Klei Aê Diê Blŭ: Klei Kbiă 34:21-24
Êlan kliăng: “Tlâo bliư̆ grăp thŭn brei jih jang phung êkei diih bi êdah ti anăp Yêhôwa Aê Diê, Aê Diê phung Israel” (Klei Kbiă 34:23).
Klei êmuh ksiêm mĭn: Ya hruê leh anăn klei knăm Aê Diê mtô phung ƀuôn sang Israel djă pioh? Ya klei yuôm bhăn hruê leh anăn knăm anăn? Ya klei ƀuăn mâo mbĭt? Hruê anei ya knăm Sang Aê Diê mâo leh anăn si klei yuôm bhăn?
Aê Diê lŏ mñă wĭt klei bhiăn tal pă hlăm Pluh Mta Klei Bhiăn (êlan 21) čiăng hdơr kơ klei Aê Diê hrih mjing lăn ala, leh anăn phung ƀuôn sang Israel brei djă pioh hruê sabat čiăng mdei wăt tơdah dôk ti krah yan puôt amâodah wiă. Aê Diê čiăng kơ phung ƀuôn sang Ñu kƀĭn mă bruă hlăm năm hruê leh anăn mdei sa hruê čiăng kơrŭ wĭt klei suaih pral, klei bi mguôp hŏng Aê Diê, gŏ sang leh anăn êpul êya klei đăo. Djă pioh klei bi knar hlăm klei mă bruă leh anăn mdei jing bruă klam phung đăo hŏng Aê Diê, hŏng pô leh anăn găp djuê pô. Klei mplư mă bruă jih ai hlăm kjuh hruê hlăm sa hruê kăm ngă kơ drei amâo lŏ mâo hruê mmông kơ Aê Diê leh anăn kơ hdơ̆ng phung drei.
Aê Diê mtrŭn asăp jih jang phung êkei Israel nao ti anăp Aê Diê ti anôk doh jăk hlăm tlâo Klei knăm. Anei jing tlâo klei knăm yuôm bhăn djŏ tuôm kơ klei mâo hƀuê ênuk phung ƀuôn sang Aê Diê ruah kbiă mơ̆ng čar Êjip. Tal sa, Knăm kpŭng amâo kpei (êlan 18) mphŭn mơ̆ng hruê pluh êma mlan Sa, phung ƀuôn sang Aê Diê ƀơ̆ng kpŭng amâo mâo kpei jih kjuh hruê čiăng hdơr kơ aduôn aê diñu amâo ƀơ̆ng kpŭng mâo kpei hlăm wưng mjêč ruăt kbiă mơ̆ng Êjip, mbĭt anăn čiăng hdơr leh anăn hdơr knga kơ Yêhôwa Aê Diê ngă leh lu klei myang čiăng bi mtlaih diñu mơ̆ng klei jing hlŭn.
Tal dua, Klei Knăm kơ Hruê Kăm amâodah lŏ pia jing Klei Knăm Puôt Êmiêt, čiăng thâo hdơr knga kơ Yêhôwa jing Pô mkăp mnơ̆ng ƀơ̆ng huă, brei yan boh mnga hlăk phung ƀuôn sang Ñu mŭt hlăm krĭng Kanaan. Knăm anei mphŭn hlăk phung ƀuôn sang hrui êmiêt mdiê akŏ yan hŏng klei bhăn ba wĭt ba nao. Leh anăn lŏ wĭt hrui wĭt dŭm mta mnơ̆ng dhơ̆ng lŏ hma hlăm kjuh hruê kăm, mjưh ruê̆ yan puôt hlăm hruê tal êma pluh hŏng knăm bi mni kơ Aê Diê (êlan 22, Bruă Lêwi 23:15-21).
Tal tlâo, Knăm Sang Čhiăm (Bruă Lêwi:33-36; Klei Yap 29:12; Klei Mtô Mñă Klei Bhiăn 16:13-15). Mphŭn mơ̆ng hruê krah mlan Kjuh sui hlăm kjuh hruê čiăng mpŭ kơ Yêhôwa leh anăn lŏ hdơr wưng phung ƀuôn sang Israel dôk hlăm sang čhiăm tơdah nao hlăm kdrăn tač. Aê Diê ƀuăn srăng răng kriê leh anăn pŏk mlar lăn ala diñu tơdah diñu djă tlâo klei knăm hlăm thŭn, nao bi êdah čiăng kkuh mpŭ kơ Ñu (êlan 23-24).
Hlăm klei bi mguôp mrâo, Sang Aê Diê amâo lŏ djă pioh ôh tlâo knăm anei, ƀiădah mơ̆ng Klei Aê Diê Blŭ, mkŏ mjing dŭm klei knăm msĕ si bi hdơr Klei Kkiêng kơ Khua Yang Yêsu, Knăm Khua Yang Tŭ Klei Knap Mñai, Knăm Khua Yang Kbiă Lŏ Hdĭp, Knăm Đĭ Wĭt kơ adiê, Yang Mngăt Jăk Trŭn Hruê, Knăm Bi Mni… Anei jing gưl phung đăo hdơr kơ klei jăk Aê Diê Tlâo Yang; klei mkăp, klei bi tui leh anăn Ñu atăt gai. Leh anăn anei ăt jing klei găl kơ phung ƀuôn sang Aê Diê hriăm Klei Aê Diê Blŭ leh anăn bi mguôp hdơ̆ng pô.
Si drei găn leh dŭm klei knăm hlăm Sang Aê Diê?
Ơ Khua Yang, kâo bi mni kơ Khua Yang khăp leh kâo, bi tui, mkăp kơ kâo djăp mta kơ kđeh asăr, ai tiê leh anăn mngăt kâo. Klă sĭt kâo amâo djăp klei blŭ čiăng bi mni leh anăn mpŭ mni kơ Ih ôh! Ƀuăn jing klei hdĭp kâo hŭi mpŭ kơ Ih leh anăn sĭt suôr mă bruă kơ Khua Yang.
Dlăng Klei Aê Diê Blŭ hlăm tlâo thŭn: Y-Đaniel 2:17-49
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
