Yauhas 17:11-21
Nqe cim
“Tsis yog kuv thov koj pab cov neeg no xwb, tiamsis kuv thov koj pab cov neeg uas hnov tej lus uas lawv qhia thiab los ntseeg kuv” (Yauhas 17:20).
Lus nug rau sawvdaws xav:
– Peb yam uas Tswv Yexus thov Leej Txiv ua ntej thaum raug tuag yog dabtsi?
– Lo lus thov qhia pom Tswv Yexus muaj lub siab li cas?
– Peb coglus li cas rau Vajtswv hauv lub koobtsheej nco txog tus Tswv raug txomnyem thiab sawv hauv qhov tuag los xyoo no?
Zaj lus Tswv Yexus qhia thov Vajtswv muaj neeg muab hu ua “tus Tswv zaj lus thov Vajtswv” (Mathais 6:9-13), tiamsis qhov ntawd yog zaj lus uas Tswv Yexus qhia peb thov Vajtswv. Hauv Yauhas 17 thiaj li yog “zaj lus Tswv Yexus thov Vajtswv”. Tswv Yexus thov Leej Txiv 3 yam: Tim ib, tsomkwm cov neeg uas nyob hauv Tswv Yexus kom tsis muaj leejtwg poob (nqe 15), tim ob, ntxuav kom lawv huv (nqe 17), thiab tim peb, kom lawv koom ib lub siab ua haujlwm (nqe 20-21).
Lo lus thov Vajtswv tim ib, Tswv Yexus thov kom Nws Pawg Ntseeg tsis muaj ib tug poob mus thiab thov Leej Txiv tsomkwm lawv kom qaij deb deb ntawm tej kev phem (nqe 12-15). Zaj xwm uas hais txog lub nyiaj poob thiab tus yaj uas ploj lawm hauv Lukas 15 txhais hais tias txawm yog nyob ntawd tseem muaj nyiaj, muaj yaj, los tus tswv yeej txiav txim siab mus nrhiav kom tau lub nyiaj thiab tus yaj uas ploj lawm rov los. Niaj hnub nimno, yog tabtom muaj 100 tus ntseeg, peb puas yuav siv dag zog mus nrhiav tus yaj uas ploj lawm? Tus Tswv hlub peb kawg nkaus li. Thaum peb khiav deb Nws pab yaj lawm, tus Tswv yeej npaj txhua lub tswvyim nrhiav kom tau peb rov los tu. Tus Tswv paub hais tias yeebncuab nyob ibncig nrhiav tus uas tsis nco qab ceevfaj tom noj, tus Tswv thiaj thov Leej Txiv pab kom lawv tawmtsam yeej lawv tus yeebncuab (I Petus 5:8; Efexus 6:18).
Lo lus thov Vajtswv tim ob, Nws xav kom Nws cov yaj muaj “zog” (dawbhuv, nqe 17). Peb yog Vaj Leej Txiv xaiv, Vaj Leej Tub cov ntshav cawm, thiab Vaj Ntsujplig ua haujlwm hauv peb (I Kauleethaus 6:11), los ntawm Vajtswv Vaj Peb Leeg peb yog neeg dawbhuv “Leej Txiv Txojlus yog qhov tseeb” (nqe 17), yog peb coj raws li Leej Txiv tej lus peb tus yeebncuab yeej nrhiav tsis tau kev los tawmtsam peb.
Lo lus thov Vajtswv tim peb, yog thov pub rau peb txhua tus uas niaj hnub nimno hnov cov thwjtim tej lus qhia thiab ntseeg Tswv Yexus. Tus Tswv xav kom peb txhua tus koom ua ib lub siab thiab koom tau nrog tus Tswv, kom lub “ntiajteb thiaj paub hais tias Leej Txiv txib Leej Tub los”, muaj lub ntsiab qhia tias koom ua ke tawm mus qhia thiab nthuav dav Vajtswv lub Tebchaws rau hauv ntiajteb no (Yauhas 15:8).
Hauv lub caij ua koobtshej nco txog Tswv Yexus raug txomnyem thiab sawv hauv qhov tuag rov los xyoo no, cia li nco ntsoov tus Tswv Yexus tej lus thov Vajtswv uas puv npo kev hlub no, kom peb pom txog qhov uas tus Tswv hlub peb, thiab coglus yuav siv zog kawm Nws tej lus kom ua tau lub neej dawbhuv, qaij deb tej kev phem thiab koom siab qhia tus Tswv kev hlub rau tibneeg sawvdaws.
Thov Vajtswv,
Tswv Yexus, nyuam yaus ua Koj tsaug vim Koj txojkev hlub loj kawg nkaus, txawm yog yuav raug neeg muab tua povtseg los Koj yeej thov Vajtswv pab nyuam yaus thiab Koj Pawg Ntseeg! Vaj Leej Txiv, thov Koj tuav nyuam yaus nyob hauv Koj lub npe, ua kom nyuam yaus dawbhuv, koom tes ua haujlwm rau Koj. Nyuam yaus tuav Tswv Yexus Khetos lub npe thov, Amees.
Peb puas tas siab ua raws li Tswv Yexus cov lus thov Vajtswv?
Nyeem Vajluskub hauv peb lub xyoo: Khiavdim 34
Kênh Youtube BHKTHN:
