Khiavdim 34:21-24
Nqe cim:
“Nej txhua tus txivneej yuav tsum tuaj pehawm kuv uas yog tus TSWV tus uas yog cov Yixalayees tus Vajtswv ib xyoo twg peb zaug” (Khiavdim 34:23).
Lus nug rau sawvdaws xav:
- Tus Tswv qhia cov Yixalayees yuav tsum so hnub twg thiab ua kevcai lub caij twg?
- Lub ntsiab ntawm qhov uas so thiab ua tej kevcai ntawd yog dabtsi?
- Muaj lo lus cogtseg twg nrog rau tej lus qhia no?
- Niaj hnub nimno Pawg Ntseeg ua tej kevcai twg thiab muaj lub ntsiab licas?
Tus Tswv rov hais txog nqe kevcai Thib plaub nyob hauv Kaum Nqe Kevcai (nqe 21) los nco txog Nws tes haujlwm tsim ntuj tsim teb, thiab cov Yixalayees yuav tsum so hnub Xanpataus txawm yog yuav maj cog qoobloo lossis sau qoobloo npaum twg los xij. Tus Tswv xav kom Nws haivneeg tsuas ua haujlwm rau hnub thiab so ib hnub kom rov los siav, tau sib txuas nrog tus Tswv, lub cuabyig thiab cov ntseeg. Tswj kom muaj kev haujsim ntawm kev ua haujlwm thiab so yog feemxyuam ntawm tus ntseeg yuav tsum ua rau Vajtswv, rau tus kheej thiab rau lawv tej txheeb ze. Qhov uas raug dag ntxias mus ua haujlwm xya hnub ib lub limtiam ua rau peb tsis muaj sijhawm rau tus Tswv thiab lwm tus.
Tus Tswv samhwm kom cov Yixalayees txhua tus txivneej yuav tsum tuaj pehawm tus Tswv ib xyoo twg peb zaug. Ntawd yog peb rooj kevcai tshwjxeeb ntsistxog zaj uas tus Tswv haivneeg tawm hauv tebchaws Iziv los. Thib ib, Kevcai Noj Ncuav Tsis Xyaw Keeb (nqe 18) pib hnub kaum tsib lub ib hlis ntuj, tus Tswv haivneeg yuav tsum noj ncuav tsis xyaw keeb xya hnub ua nco txog lawv cov yawgkoob tau noj ncuav tsis xyaw keeb thaum maj nroos tawm nram tebchaws Iziv los, thiab kuj yog nco txog tus Tswv, ua Nws tsaug vim Nws tau ua ntau yam txujci tseemceeb cawm lawv dim cev qhev los.
Thib ob, Kevcai Sau Qoobloo, rooj kevcai no yog ua tus Tswv tsaug vim Nws yog tus pub zaub mov, qoobloo rau tus Tswv haivneeg thaum lawv los nyob hauv tebchaws Kana-as. Rooj Kevcai no pib thaum lawv pib hlais tej nplej caug thiab coj thawj teg nplej mus fij rau tus Tswv. Tomqab ntawd lawv rov los sau qoobloo xya lub limtiam, tomqab ntawd tsib caug hnub yuav tsum ua kevcai ua tus Tswv tsaug xaus lub caij sau qoobloo (nqe 22; Levis Kevcai 23:15-21).
Thib peb, Kevcai Nyob Tsev Pheebsuab (Levis Kevcai 23:33-36; Teev Npe 29:12; II Kevcai 16:13-15). Pib thaum lub xya hli ntuj, hnub kaum tsib, cov Yixalayees yuav tsum nyob txwm nkaus xya hnub los pehawm tus Tswv thiab nco txog ntu caijnyoog cov Yixalayees nyob hauv tsev pheeb suab thaum lawv nyob tom tiaj suabpuam. Tus Tswv coglus yuav tivthaiv thiab ua kom lawv lub tebchaws nthuav dav thaum lawv ua peb rooj kevcai ntawd los pehawm Nws (nqe 23-24).
Nyob hauv Tej Lus Cogtseg Tshiab , tus Tswv Pawg Ntseeg tsis ua peb rooj kevcai saum no lawm, tiamsis saib los ntawm Vajluskub, peb ua tej kevcai xws li Koobtsheej nco txog Tswv Yexus Kev Los Yug, Kev Txomnyem, Kev Sawv Rov Los, Kev Mus Saum Ntuj, Vaj Ntsujplig Nqis Los, Kevcai Ua Vajtwv Tsaug,… Ntawd yog tej lub sijhawm rau cov ntseeg nco txog Vajtswv Vaj Peb Leeg txojkev saibxyuas, cawmdim thiab coj kev ua neej. Thiab ntawd kuj yog zoo sijhawm rau tus Tswv haivneeg los kawm Vajtswv Txojlus thiab nrhiav kev sib raug zoo nrog lwm tus.
Thov Vajtswv,
Tus Tswv, thov ua Koj tsaug vim Koj tau hlub tshua, cawmdim thiab pub rau nyuam yaus muaj txaus txhua yam sab nqaij tawv thiab sab ntsujplig. Tseeb tiag, nyuam yaus yeej tsis muaj txaus lus los ua Koj tsaug thiab txhawb nqa Koj! Thov kom tagnrho nyuam yaus lubneej yuav cia los hlub Koj thiab pehawm Koj tsis tseg tsis tu. Amees.
Peb koom tej kevcai hauv Pawg Ntseeg zoo licas lawm?
Nyeem Vajluskub hauv peb lub xyoo: Daniyees 2:17-49
Kênh Youtube BHKTHN:
