkra bi jăk hlăm klei truh jêč êmêč anăn. Klei mtă brei mdơ̆ng ƀuôn đuĕ dăp anăn đru drei ƀuh klei jăk Aê Diê găn hŏng klei Ñu răng mgang klei hdĭp pô bi mdjiê mnuih amâo mâo hŏng klei čŏng čiăng ôh. Ƀiădah ti djiêô anăn, brei drei ƀuh msĕ mơh kơ Ñu jing Pô Kpă Ênô găn hŏng klei bi kmhal pô bi mdjiê mnuih hŏng klei čŏng čiăng.
Grăp čô drei jing mnuih soh năng hŏng klei djiê sơăi, êngao hlăm Yêsu Krist, ti lăn ala anei amâo mâo sa boh ƀuôn pioh kơ drei dưi đuĕ dăp êđăp ênang ôh. Amâodah lač snei, amâo mâo sa mta klei đăo, êlan hdră hriăm kpĭ mjuăt dưi bi mtlaih drei ôh. Klei Aê Diê Blŭ lač snei: “Kyuanăn ară anei hin amâo lŏ mâo klei bi kmhal ôh kơ phung dôk hlăm Krist Yêsu” (Rôm 8:1). Knŏng Yêsu Krist yơh jing anôk đuĕ dăp kjăp sĭt kơ mngăt drei. Mnuih soh dưi êran nao kơ Ñu hŏng klei đăo, leh anăn dôk hlăm Ñu, anăn yơh jing anôk đuĕ dăp êđăp ênang mơ̆ng jih jang klei mnêč yang jhat. Hlăm Yang Yêsu, drei tlaih mơ̆ng klei Aê Diê bi kmhal leh anăn tlaih mơ̆ng klei myang klei soh. Khua Yang Yêsu djiê hrô leh kơ klei soh drei, kyuanăn drei mâo klei êngiê hdĭp leh anăn bi guh kơang kơ anăn Ñu.
Drei thâo si Pô Aê Diê jing hlăm klei hdĭp drei?
Wal lač: Ơ Khua Yang, Pô khăp kơ kâo lu êdimi, ƀiădah Ih ăt jing Pô kpă ênô mơh hŏng klei Ih mkra mjuăt kâo tơdah kâo ngă soh. Akâo kơ Ih mjing kâo jing hra kơ lăn, klei mngač kơ lăn ala čiăng lu mnuih ƀuh klei khăp leh anăn klei kpă ênô Ih găn hŏng klei hdĭp kâo.
Dlăng Klei Aê Diê Blŭ hlăm tlâo thŭn : Y‑Êskiêl 8:1–9:11.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
