Pajlug 30:3-4
Nqe cim:
“Kuv tsis tau kawm paub tswvyim, thiab tsis paub Vajtswv tus uas dawb huv” (Pajlug 30:3)
Lus nug rau sawvdaws xav:
– Ankus nug tej lo lus nug twg kom pom tibneeg muaj nrim?
– Lo lus teb yog dabtsi?
– Koj zeem paub yus cheem tsum thov Vajtswv rau cov nomtswv yam dabtsi?
Ankus tsis nres ntawm qhov uas zeem paub yus txoj kev ruam hauv kev zeem paub Vajtswv, tiamsis nws nug txog 5 lo lus nug kom qhia tawm tibneeg kev muaj nrim hauv kev zeem paub Vajtswv. Thiab Vajluskub tau teb cov lus nug no.
“Leejtwg tau nce mus saum ntuj ceebtsheej thiab nqis rov qab los?” Tsuas muaj Vajtswv xwb (Chivkeeb 11:7; 28:12; Ntawv Nkauj 68:18). “Leejtwg ntes tau cua rau hauv nws lub xibteg?” Tsuas muaj Vajtswv xwb (Khiavdim 15:10; Ntawv Nkauj 104:3; 135:7; Yaxayas 40:12; Amauj 4:13). “Leejtwg muab ib daim ntaub los qhwv tau dej?” Tsuas muaj Vajtswv xwb (Yauj 26:8; 38:8-9). “Leejtwg muab tej ciam av ntiajteb los sib lo ua ke?” Tsuas muaj Vajtswv xwb (Yauj 38:4; Ntawv Nkauj 24:1-2; Pajlug 8:27-30). Lo lus teb 4 lo lus nug saum meej heev yog Vajtswv xwb, thiab tamsim no Ankus xav paub Nws lub npe thiab Nws Tus Tub. Hauv cov Yixalyees lub hlwb, paub ib tug tibneeg lub npe yog paub nws tus yam ntxwv thiab tus cwjpwm. Ankus tau nug 4 lo lus nug xub thawj qhia tshwm nws lub siab xav paub Vajtswv tes haujlwm thiab lo lus tim 5 qhia pom nws tseem xav paub tseeb Vajtswv.
“Nws lub npe hu li cas?” Nws yog Tus Dawbhuv (nqe 3), Vajtswv (nqe 5, 9), Tus TSWV (nqe 9). “Nws tus tub npe hu li cas?” Cov tub txhais Vajluskub ntawm cov Yixalyees hais tias Vajtswv “Tus Tub” yog Yakhauj (Khiavdim 4:22; Yelemis 31:9; Hauxeyas 11:1); muaj ib txhia hais tias yog Adas (Lukas 3:38). Tiamsis Vajluskub tshiab teb hais tias Vajtswv “Tus Tub” yog Tus uas koom tsim txhua yam, Tus uas ibtxwm muaj nyob thaum ub los (Pajlug 8:22-31), Tus uas “nce mus saum ntuj ceebtsheej thiab nqis rov qab los” yog Tswv Yexus (Yauhas 3:13; Efexus 4:8-10).
Ankus xaus nws cov lus nug los ntawm ib lo lus twv: “Yog koj paub, cia li hais los?”. Lo lus twv no qhia pom nws lub siab nqhis nqhawv tshawb nrhiav paub nws tus Vajtswv. Txawm li ntawd los leejtwg thiaj yuav paub txog Vajtswv Tus uas tsis muaj nrim yog hais tias Nws tsis cim civ qhia Nws rau tibneeg paub. Ib zaug ntxiv, nqe 4 qhia pom lo lus teb rau cov lus nug ntsig txog Tus dawbhuv nws tsis nyob hauv tibneeg kev xav kev paub tiamsis nyob ntawm Vajtswv qhia paub xwb. Tsuas muaj Vajtswv xwb thiaj yuav hais tau txog tej npe zoo li ntawd.
Peb ntshaw lub tebchaws, pawg ntseeg, tsev neeg muaj cov thawjcoj, xibhwb, cov niam txiv txawj ntse, tiamsis kev txawj ntse tsuas muaj rau tus txo hwjchim, zeem paub yus muaj nrim, zeem paub Vajtswv thiab pehawm Nws, “Tus uas muaj tswvyim yog tus uas paub hwm tus TSWV. Yog koj paub Vajtswv tus uas Dawbhuv, koj thiaj yog tus totaub tiag.” (Pajlug 9:10). Nov yog qhov uas peb yuav tau tas siab thov Vajtswv rau cov thawjcoj tswj tebchaws, pawg ntseeg thiab tsev neeg.
Thov Vajtswv,
Vajtswv, thov pub nyuam yaus muaj cov thawjcoj rau lub tebchaws, koom haum, thiab hauv tsev neeg kom pheej zeem paub yus muaj nrim, txawj txo hwjchim thiab tas siab nrhiav Vajtswv. Nyuam yaus tuav Yexus Khetos lub npe thov, Amees.
Peb puas xav hais tias peb muaj peevxwm teb tau cov lug nug txog Tus Dlawbhuv?
Nyeem Vajluskub hauv peb lub xyoos: Kaulauxais 3
Kênh Youtube BHKTHN:
